– Маркус, Фарғонага ва "Нефтчи" оиласига хуш келибсиз. Сиз Финляндиянинг гўзал Турку шаҳрида туғилиб, ўсгансиз. Скандинавиядаги болалик йилларингиз қандай ўтган эди?
– Жуда сокин ва ажойиб шаҳарда туғилганман, мени ўсиб улғайтиргани учун бу шаҳарга каттакон раҳмат айтаман.
– Сиз футболчилар оиласидан чиққансиз – бобонгиз ҳам, отангиз ҳам профессионал футболчи бўлган. Футболда дастлабки қадамларингизни неча ёшда қўйгансиз ва футбол йўлини танлашингизга оилангизнинг қанчалик таъсири бўлган?
– Тўрт ёшимдан бошлаб футбол билан шуғулланишни бошлаганман, оилам менинг илк мураббийларим бўлишган ва улар менинг ҳақиқий мотиваторларим, шунингдек, асосий қўллаб-қувватловчиларимдир.
– 13 ёшингизда Англияга кўчиб ўтгансиз: аввал "Вест Бромвич" академиясига, кейин "Брентфорд" академиясига қўшилгансиз. Ота-онани ва ватанни тарк этиш ҳамда инглиз футбол тизимига мослашиш қийин бўлмадими?
– Бу мен учун ҳаётимдаги энг қийин, шунинг билан биргаликда энг яхши қарор ҳамдир.
– "Нефтчи"дан таклиф олганингизда сизга ким маслаҳат берди ёки клубга қўшилиш қарорингизнинг асосий сабаби нима эди?
– Менежерим менга "Нефтчи" жамоасидан таклиф борлиги ҳақида айтди, шундан сўнг у билан бу трансфер ҳақида суҳбатлашдик, сўнгра ўзимга янги чақирув сифатида ушбу таклифни қабул қилдим.
– "Нефтчи"дан расмий таклиф келишидан олдин Ўзбекистон ёки ўзбек футболи ҳақида бирор нарса билармидингиз?
– Очиғи, юртингиз футболи ҳақида жуда оз маълумотга эга эдим. Ўзбекистонни жаҳон чемпионатидаги ўйинларини кузатгандим, бундан ташқари "Манчестер Сити"даги Ҳусанов ҳақида билардим, холос.
– "Нефтчи"даги ўзбек футболчиларидан ўрганган биринчи ўзбекча сўзларингиз қайсилар эди?
– Ҳали кўп сўз ўрганмадим, раҳмат сўзини ўргандим, лекин биринчи ёдлаган сўзим сут бўлди, сабаби кофе билан биргаликда сутдан кўп фойдаланганлигим учун ушбу сўз биринчи ёдимда қолди.
– 2020 йилда Финляндия терма жамоасидаги дебютингизда ўша пайтдаги жаҳон чемпиони Францияга гол уриб, катта эътиборни тортгансиз. Бугун ўша машҳур гол ҳақида қандай хотираларингиз бор?
– Франция дарвозасига киритган голим ҳаётимдаги энг эсда қоларли вазият деб айта оламан. Ўйлашимча, Франция устидан қозонилган илк ғалабамиз ўшанда содир бўлган. Бу мен учун фахрланса арзийдиган натижа.
– Ҳозирги "Нефтчи" таркиби ва тактик услуби Англиядаги энг самарали мавсумларингизда ўйнаган услубингизга қанчалик мос келади?
– Мен тезкор ва интенсив ўйин кўрсатадиган ўйинчиман ва менинг ўйин услубим "Нефтчи" жамоасига жуда мос тушади деган умиддаман.
– Европанинг энг нуфузли турнирларидаги муҳитни бошдан кечирган ҳолда, энди "Нефтчи" сафида Осиёнинг энг йирик клублар турнири – ОФК Чемпионлар лигаси Элитада майдонга тушасиз. Осиё футболидаги бу янги ва катта синов сизда қандай мотивация ва ҳаяжон уйғотмоқда?
– Мен Европада улкан тажриба орттира олдим. Ўзим учун янги саҳифалар очмоқчиман ва янги нарсалар ўрганмоқчиман. Биринчи учрашувни стадиондан томоша қилдим. Атмосфера ажойиб эди. Тезроқ жамоа билан расмий учрашув ўтказишни интизорлик билан кутмоқдаман.
– Скандинавия мамлакатлари совуқ ва қорли иқлими билан машҳур. Маҳаллий об-ҳаво ва шаҳарга мослашиш жараёни сиз учун қандай кечди?
– Очиғи, Фарғона ҳавосидан жуда роҳатланяпман. Менга бу шаҳар ва унинг об-ҳавоси жуда ёқди.
– Фарғонага келганингиздан бери қайси маҳаллий одат ёки муносабат сизни энг кўп ҳайратга солган ёки алоҳида хурсанд қилди?
– Мен жуда камгап ва уялчанг инсонман. Бу бизнинг менталитетимизга хос одат. Фарғоналиклар мен билан жуда яхши муносабатда бўлишяпти. Бу кўзни қувнатадиган ҳолат. Бунинг учун уларга ўз миннатдорчилигимни билдираман.
– Фарғона мухлислари "Нефтчи"га чексиз содиқлиги ва иштиёқи билан танилган. Маркус Форсс клуб мухлисларига қандай хабар йўлламоқчи?
– Ҳаммаси ажойиб ўтди. Тезроқ жамоам учун голлар киритишни хоҳлайман, бундан ташқари мухлисларимизга каттакон раҳмат айтаман ва қўллаб-қувватлашда давом этишларини сўрайман. Мавсум сўнгида ўз натижаларимиз билан мухлисларни хурсанд қилишга ваъда бераман.
– Сиз билан бир майдонда ҳамда Сизга қарши ҳаракат қилган машҳур футболчилар кимлар?
– Жуда кўп топ даражадаги футболчилар билан бир майдонда тўп сурганман, мисол қилиб Килиан Мбаппе, Айван Тони, Эриксен каби футболчиларни айтиб ўтсам бўлади.
– "Нефтчи" сафида Осиёнинг энг йирик клублар турнири – ОФК Чемпионлар лигаси Элитада майдонга тушасиз. Олдинда кутиб турган учрашувлар ҳақида фикрларингиз?
– Бу мавсум чемпионлар лигасида жамоа билан иштирок этамиз. Бизни олдинда жуда қийин ўйинлар кутиб турибди, ҳар бир учрашувда ғалаба учун майдонга тушамиз ва бунинг учун жонимизни беришга тайёрмиз.
– Жамоадошларингиз орасидаги энг қувноқ ўйинчи ким?
– Жамоадошларим орасида Зоран ва Стипе типи жуда қувноқ ўйинчи, лекин мен Ратиньони жуда ҳазилкаш ва қувноқ ўйинчи деб танлаган бўлар эдим.
– Сиз билан бирга ва қарши ўйнаган Топ футболчилардан тузилган таркиб қандай бўлар эди?
– Дарвозабон – Рая, мен у билан "Брентфорд"да бирга ўйнаганман. Ўнг қанот ҳимоясида – Кунде. Марказий ҳимоячилар – Ван Дейк, унга қарши "Ливерпул"да ўйнаганман ва Андреас Кристенсен, "Челси"га қарши ўйнаганмиз, ҳозирда "Барселона"да. Чап қанот ҳимоясида – Динье. Ярим ҳимояда – Норгор, у билан бирга ўйнаганман, Морган Рожерс, у билан "Вест Бромвич"да бирга ўйнаганмиз, шунингдек "Мидлсбро"дан Ҳейден Ҳакни. Ҳужумда – Мбаппе, Бензема, Гризманн. Мураббий – Томас Франк.
