Jamoalarning so'nggi 5 ta o'yindagi natijalari (avgust oyi formati) hamda 14- va 19-turlardan keyingi umumiy turnir jadvalini solishtirganda, bir qator e'tiborga molik jihatlar yuzaga chiqadi.
1. 🚀 Avgust - "Navbahor"da yuz foizlik natija va "So'g'diyona"ning uyg'onishi
Avgust oyining eng yaxshi jamoasi so'zsiz "Navbahor" bo'ldi. Namanganliklar avgust oyidagi 5 ta o'yinning barchasida g'alaba qozonib, 100 foizlik natija - 15 ochkoni qo'lga kiritishdi (to'plar nisbati 13:4).
Jadvaldagi sakrash: 14-turdan so'ng 22 ochko bilan 5-o'rinda borayotgan "lochinlar" 19-turga kelib 37 ochko bilan 3-o'ringa ko'tarilib oldi va chempionlik uchun kurashga qaytdi.
Shuningdek, Jizzaxning "So'g'diyona" jamoasi uchun avgust burilish nuqtasi bo'ldi. O'tgan oydagi 5 o'yinda 12 ochko to'plagan (2-o'rin) jizzaxliklar umumiy jadvalda 14-o'rindagi xavfli hududdan (12 ochko) 10-o'ringa (24 ochko) ko'tarilib, pastki zonadan ancha uzoqlashdi.
"Buxoro" ham stabillik ko'rsatib, avgustda 11 ochko jamg'ardi va 14-turdagi 4-o'rinni (23 ochko) 19-turda ham mustahkam saqlab qoldi (34 ochko).
2. ⚠️ Peshqadamlar shashti pasaydi: "Neftchi" va "Paxtakor"da ochko yo'qotishlar
Garchi "Neftchi" va "Paxtakor" turnir jadvalida mos ravishda 1- va 2-o'rinlarni saqlab qolishgan bo'lsa-da, avgust oyi ular uchun chempionlik poygasida kutilgandek sermahsul kechmadi:
"Neftchi": 14-turda 35 ochko bilan yaqqol peshqadam bo'lib turgan Farg'ona klubi avgustdagi 5 ta o'yinda 10 ochko (3 g'alaba, 1 durang, 1 mag'lubiyat) to'pladi. Ochkolar soni 45 taga etganiga qaramay, jamoa asta-sekin taqibchilarni o'ziga yaqinlashtirmoqda.
"Paxtakor": Toshkentliklar avgust oyida umuman mag'lubiyatga uchramagan bo'lishsa-da, ketma-ket 4 ta durang va 1 ta g'alaba evaziga bor-yo'g'i 7 ochko jamg'arishdi (to'plar nisbati 5:4). Natijada "Paxtakor" 14-turda "Neftchi"dan 2 ochkoga ortda qolayotgan bo'lsa (33 ochko), 19-turga kelib bu farq 5 ochkoga (40 ochko) etdi. Orqadan esa 37 ochko bilan "Navbahor" yaqinlashib oldi.
3. 📉 Avgust omadsizlari va inqiroz: OKMK hamda "Nasaf"
Avgust oyi ayniqsa OKMK va "Nasaf" uchun muvaffaqiyatsiz kechdi:
OKMK: 14-turdan so'ng 25 ochko bilan kuchli uchlikda (3-o'rin) borayotgan olmaliqliklar avgustdagi 5 o'yinda bor-yo'g'i 4 ochko (1 g'alaba, 1 durang, 3 mag'lubiyat) to'plashdi va 6-o'ringa (29 ochko) tushib ketishdi. Yana bir fakt, “konchilar” oxirgi 3 ta o'yinda raqib darvozasiga yo'l topa olishgani yo'q.
"Nasaf": Qarshiliklar ham avgustda bor-yo'g'i 4 ochko to'plab, 7-o'rindan 9-o'ringa (25 ochko) pasayishdi.
4. 🚨 Quyi zonadagi vaziyat: "Mashal" elita bilan xayrlashmoqda, "Bunyodkor" xavfli hududda
"Mashal" (Muborak): Muborakliklarning ahvoli juda og'ir. Avgust oyidagi 5 ta o'yinning barchasida mag'lubiyat (0 ochko, to'plar nisbati 1:10). 14-turdan so'ng 4 ochkosi bo'lgan "Mashal" 19-turdan so'ng ham 4 ochko bilan oxirgi, 16-o'rinda qolmoqda. 15-o'rindagi jamoa bilan oradagi farq 15 ochkoni tashkil etmoqda. Tepadagi jamoalardan bunchalik ortda borish "Mashal"ning Superligada qolish imkoniyatlarini deyarli yo'qqa chiqarmoqda.
"Bunyodkor": Toshkentning "qaldirg'ochlari" ham avgust oyini barbod qilishdi. So'nggi 5 ta o'yinda 5 ta mag'lubiyat (0 ochko) va 6:15 to'plar nisbati! 14-turdan so'ng 19 ochko bilan xotirjam 10-o'rinda borayotgan jamoa avgustdagi mag'lubiyatlar seriyasidan so'ng 19-turda 15-o'ringa (xavfli zona) tushib ketdi.
“Surxon”: Anvar G'ofurov shogirdlari avgust oyida 5 ta o'yinda 5 ochko yig'ishdi. Ular orasida “Paxtakor” va OKMK maydonida qo'lga kiritilgan duranglar alohida qadrli bo'lishi shubhasiz.
“Qizilqum”: Navoiyliklar 5 ta bahsda 9 ochko qo'lga kiritishdi va 13-o'rindan 11-pog'onaga chiqib olishdi. Bitta o'yinda jamoaga texnik g'alaba yozildi. Jamshid Saidov jamoasi avgustni “Nasaf”ga qarshi muhim g'alaba bilan yakunladi.
E'tiborlisi, "Qo'qon-1912" avgustda 8 ochko to'plab, 15-o'rindan 14-o'ringa (19 ochko) ko'tarilib oldi va "Bunyodkor" bilan ochkolarni tenglashtirdi.
Avgust sarhisobi shuni ko'rsatmoqdaki, mavsumning qolgan qismida nafaqat chempionlik va kuchli uchlik uchun, balki elitada jonini saqlab qalish yo'lida ham har bir ochko oltinga teng bo'ladi. Bugun jamoalar sentyabr oyidagi yurishlarini boshlaydi. Mavsum yakuniga qadar yanada qiziq lahzalar hali oldinda.
