Сардор Собирхўжаев: “80-90 фоиз легионер мураббий ва футболчилар Суперлигани жуда кучсиз деб ўйлаб келишади”

– "Пахтакор" сафидаги навбатдаги финал – Суперкубок олдидан фикрларингиз…

– Биринчи навбатда, бу совринли ўйин. Битта ўйин. Дуранг бўлмайди бу ўйинда. Шу боис эртага мухлисбоп ўйин бўлади деб ўйлайман.

– "Пахтакор"нинг "Навбаҳор"га қарши кутилмаган мағлубиятидан кейин кўпчилик футбол мутахассислари айтишяптики, "Нефтчи" фаворит бўлиб қолди, уларда ғалабали церийа ҳам давом этиб келяпти. Бунга қанчалик қўшилмайсиз ва аргументларингизни айтсангиз?

– Агарда улар фаворит бўлса, бу бизга яхши. Уларда босим кўпроқ бўлади. Лекин "Навбаҳор" билан ўйинда кутилмаган натижа бўлди. Шунақа ўйинлар бўлиб туради. Масалан, ўтган йили "Пахтакор" Нефтчини Фарғонада 4:0 ҳисобида енгган.

– Ўтган йили иккита ўйинда ҳам "Пахтакор" "Нефтчи"ни мағлуб этганди, айниқса, биринчи даврадаги ўйинда имкон қолдирмаганди. Умумий олганда, ўтган мавсумдаги "Нефтчи" билан жорий мавсумдаги "Нефтчи"ни солиштирсак, ўзгаришлар кўпми? Биринчи навбатда, бош мураббий ўзгарган. Умумий олганда, бу йилги "Нефтчи"ни кучайди, деб ҳисоблайсизми?

– "Нефтчи" ўтган йил ҳам кучли эди. Масалан, ўтган йилги "Пахтакор" ўша пайтдаги "Нефтчи"ни 4:0 ҳисобида ютадиган ҳолатда эмас эди. Шунақа бўлиб қолди. Таркиб ўша-ўша, лекин ўйин ўзгарди уларда. Левченко пайтида бешта ҳимоячи билан кўпроқ таянчда ўйнашарди, ҳозир янги мураббий билан тўп назоратига урғу беришди.

– "Пахтакор"га ўтган мавсум келган Педро Морейра жамоадан кетганига деярли бир йил бўлади, Педро Морейрада нима ўхшамади деб ўйлайсиз?

– Менинг фикрим, Ўзбекистонга келадиган 80-90 фоиз легионер мураббий ва легионер футболчилар Ўзбекистон чемпионатини жуда кучсиз деб ўйлайди. Менинг фикримнинг биринчиси шу. Сал менсимасдан қаради деб ўйлайман. Камолиддин Тожиев чемпионатимиз қанақа даражада кучлилигини билади. Мен Англия Премьер-лигасига тенглаштирмоқчи эмасман, лекин ўзига яраша кучли.