Отабек Нарзуллаев: "Суперлига тезлигига тезроқ кўникишимиз керак"

- Ўйин ҳақида фикрингиз?

- Ўйин борасида йигитларга эътироз йўқ, ҳамма яхши ўйин кўрсатди. Фақат футболда шундай гап бор: сен урмасанг, сенга уришади. Бугун ҳам шундай бўлди. Тезликда озгина ютқазяпмиз, умуман олганда футболчилар яхши ҳаракат қилишди.

- Жамоангиз тўпни кўп назорат қилди, лекин зарбалар ниҳоятда кам берилди. Адашмасам, фақат битта зарба. Бу нима билан боғлиқ?

- Тўғри савол. Биз охирги зарбани беришда кечикдик. "Қизилқум" яхши ҳимояланди ва зарба бериш имконини бермади. Камчиликлар устида ишлаймиз. Яна бир бор қайтариб ўтаман: тезликка кўникишимиз керак. Қишки йиғинни ўзимизда ўтказдик, Туркияга бормадик, ўртоқлик учрашувларини асосан Пролига клубларига қарши ўтказдик. Шунинг ҳам таъсири бор деб ўйлайман. Барибир Пролига билан Суперлиганинг оралиқ даражаси анча катта. Шунинг учун биз тезроқ Суперлига жамоаси каби ўйнай бошлашимиз керак. Суперлига учун адаптация жараёнини бошдан кечиряпмиз. Яхши футболчиларни йиғдик. Таркибимиз ўтган йилга нисбатан анча яхши. Фақат тезлик етишмаяпти.

- Жамоа бош мураббийи Игорь Суров бетоб эканлиги айтилди. Бугунги ўйинга таркиб ва тактикани ким танлади?

- Игорь Суров - жамоамиз бош мураббийи, барибир таркиб ва тактика унинг маслаҳати билан тузилади.

- "Машъал" уч турдан бери ҳар иккала таймда гол ўтказяпти.

- Бу концентрация билан боғлиқ. Диққатни бир жойга жамлай олмаяпмиз.

- Жамоангизда легионерлар бор ва лекин улар захирадан майдонга тушяпти.

- Футболда мураббий кимни тайёр деб билса шуни ўйнатади. Бугун ҳужумда Влатко билан Хумоюнни синаб кўрдик. Футболда яна шундай гап юради: агар ҳужумчи қаторасига икки ўйинда гол ура олмаса, демак нимадир нотўғри кетяпти. Ҳар томонлама ишлашга ҳаракат қиляпмиз. Легионерларни ҳам Суперлигага кўниктиряпмиз, чунки улар Суперлига даражаси ва тезлигини ҳали билмайди. Улар ҳам мослашиш жараёнини бошдан кечирмоқда. Бизда бир-бирининг ўрнини ёпа оладиган футболчилар кўп. Таркиб борасида муаммога дуч келмаймиз деб ўйлайман.

- Жамоангиз уч турда 7та гол ўтказди. Дарвозабонларда рақобат борми?

- Бу фақат дарвозабон хатоси эмас. Бутун жамоа хатоси деб биламан. Ҳозирги футболда бутун жамоа ҳимояланади ва бутун жамоа ҳужумга чиқади. Ўтказилган голларда ҳамманинг айби бор.

- Умуман олганда жамоангиз ёмон эмас. Шунчаки омад келмаяпти деб ўйлаймиз. Кейинги ўйинларда омад тилаймиз. 

- Яхши тилак учун раҳмат. Биз ҳам шу ҳақда ўйлаяпмиз, ўз вақтимизни кутяпмиз. Бизга битта ғалаба керак. Яна бир бор айтаман, биз кучли жамоалар билан деряли ўртоқлик учрашувлари ўтказмадик. Суперлигадан фақат "Динамо" билан ўйнадик, қолган жамоалар Пролига вакиллари бўлди. Йиғинни яхши ўтказдик, фақат спарринг рақиблар унчалик кучли эмасди. Чемпионат даражаси барибир бошқа. Озгина шу томондан қийналяпмиз.

- "Машъал" ҳар йил бошида "Қизилқум" билан назорат баҳси ўтказарди. Лекин бу йил шу ўйин бўлмади.

- Чунки режалар бошқа-бошқа бўлди. Биз шу ерда қолдик, "Қизилқум" эса Туркияга кетди. Агар "Қизилқум" ҳам шу ерда бўлганида албатта ўртоқлик учрашуви ўтказган бўлардик.

- Клубнинг хориж йиғинига чиқмагани ва кучли жамоалар билан ўртоқлик учрашуви ўтказмагани молиявий ҳолатга бориб тақалади. Ҳозирги кунда маошлар ва клуб смеаси стабил ҳолатдами?

- Ҳар томонлама яхши. Қаердадир ушланиб қолиш бўлиши мумкин, лекин футболчиларнинг ўз вақтида ойлик олиши ва бошқа жиҳатлар ҳар томонлама яхши бўляпти. Бизда шароит яхши. Фақат ўзимизни кўрсатсак бўлгани.