"Реал" Алонсо ўрнини босиши мумкин бўлган номзодларни аниқлаб олди

"El Mundo" нашрининг хабар беришича, мадридликлар раҳбарияти бош мураббий лавозимига аллақачон иккита номзодни танлаб олган. Шорт-листда афсонавий франциялик Зинедин Зидан ва харизматик германиялик Юрген Клопп бор.

Алонсонинг "қироллик клуби" бошқарувидаги келажаги кўп жиҳатдан 10 декабрь куни бўлиб ўтадиган Чемпионлар Лигаси гуруҳ босқичининг 6-туридан ўрин олган "Манчестер Сити"га қарши ўйин натижасига боғлиқ. Манбанинг хабар беришича, агар "Реал" мағлуб бўлса, мураббий ишини йўқотади.

Ла Лигадаги вазият ҳам Алонсо фойдасига эмас: жамоа сўнгги 5 ўйинда атиги 1 та ғалабага эришди ва иккинчи ўринга тушиб кетди. "Сантьяго Бернабеу"да "Сельта"дан қабул қилиб олинган мағлубият вазиятни янада ёмонлаштирди, "Барселона" эса "Бетис" устидан ғалаба қозонди ва 40 очко тўплаб, пешқадамлигини мустаҳкамлади. "Реал" 36 очко билан 2-ўринга жойлашган.

15-тур натижаларидан сўнг юқори ўрин учун кураш қизғин тус олди ва "Реал" бош мураббийининг тақдири яқин кунларда ҳал қилиниши мумкин.