Самвел Бабаян: "Икки мағлубиятдан сўнг ғалаба қозониш ўта муҳим эди. Янги жамоа туздик, бизга бироз вақт керак"

"Икки мағлубиятдан сўнг бугунги ғалаба ўта керакли эди. Йигитлар яхши ўйин намойиш этишди. Йирикроқ ҳисобда ғалаба қозонишимиз ҳам мумкин эди. Мен бугун майдонда курашишни ва ғалаба қозонишни истайдиган жамоани кўрдим. Биз энди тикланиш жараёнидамиз. Майдонда доминантлик қиладиган футболни излашда давом этамиз. Мақсадимиз агрессив ва прессингли футбол намойиш этиш. Жамоа энди шаклланиб бормоқда. Меҳнат қилишда давом этишимиз керак", - деди Самвел Бабаян ғалабадан сўнг.

- Бугун жамоангиз намойиш этган ўйиндан қанчалик қониқдингиз?
- Эътибор берган бўлсангиз мен бугун умуман ўриндиқда ўтирмадим. Кўпгина вазиятларда футболчиларни олдинга чорлаб туриш керак бўлди. Жамоам ўйинидан тўлиқ қониқдим деган мураббий фаолиятини тугатиб қўявергани яхши деб ўйлайман. Яхшироқ ҳаракат қилишимиз мумкин бўлган вазиятлар топилади. Йигитлардан миннатдорман. Кетма-кет икки мағлубиятдан сўнг ўзимизга келиб олдик. Футболчилар бугун агрессив ва иштиёқ билан ўйнашди. Рақиб дарвозасига тўхтовсиз хавф солдик. Айниқса Драган Черанга миннатдорчилик билдираман. У сўнгги дақиқага қадар прессинг қилди. Менимча, майдондаги ҳаракат бўйича рекорд қўйди. Гол уриб олганимиздан сўнг яна ҳужумга зўр беришимиз керак эди. Биринчи бўлимда тўхтаб қолдик. Танаффусда эса бу ҳақда йигитларга айтдим. Бир гол фарқига ишониб қолиш жуда нотўғри. Бир киши кўп бўлиб ўйнаш жамоага икки хил таъсир қилиши мумкин. Йигитлар ушбу устунликка тўғри ёндашишди ва охиригача рақибга босим қилишди.

- Ҳужумларни голга айлантириш масаласида оқсаяпмиз...
- Вазиятларга эга бўлаётганимиз яхши, аммо реализация бугун унчалик яхши эмас эди. Рақиб дарвозасида кўп хавфли вазиятлар яратганимиз жамоа вертикал ва агрессив футбол намойиш этаётганидан далолат. Биз янги жамоа туздик, шу сабабли бироз вақт керак. Реализация масаласи ҳам яхшиланади. Барчани Наврўз ва Рамазон ҳайити билан табриклайман.