Таҳлил. Хомяковнинг режаси иш берди. "Бургутлар"нинг андижонча ғалабаси ҳақида

Тошкентда шу куни ҳамма нарса ажойиб эди. Об-ҳаво футбол ўйнайдиган даражада супер, стадиондаги муҳитга алоҳида тасаннолар. "Жар" стадионида эса "бургутлар" парвоз қилди.

Тарих яратилган оқшом

"Пахтакор" ўз тарихида биринчи маротаба Тошкентда "Андижон"га мағлуб бўлди. Жамоалар шу кунгача пойтахтда 28 маротаба учрашишган бўлиб, 24 та ўйинда "шерлар" ғалабаси қайд этилган. 4 та учрашувда томонлар муроса кўчасини танлаган. Яна бир факт шуки, "бургутлар" 26 йилдан сўнг рақиби дарвозасига 3 та гол урди. Бундай ҳолат сўнгги бор 1999 йилги мавсумда "Пахтакор" стадионида бўлган ва унда 3:3 ҳисобидаги дуранг натижа қайд этилган. 

"Андижон" рақибини ўз услубида енгди 

Кеча ҳамкасбимиз Абдулвосит Бектемиров матбуот анжуманида мураббийга "Андижон" 15 йил олдин ҳам "Пахтакор"га қарши ҳимоявий ўйнаганини таъкидлади.  Тўппа-тўғри жойида берилган савол. Бу нарса кеча кутилган эди, кейин ҳам бўлади. Ўйин давомида ҳам Хомяков тактикаси, имзоси яққол билиниб турди. Бунга қарши тактика, режа ишлаб чиқиш Морейранинг зиммасида турган эди. "Бургутлар" кеча ўз режаларидан ортиқча ташқарига чиққани йўқ ва буни рақибига ўтказа олди ҳам. Улар урган 3 та голнинг 2 таси стандарт вазиятлардан сўнг бўлди. Бурчак, жарима тўплари, юқоридан келадиган тўпларда ютиб чиқиш Хомяков жамоасининг муҳим фишкаси ва устун нуқтаси эканлигини биласиз. Лекин буни португалиялик билмади ва унга қарши керакли қуролни ишлаб чиқмади. Аввал айтганимиздек Педру Морейра шогирдлари асосан тўп назоратига эътибор қаратяпти, тўп билан олдинга юрмоқда. Кеча ҳам улар бу борада улар катта фарққа эга чиқишди, 71 фоиз. Гап эса бунинг ғалабага етарли бўлмаётганида. Жамоа иштирокидаги ўйинларда айнан рақиблар ўзига мослаштириб олмоқда, ўзининг устун тарафи, режаларини ўтказа оляпти. "Андижон"да эса мағлубиятсиз серия давом этади. Жамоа бу йил етакчилар "Насаф", "Навбаҳор"дан сўнг эса Тошкентда "Пахтакор"дан очко тортиб олди. 9 очкодан 5 тасини ўз даражасидан нисбатан баландроқ жамоалар билан учрашувларда қўлга киритди. 

Морейра манзилига маломатлар

Жаноб Морейра "Пахтакор"дек тўп билан ўйнашни яхши кўрадиган жамоага 80 фоиз рақиблар иккинчи рақамни танлайди ва худди "Андижон" қилган ишни қилади. Бу эса уларнинг айби эмас, чорани топа олмаётган сизнинг айбингиз. Футболчилар майдонда сизнинг кўрсатмаларингиздан келиб чиқиб ҳаракат қилади. Фактларга қараймиз. 

- "Шерлар" 5 та турда 4 та мағлубиятга учради ва бу тарихдаги энг ёмон стартлардан бири амалга ошиб бўлди. 

- 4 йилдан сўнг Жиззахда "Сўғдиёна"га 3 очко совға қилинди. 

- "Пахтакор" 8 йилдан кейин ўз майдонида "Динамо"га енгилди. 

- "Андижон" Тошкентдан ғалаба билан қайтди. 

Бу кетишда бирин-кетин ҳамма тарихлар қайд этиб бўлинади (шекилли). 

Водийдан қочиб водийга 

Жамоа уйда водий жамоаси қаршилигини енга олгани йўқ, энди улар яна водийга аниқроғи Фарғонага сафар қилишади. "Нефтчи"нинг охирги ўйинларидан келиб чиқсак 3 очкони бериб юбормаслиги эҳтимоли катта. "Андижон" майдонига Вадим Абрамов "Динамо" билан келади, кейин эса Жиззахга сафар қилинади.