"Биз уч кун аввал ўз уйимизда ўйнагандик. Тикланиш учун вақт йўқ эди. Қийин бўлишини билардик. Тошкентга етиб келиш ҳам кўп вақт олди. Иккинчи бўлимда сустлашиб қолдик. Жисмоний жиҳатдан тикланиб олиш қийин. Лекин ҳолатимиз шу. Барча жамоалар шундай зич тақвим остида ўйнамоқда. Жанговар ва қизиқарли ўйин бўлди. Яхши имкониятлар икки жамоада ҳам бўлди. Натижа адолатли бўлди дея оламан", - деди Сергей Токов бугунги баҳс ҳақида.
- Ёмғирли об-ҳаво ўйинга қанчалик таъсир ўтказди деб ўйлайсиз?
- Катта таъсири бўлмади. Майдон идеал ҳолатда. Бундай майдонда мазза қилиб футбол ўйнайсиз. Йигитлар футболдаги биринчи мавсумини ўтказишмаяпти-ку. Майдон нам эканлиги ва тўп билан бироз бошқачароқ муомала қилиш кераклигини билишарди. Режамизни ўзгартирмагандик.
- "Хоразм"да сунъий қопламали майдон. Бир ўйинни сунъий қопламада ўйнаб, иккинчисини табиий майдонда ўйнаш қанчалик фарқ қилади?
- Очиғини айтаман, бироз қийин. Биз учун қийинроқ. Рақибларимиз фақатгина бир ўйинни сунъий қопламада ўтказишса, сунъий ва табиий майдонда кетма-кет ўйнаяпмиз. Кўникиб кетиш осон эмас. Агар имкон бўлса, ўйиндан бир ҳафта олдин табиий майдонда машғулот ўтказамиз. Ҳозир эса вақт умуман йўқ. Шу сабаб бироз муаммо бўлмоқда. Сунъий майдонда ўйнаганлар кўпроқ чарчашади. Бу эса тикланиш учун кўпроқ вақт талаб этади. Футболчиларга ўзим истаётгандек юклама бера олмаяпман. Имкон қадар кўпроқ дам олиб, ушбу муаммони бартараф этмоқчимиз. Жароҳатлар сони кўпайса керак. Албатта, қийинчиликлар бор, аммо имконсиз вазиятларнинг ўзи бўлмайди.
- Бугун жамоангиз бир очко қўлга киритдими ёки икки очко йўқотдими?
- Биз ҳисобда олдинга бораётганимизни ҳисобга олсак. Икки очко йўқотдик деб айтсам бўлади. Лекин ўйин суратига назар ташласак. Шунингдек, ўйин сўнгида рақиб устунликка эга бўлганини ҳисобга олсак, бир очкони қўлга киритдик десак бўлади. Ҳозир ҳиссиётларга берилиб, бир нима дейиш қийин. Натижадан кўнглим тўлди. Йигитлар намойиш этган ўйиндан қониқдим. Рақиб ҳисобни тенглаштириб олганидан сўнг ҳисобда олдинга чиқиб олиш учун етарли вақт бўлди.
