Саудия Арабистони бош мураббийи: "Биз кундан кунга кучайяпмиз"

Араблар яқинда Африка вакили Жазоирга қарши ўртоқлик учрашуви ўтказиб, 2:0 ҳисобида ғалаба қозонишди. Ўйинда Салман Ал Фараж билан Яҳё Ал Шеҳри томонидан киритилган голлар саудияликларга ғалаба келтирди. Қизиғи шундаки, бу ўйинда Саудия 63 фоиз тўпга эгалик қилди, бироқ рақиб дарвозаси томон атиги икки бор аниқ зарба йўллаб, иккаласи ҳам голга айланди.

Ўйиндан кейин интервью берган саудияликлар устози Хуан Антони Пиззи жамоаси кундан кунга кучаяётганини айтиб ўтди:

- "Биз яхши ўйнадик. Жамоамизда тартиб бор ва ўйинчилар ўзларини хотиржам ҳис қилмоқда. Майдонга тушгач, ҳамма нима қилиш кераклигини билади. Тўғри, биз бугун Жазоирнинг иккинчи таркибига қарши курашдик, лекин бу менинг муаммоим эмас. Улар ҳам Ватан учун ўйнашди, шуни унутмаслик лозим. Мен учун натижа ҳозир муҳим эмас. Асосийси ўз ўйинимизни кўрсатсак бўлгани".

- "Учрашувнинг биринчи бўлимида Жазоир яхши ҳаракат қилди. Бироқ биринчи тўпни киритгач, ўзимизга бўлган ишонч ортди. Умуман олганда, ўйин яхши кечди. Энди навбатдаги ўртоқлик учрашувини 15 май куни Грецияга қарши ўтказамиз".