Akmal Ortiqov: "Metallurg" mavsumning ikkinchi qismida o'z o'yinini topib oldi"

Biz jamoaning tajribali posboni Akmal Ortiqovning fikrlari bilan qiziqdik.

- Akmal, ushbu mavsumni "Metallurg" safida o'tkazdingiz. Umumiy taassurotlar qanday?

- Ochig'ini aytsam, mavsumning birinchi qismini ko'ngildagidek o'tkaza olmadik. Qiyin o'yinlar ko'p bo'ldi, bir necha marta ochko ham yo'qotdik. Ammo ikkinchi davraga kelib jamoamiz o'z o'yinini topib oldi. Bir qator kuchli jamoalardan ochko tortib olishga muvaffaq bo'ldik. Umumiy aytadigan bo'lsam, garchi birinchi davra biz uchun omadli bo'lmagan bo'lsa-da, mavsumning ikkinchi qismidan qoniqish hosil qildim. Yigitlar zo'r mavsum o'tkazishdi, umuman, biz uchun barchasi ajoyib o'tdi deyish mumkin.

- SHu o'rinda, siz uchun balki kutilgan yoki kutilmagan savol. Siz bir necha yillar Yaypanning "Turon" klubida o'ynagansiz. Agar sobiq jamoangizdan taklif tushsa, qaytgan bo'larmidingiz?

- Hozirda "Metallurg" bilan amaldagi shartnomam bor. SHu sababli "Turon"ga qaytish yoki qaytmasligim haqida aytsam, noto'g'ri bo'ladi. Hali bu borada gapirishga erta deb o'ylayman.

- Yaxshi, unda futboldagi o'z poziciyangizdan kelib chiqib savol bersam. Sizningcha, hozirgi kunda dunyoning eng kuchli darvozaboni kim?

- Tibo Kurtua. Bu boradagi shaxsiy fikrim shunday. Hozirgi kunda aynan u dunyoning eng kuchli posboni bo'lib turibdi.

- Yana sobiq jamoangiz haqida. "Paxtakor"ga qarshi Yaypanda bo'lib o'tgan o'yinda "Turon” safida uchrashuvning eng yaxshi futbolchisi deb topilgandingiz. O'sha uchrashuvdan qanday xotira va taassurotlar qolgan?

- "Turon" – "Paxtakor" (1:1 qayd etilgan – tahr.) uchrashuvi futbolchilik faoliyatimdagi eng yaxshi o'yinlardan biri bo'lgandi. O'sha kuni Yaypandagi "O'zbekiston" o'yingohidagi muhit ham ajoyib bo'lgan. Stadionga tashrif buyurgan mahalliy muxlislar maza qilib futbol tomosha qilishgan va o'yin yakunida chinakamiga bayram qilishgandi.

- "Turon" yaqinda bo'lib o'tgan o'tish o'yinida "Lokomotiv"ni mag'lub etib, Superligaga yo'llanma oldi. Yangi mavsumda bu jamoadan qanday natijalarni kutyasiz?

- Birinchi navbatda, yaypanlik muxlislarni Superliga yo'llanmasi bilan tabriklayman. Ular bunga munosib edilar. Albatta, jamoaga omad va muvaffaqiyat yor bo'lishini tilab qolaman. "Turon" yangi mavsumda Superligada munosib ishtirok etishiga ishonaman.

Bekzod Tolibov yozib oldi