Avvalroq unda 14 ta klub ishtirok etib, ularning har biri ikki davra davomida 26 tadan o'yinda maydonga tushishi ma'lum qilingandi.

Pro liga reglamentiga ko'ra, musobaqa g'olibi Superligaga to'g'ridan-to'g'ri yo'llanmani qo'lga kiritadi. Qolgan yarimta o'rin uchun esa yakunda 4 ta klub kurash olib borishi belgilab qo'yilgan. Yani, musobaqa yakuniga etgach, 2, 3, 4, 5-o'rin egalari pley-off bosqichi doirasida maydonga tushadi. Bu o'z o'zidan 5-yo'llanma uchun ham kurash kechishini bildiradi. Boisi, mavsumni 5-o'rinda yakunlagan klubda ham nazariy jihatdan Superligaga yo'l olish imkoniyati saqlab qolinadi.

Mavsumning so'nggi - 26-tur o'yinlari 7-8 noyabr kunlariga to'g'ri keladi. 9-17 noyabr sanalari FIFA kunlari sifatida belgilab qo'yilgan. Shundan kelib chiqib, pley-off bosqichining birinchisi 24-25 noyabr kunlari o'tkaziladi. So'nggi uchrashuv esa 5 dekabrga to'g'ri keladi. Qayd etish kerak, 12 dekabr sanasida Superligaga o'tish o'yini o'tkaziladi.

Pley-off bosqichida mavsumni nisbatan yuqoriroq o'rinda yakunlagan klubning imkoniyatlari biroz yaxshiroq bo'ladi. Yani, Pro liganing ikkinchi jamoasi bitta o'yindan iborat pley-offning ilk bosqichida 5-o'rindan joy olgan klubni o'z maydonida qabul qiladi. Musobaqani 3-o'rinda tugatgan klub esa o'z uyida Pro liganing to'rtinchi klubi bilan bellashadi. Har ikki o'yin g'oliblari Superliga o'tish o'yinida o'ynash imkonini beruvchi yo'llanma uchun o'zaro kurashadi. Hal qiluvchi bellashuv ham mavsumni nisbatan yuqoriroq o'rinda yakunlagan klub maydonida bo'lib o'tadi.

Pro liga va Birinchi liga o'rtasidagi holat sport emas, hozircha licenziyalash principiga ko'ra tartibga solinadi. Yani, mavsum davomida Pro liga talablarini ehtimoliy bajara olmaydigan klub egallagan o'rniga qaramay, musobaqa bilan xayrlashadi. Birinchi liga ishtirokchilari orasidan ham Pro liganing yangi a'zosi xuddi shu ko'rinishda saralab olinadi. Pro liga reglamenti bilan mazkur havola orqali tanishib olishingiz mumkin.

Pro ligada 5-o'rin uchun ham kurash kechadi