Abdumutal Tursunqulov: "Nasib bo'lsa "Oq-tepa" maydonidan ham g'alaba bilan qaytamiz"

- Abdumutal, bugungi o'yin haqida fikrlaringiz...

- Qiyin o'yin bo'ldi. Dastlabki maydonga moslashishda bizda ozgina qiyinchilik bo'ldi. Raqib jamoa o'z uyida o'ynayotgani bois o'yinning dastlabki daqiqalarida bizga bosim o'tkazdi. Gol o'tkazib yuborganimizdan so'ng birinchi bo'limning 15-20 daqiqalariga kelib "Istiqlol" futbolchilarida toliqish ko'zga tashlandi. SHundan so'ng bizda o'zimizga bo'lgan ishonch ortdi. SHuningdek, ikkinchi bo'lim boshida raqib futbolchisining maydondan chetlatilishi g'alaba qozonishimiz uchun sabablardan biri bo'ldi.

- Natijalardan kelib chiqsa, "Zomin" uydagi uchrashuvlardan ko'ra safarda yaxshiroq o'yin namoyish etmoqda. Buni qanday izohlaysiz?

- Agar o'yinlarimizni kuzatib borayotgan bo'lsangiz, hech qaysi jamoa bizni yaqqol ustunlik bilan, ketma-ket hujumlar tashkil etgan xolda mag'lub etgani yo'q. Mana hozirgi kunda PRO-Liga bahslari televidenie orqali namoyish etilmoqda. Bazida bizga omad etishmayapti, aslida raqiblar bilan tengma-teng o'yin namoyish etmoqdamiz. Aynan shu kabi xolatlar ustida ishladik, natijalarimiz ham yaxshilandi. Nasib bo'lsa navbatdagi uchrashuvlarda ham g'alaba qozonishga harakat qilamiz.

- Bugun asosiy raqiblaring "Oq-tepa" va "Xorazm" jamoalari o'rtasidagi uchrashuvda durang natija qayd etildi. Navbatdagi o'yinda "Oq-tepa" bilan o'ynaysizlar. Bugungi g'alaba sizlarga keyingi uchrashuv oldidan qanday ishtiyoq beradi?

- Biz har doim g'alaba uchun maydonga tushamiz. Raqib kim bo'lishining farqi yo'q, "Neftchi", "SHo'rtan", "Oq-tepa" kabi jamoalar bilan o'yinlarda ham faqat g'alaba qozonish uchun harakat qilganmiz. Nasib bo'lsa "Oq-tepa" maydonidan ham g'alaba bilan qaytamiz.