Анчелотти "Реал"даги муаммолар ҳақида: "Мбаппенинг келиши Кроос ва Начонинг кетишига тўғри келди, ўзгаришлар доим ҳам силлиқ кечмайди"

"Бир пайтлар идеал бўлган "Реал" нима учун шунчалик ўзгариб кетганини тушуняпсизми?" деган саволга италиялик мутахассис шундай жавоб берди:

"Футболда деталлар барчасини ҳал қилади ва шу билан бирга жамоа ичидаги муҳит ҳам ўзгаради. Гап фақатгина муҳитда ёки Тони Крооснинг ўрнига Килиан Мбаппенинг келишида эмас. Ўша йили Начо ҳам жамоани тарк этди, Дани Карвахаль жароҳат олди, Лука Модрич эса камроқ ўйнай бошлади.

Кийиниш хонасида фантастик муҳитни яратган эски авлод кетди ва уларнинг ўрнига ўйинга ўз характери, индивидуаллигини олиб кирадиган ҳамда ўрнак бўладиган янги авлод футболчилари келди. Бу нарсалар бир кечада содир бўлмайди, бунинг учун вақт керак".

Мбаппе ва ўтиш даври

Анчелотти янги етакчилар ва жамоанинг мослашув жараёни ҳақида қўшимча қилди:

"Мбаппенинг келиши иккита муҳим ўйинчи — Кроос ва Начонинг кетишига тўғри келди ва бу муҳитни ўзгартириб юборди. Мбаппе 50 га яқин гол уриб, ўзини фантастик даражада кўрсатди ва жамоа совринлар учун курашди. Чунки футбол майда деталларга асосланган. Қачонки сиз нимадир ўзгартирсангиз, ҳаммаси ҳам доим силлиқ кечавермайди", — деди Бразилия терма жамоаси устози.