Го Оива: "Ўзбекистон билан мураккаб учрашувда якунда ғалабани илиб кетганимиз учун футболчиларни алоҳида эътироф этиш керак"

Sherzod Nurmatov
2 окт 2026, 14:56
Япония U-23 терма жамоаси устози Го Оива Осиё ўйинлари ярим финалидан ўрин олган Ўзбекистон билан ўйиндан (1:1, пенальтилар бўйича — 9:8) кейин фикрларини билдирди.

“Мураккаб учрашувда якунда ғалабани илиб кетганимиз учун футболчиларни алоҳида эътироф этиш керак. 90 дақиқа ичида режалаштирган жиҳатларимиз майдонда кўринган пайтлар учради, шу билан бирга, бу кейинги баҳс учун сабоқ чиқаришимиз керак бўлган ўйин бўлди. Энди тикланиш жараёнини тўғри олиб бориб, финалга пухта тайёргарлик кўришимиз зарур.

Бундай турнирларда рўйхатдаги барча 23 футболчи билан бир жамоа бўлиб курашамиз. Ўйинчилар аъло даражада эди ва мен уларни ярим финалга тўлиқ ишонч билан майдонга туширдим. Таркибни тўлиқ ўзгартиришдан аниқ мақсад бор эди, аммо олдинда финал бўлгани сабабли буни ҳозирча ошкор қилмайман.

Рақиб аввалги ўйин услубини ўзгартиргани боис, дастлаб ҳимоявий позицияга ўтиб қолгандек бўлдик. Бундай эҳтимолни кутгандик. Шогирдларимга рақиб шиддат билан босим ўтказса ҳам, 90 дақиқалик ўйин режасига амал қилиб, асосий вақтда ғалаба қозониш кераклигини тушунтиргандим. Тўп ўтказиб юборишимиз эҳтимолдан холи эмасди, гарчи буни истамаган бўлсак-да. Аммо рақибга руҳий устунлик ва шиддат бериб қўйганимиз, хулоса чиқаришимиз керак бўлган жиҳат бўлди. Иккинчи бўлимда эса йигитлар тўпни ва баҳс тизгинини ўз назоратига ола билишди. Бу жиҳатни муносиб баҳолаган ҳолда, финалга ҳам худди шундай яхши кайфиятда йўл оламиз”, – деди япониялик мураббий.

Япония ҳал қилувчи финал баҳсида турнирнинг сўнгги уч карра ғолиби бўлган Кореяга қарши 16 йиллик танаффусдан кейинги илк олтин медаллар учун баҳс олиб боради.

Ўхшаш янгиликлар

Sherzod NurmatovМуаллиф
Манба: football-zone.net