Kecha tunda Toshkentga yetib kelgan sloveniyalik murabbiy Srechko Katanets futbol bo'yicha Milliy terma jamoamiz bosh murabbiyi sifatida e'lon qilinishi kutilmoqda. Bugun u yurtimizning sport infratuzilmasi bilan tanishar ekan, O'zbekiston Milliy Olimpiya qo'mitasiga ham tashrif buyurdi. Mehmonni MOQ raisi Rustam Shoabdurahmonov, Qo'mita raisining birinchi o'rinbosari, O'zbekiston futbol assotsiatsiyasining birinchi vice-prezidenti Ravshan Irmatov va assotsiatsiya mutasaddilari kutib olishdi.
Tashrif davomida Srechko Katanetsga o'zbek sportining boy tarixi, yaqinda yakuniga etgan Tokio-2020 va boshqa Olimpiya o'yinlarida atletlarimiz qayd etgan natijalar, istiqbolli rejalar xususida ma'lumot berildi. Shuningdek, mutaxassis MOQ qoshida tuzilgan va sportchilarimiz uchun xizmat qilayotgan Respublika sport tibbiyoti ilmiy-amaliy markazi haqida ham axborot oldi.
MOQ rahbariyati Katanetsning terma jamoamizda ko'rishdan mamnun ekani, yaqin vaqt davomida ko'plab rejalarni hamkorlikda amalga oshirishdan umidvor ekanini bildirib, uning faoliyatiga omad tilab o'tdi.
