Abror Pirriev: "Karantindan keyin birinchi rasmiy o'yingacha barcha jamoalarga ikki haftalik yig'in kerak bo'ladi"

Asosiy jamoa shifokori Abror Pirriev bilan bog'lanib, futbolchilar holati bilan qiziqdik, qolaversa shu kunlarda eng ko'p muhokama qilinayotgan savolga javob oldik. 

- Karantin paytida futbolchilar holatidan xabar olib turibsizmi? Ularning sog'lig'i yaxshimi? 

- Albatta, onlayn rejimda har bir futbolchining ahvolidan xabardor bo'lyapmiz. Hozirgi kunda O'FA va klublar mutasaddilari, murabbiy va shifokorlar - barchamiz futbolchilar bilan aloqadamiz. Jamoamiz o'yinchilari orasida salomatligi xavotirga soladigan alomatlar yo'q. Hamma murabbiylar shtabi tomonidan tuzib bergan reja asosida o'z uyida individual tarzda shug'ullanyapti. 

- Tibbiy nuqtai nazardan karantin tugaganidan keyin necha kun o'tib rasmiy o'yinlarni boshlagan maqul deb o'ylaysiz? Negaki bu savol hozirda ko'pchilikni qiziqtiryapti. 

- Bu masalaga biroz jiddiy yondoshuv kerak. CHunki har bir futbolchi uyda har qancha mustaqil shug'ullanmasin, murabbiylar nazoratidagi jismoniy yuklamalar bilan, unutilayozgan o'yin amaliyoti qirralarini mujassamlashtiruvchi, futbol maydonida olib boriladigan mashg'ulotga barobar bo'lma olmaydi. 

SHuning uchun mavsum muddati sharoitidan kelib chiqib to birinchi rasmiy bahsga qadar jamoalar ikki haftalik o'quv-mashg'ulot yig'ini o'tkazishlari zarur deb hisoblayman. Nima uchun? CHunki jiddiy yuklamalarga tayyor bo'lmagan mushaklar jarohat olishga moyil bo'lib qoladi va kutilayotgan tig'iz mavsumga hali tayyor bo'lmagan futbolchi buning oqibatida jarohatlar girdobiga tushib qolishi mumkin. 

Jarohatga yo'liqadigan futbolchilar orasida milliy terma jamoa azolari ham bo'lishi mumkinligini inobatga olib, bu masalada shoshma-shosharlik qilmasdan obdon o'ylab keyin qaror chiqargan maqul deb o'ylayman. 

- SHu o'rinda uyda qolayotganlarga tilaklaringiz? 

- Karantin davrini ko'chaga chiqmasdan uyda o'tkazayotganlarga o'zlari va oilasi sog'lig'i haqida qayg'urib bundan keyin ham uyda qolishlarini tilab qolaman. CHunki hozirgi paytda bu juda muhim. Futbolchilarimizga ham avvalo uyda qolishni, murabbiylar tomonidan berilgan reja asosidagi mashg'ulotlarni uy sharoitida qunt bilan bajarishlarini, vaznni nazorat qilib borishni hamda ko'proq kitob mutolaa qilishlarini tilab qolaman.