Unda dastlab mezbonlar bosh murabbiyi Maksim Shackix va futbolchi Farruh Sayfiev ishtirok etishdi.

"Barchaga xayrli kun. "Axal" haqida etarlicha ma'lumotlarga egamiz – haqiqatan ham munosib raqib. O'yinlarini tahlil qildik – tez va yaxshi shakllangan jamoa. Har bir raqibga muammo tug'dira oladi, jamoaviy himoyalanadi. Ertaga vaziyatlardan foydalanishga harakat qilamiz va o'z o'yinimizni ko'rsatishga intilamiz. Muxlislarni xursand qilishimiz kerak. Bizga ayni paytda 3 ochko zarur", – deydi Maksim Shackix.

- Avvalgi ikki turda "Paxtakor" hech bir jabhada raqibidan qolishmadi. Statistikada ham buni ko'rish mumkin, lekin yakun etishmadi. Ertaga "Axal" himoyadan o'yinni tashkil qiladi. Gol urishdagi muammoni qanday hal qilmoqchisiz? Boz ustiga Cheran o'ynamaydi...

- To'g'ri aytdingiz. Raqibdan hech bir jabhada qolishmadik. Ustunlikka ega bo'ldik. "Axal" yaxshi himoyalanadi va juda tezkor qarshi hujumga o'tadi. Ochiq zonalardan foydalana oladi. Biz futbolchilarimizning kuchli taraflaridan foydalangan holda o'yinni tashkil qilishimiz zarur. O'ylaymanki, ertaga ijobiy natijaga erisha olamiz.

- Mavsumning murakkab pallasida turibmiz. Ertaga futbolchilar jismoniy tomonlama o'yinga tayyormi?

- Bu borada muammo yo'q deb o'ylayman.

"Ertaga bizni juda yaxshi o'yin kutmoqda. 3 ochko juda muhim. Guruhdan chiqish uchun imkoniyatimiz bor. "Axal"ning o'yinlarini ko'rdik. Ilk turda ular "Al Fayha"ni mag'lubiyatga uchratdi. Biz faqat g'alaba uchun harakat qilamiz", – dedi Farruh Sayfiev.

"Paxtakor" – "Axal" uchrashuvi ertaga 19:00 da boshlanadi.

Maksim Shackix: "Axal" har bir raqibga muammo tug'dira oladi"