Championat.asia sayti turning eng yaxshilarini aniqladi.
Tur murabbiyi - Jamoliddin Rahmatullaev (Respublika FA)
Respublika FA ortda qolgan turda Qarshida “Lochin”dan yirik hisobda ustun keldi (3:0). Uchrashuvda mehmonlar yorqin o'yin ko'rsatib, munosib ravishda yirik g'alabani qo'lga kiritdi. Bunda jamoa ustozi Jamoliddin Rahmatullaevning o'rni katta. Shu tariqa, aynan Rahmatullaev tur murabbiyi deb topildi.
Tur futbolchisi - Evgeniy Kozlov (“Aral”)
“Aral” bu turda Nukusdagi “Turon” stadionida “Yaypan” ustidan 5:2 hisobida g'alabaga erishdi. Bahsda “Aral” hujumchisi dubl qayd etib, jamoasi yirik hisobda zafar quchishida katta hissa qo'shdi. Shunday qilib, aynan rossiyalik futbolchi tur futbolchisi sifatida etirof etildi.
Tur darvozaboni - Mohirbek Komilov (“Metallurg”)
“Metallurg” bu turda Bekobodda “QMU Jayxun”ni qabul qilib, kichik hisobda g'alaba qozondi (1:0). Bahsda bekobodliklar darvozaboni Mohirbek Komilov bir qator vaziyatlarda o'zining eng yaxshi tomonlarini ko'rsatib, darvozani “quruq” saqladi va tur darvozaboni nomiga loyiq deb topildi.
Tur goli - Akbarxon Ibrohimxonov (“Yaypan”)
“Yaypan” “Aral”ga imkoniyatni boy berganiga (2:5) qaramay, jamoa yarim himoyachisi Akbarxon Ibrohimxonov chap qanotda to'pni qabul qilib, olib o'ng oyoqdagi aylanma zarbasi orqali darvozani nishonga oldi. Uning zarbasidan keyin to'p darvoza ustuni tegib, darvoza to'ridan joy oldi. Shu tariqa, aynan shu gol turdagi eng chiroylisi nomiga loyiq ko'rildi.
