Камолиддин Тожиев: "Бугун бизнинг кунимиз эмас экан"

- Ўйин ҳақида фикрингиз?

- Бугун Ўзбекистон Суперкубоги учун ўйинда майдонга тушдик ва афсуски, ўз мақсадимизга эриша олмадик. Ўйиннинг боришидан ким биринчи гол урса, шу жамоа ғалаба қозонадиган баҳсга ўхшаб қолди. "Нефтчи" гол урди ва ғалаба қозонди. Биринчи таймнинг ўзида Рустам Турдимуровда учта юз фоизли вазият бўлди, лекин тўп кирита олмади. Биз гол урмадик, "Нефтчи" эса тўп киритишга муваффақ бўлди. Ўйин яхши кечди. Йигитларимиз 200 фоизга ҳаракат қилиб, яхши ўйин кўрсатишди. Бугун бизнинг кунимиз эмас экан.

- "Пахтакор" бу мавсум Суперлигада ҳозирча учта ва Суперкубокда битта - жами 4та учрашув ўтказди. Бугунги баҳсни "Пахтакор"нинг энг яхши ўйини деб айта оласизми?

-  Ҳа, бугун энг яхши ўйинимизни ўтказдик.

- Ўйинни кучайтириш мақсадида захирадан футболчиларни туширдингиз. Лекин улар ўйинни кучайтира олмади. Масалан, Ойбек Бозоров ўзидан кутилган ўйинни намойиш этмади. Бу борада фикрингиз қандай?

- Захирадан тушган ҳамма футболчиларимиз яхши ҳаракат қилишди. Мен уларнинг ўйинидан қониқдим. Балки озгина кўпроқ вақт беришимиз керак бўлгандир, лекин ҳамма ўзига берилган имкониятдан фойдаланишга ҳаракат қилди.

- Захирадан тушган Пётр Пажишек ҳаводаги тўпларга деярли сакрамади, фақат "блок" қўйиб юрди.

- Сакраса орқада ҳеч ким йўқ эди, шу боис тўпни ўзига бўйсундиришга ҳаракат қилди.