Тожиев: “БухДУ” яхши шаклланган жамоа экан, уларнинг 2-3 та ўйинларини таҳлил қилиб чиқдик. “Ғазалкент” таркиби жуда ёш. Уларни мана шундай кучли ўйин ва рақобат билан катта футболга олиб чиқамиз.
- Биринчи голдан сўнг дарвза ишғол этилган тўпни бошқа жойга олиб қўйдингиз. Жамоа бу тўпни музейда сақлайдими, шундай анъана ташкил қилиш ниятидамисиз?
- Режаларимиз жуда кўп. Ўйиндан олдин кийиниш хонасида ўтирганимизда, йигитлар билан агар гол урсак, тўпни эсдалик учун олиб қўйишни келишиб олгандик. Энди шу тўп “Ғазалкент” жамоасининг музейига йўл олади.
- Баҳсдан олдин пенальтиларни ким тепишини белгилаб олганмидингиз?
- Албатта, ҳамма нарса режа асосида бўлади. Пенальтини Ибодуллаев Озод тепиши керак. Баҳсдан олдин ҳамма нарсани ёзиб, чизиб, келишиб оламиз. Баҳс пайтида тортишиб қолиш мумкин. Учрашувдан олдин режа тузамиз ва шу режа асосида ҳаракатланамиз.
- Бугун стадионда яхши атмосфера бўлди. Ғазалкентдан ҳам ташриф буюрган мухлислар бўлди…
- Футболни мухлислар учун ўйнаймиз. Жамоамиз раҳбари Бўстонлиқ тумани ҳокими билан биргаликда ишқибозларни ўйинга ташрифини ташкиллаштиришди. Қўлимиздан келганича ёрдам берамиз дейишди.
- Иккинчи бўлимда шогирдларингизга кўп эътироз билдирдингиз. Бунга нима сабаб бўлди?
- Ўйиндан олдин режа тузганмиз, ҳаммани ўз жойи бор. Режа бузилса ўйин издан чиқади. Шу сабаб йигитларга баъзи кўрсатмалар бердим.
- Кубокда Суперлиганинг икки жамоаси (“Локомотив” ва “Динамо”)га қарши ўйнайсиз…
- Кубок ҳақида тўхталадиган бўлсак, “Локомотив” жуда яхши шаклланган жамоад. “Динамо” ўтган мавсум кучли учлик учун курашди. Бу ўйинлар йигитларимизга катта тажриба беради. Футболчиларимиз шундай баҳсларда тобланишади.
- “Ғазалкент” фақат ёш футболчилардан иборат. Улар қизиққон, баъзи вазиятларда ҳиссиётларни жиловлай олишмайди. Бунинг устида ҳам ишлайсизларми?
- Штабимизда психолог бор. У режа асосида ҳаммаси билан индивидуал ишлайди. Ҳа йигитлар қизиққон, лекин Туркиядаги йиғинга қараганда улар анча босилган.
- “Ғазалкент”нинг жорий мавсумдаги минимум вазифаси қандай?
- Биз ҳар бир ўйинга ғалаба учун чиқамиз. Дуранг ёки мағлубиятни ўйлаб майдонга тушмаймиз.
- Баъзида футболчилар мураббий кўрсатмасидан четга чиқиб, индивидуал маҳоратини кўрсатишига қандай қарайсиз?
- Ҳужумда креатив бўлиши керак. Индивидуал маҳорат кўрсатган футболчини танқид қилмаймиз. Хато қилдими, ҳеч қиси йўқ, аммо бундай ҳаракатлар фақат учинчи (ҳужум чизиғи) зонада.
