Слуцкининг алоқага чиққани, "Рубин"га қачон бориб қўшилиши ва бошқа жамоаларнинг таклифи — Умарали Раҳмоналиев

Яқинда 19 ёшни қарши олган футболчи эндиликда фаолиятини Россияда давом эттиради. Фақатгина у янги жамоасига қачон бориб қўшилиши мавҳумлигича қолмоқда. Сайтимиз журналисти Абдулазиз Искандаров Раҳмоналиев билан суҳбатлашди. 

Расман: "Бунёдкор" ўйинчиси Раҳмоналиев "Рубин"га ўтади

- "Рубин" таклифи қачон ва ким томонидан бўлди?

- Биринчи давра якунланиши арафасида "Рубин" қизиқиш билдираётгани маълум бўлди. Агентларим томонидан бош мураббий Леонид Слуцкийга  ўйинларим туширилган видеотасвирни кўрсатилган экан. Ҳаммаси шундан кейин бошланди. Агентлар ва мураббий менга алоқага чиқишди. Жамоага таклиф қилишди. 

- Легионерга айланишга ўзингизни қанчалик тайёрман, деб ўйлайсиз? 

- Хорижда тўп тепиш қандай бўлишини бошимдан ўтказмаганман. Футболда қаттиқ меҳнат ва матонат эвазига юксак марраларни забт этиш мумкин. Ҳаммасини вақт кўрсатади. 

- Бошқа жамоалардан ҳам таклифлар бормиди? Нима учун айнан "Рубин" варианти танланди?

- Албатта таклифлар бўлди. Менга кўпроқ "Рубин" маъқул келди. Россия чемпионати кўплаб ўзбекистонлик футболчиларга трамплин вазифасини ўтаб беради.  

- Янги жамоангиз сафига қачон бориб қўшилишингиз аниқ бўлиб улгурдими?

- "Рубин"га қачон боришим номаълум. 

"Рубин" Раҳмоналиевни ушбу ёздаёқ ўз таркибида кўрмоқчи

- "Бунёдкор" сўнгги ўйинларни муваффақиятсиз ўтказмоқда...

- Буни омадсизлик билан боғлаган бўлардим. Бутун жамоадан тортиб оддий ишчига қадар борини беряпти. Меҳнат ҳеч қачон самарасиз қолмайди. Ишлашда давом этамиз. "Бунёдкор"нинг натижаларини яхшилаш учун бор кучимизни сарф қиламиз. Буни амалда кўрсатамиз.