Тачмурод Агамуродов: "Ҳар икки голда ўзимизнинг айбимиз бор"
22 май 2023 22:37
Янгиликлар

Тачмурод Агамуродов: "Ҳар икки голда ўзимизнинг айбимиз бор"

Coca-Cola Суперлигасининг 11-туридан ўрин олган "Андижон" - "Қизилқум" (2:0) учрашувидан сўнг меҳмонлар бош мураббийи Тачмурод Агамуродов матбуот анжуманида иштирок этди.

Ўйин ҳақида

- Ўйин ҳақида нимани айтиш мумкин, жамоамиз йигитлари бугун ёмон ўйин кўрсатишмади. Ҳар икки гол ўз хатоларимиз эвазига урилди. Биринчи гол жарима зарбасидан сўнг юзага келди. Иккинчисида футболчимиз ўз жарима майдонимиз ичкарисида орқадан қўполлик ишлатди. Шунингдек, бизнинг голимиз ўйиндан ташқари холат эвазига инобатга олинмади.

Мен ўйинолди тайёргарлик жараёнида футболчиларга карточкалардан эҳтиёт бўлишлари ҳақида айтаяпман. Бироқ биз ҳар ўйинда карточкалардан қутулмаяпмиз.

Албатта "Андижон" жамоасини ғалаба билан табриклаймиз, келгуси тур ўйинларида ҳам омад ёр бўлсин.

- Иккинчи бўлимда ўйинга қўшилган футболчининг яна захирага олиниши сабаби нима?

- Ойбек Нурматов ёмон ўйнагани учун захирага олинмади. Айни ўша вазиятда бизга бош билан яхши ўйнайдиган футболчи зарур эди. Биласиз, "Андижон" стандарт вазиятларга алоҳида ёндашади, иккинчи қаватда ҳам яхши ўйин намойиш этади. Биз айнан бош билан яхши ўйнайдиган футболчини майдонга тушириб, шу хавфни олдини олмоқчи бўлдик. Такрорлайман, Ойбек Нурматов ёмон ўйнагани учун захирага олинмади.