"Қўқон-1912" икки футболчиси билан шартномани узайтирди

Ўтган мавсумдаги ўйинлари билан мухлисларнинг ҳурматига сазовор бўлган ярим ҳимоячи Фарҳод Мираҳматов "Қўқон-1912" билан келишувини яна 1 йилга узайтирди. Шунингдек, жамоа ҳимоячи Александр Мерзляков билан янги 1 йиллик шартнома тузди.

"Биринчи навбатда, барчага кириб келаётган янги 2024 йил муборак бўлсин. Келаётган йил барча учун омадли ўтишини тилаб қоламан. "Қўқон-1912" жамоаси билан янги шартнома имзолаганимдан жуда ҳам хурсандман. Жамоа билан 8 йилдан бери биргаман ва Қўқон мен учун иккинчи уйимга айланиб қолган деб айтсам хато бўлмайди. Келаси йил "Қўқон-1912" жамоаси ҳар томонлама кучайишига ҳаракат қиламиз ва Про лигада биринчи ўринни қўлга киритиб, Суперлига йўлланмасини қўлга киритамиз", – деди Мерзляков.

Маълумот ўрнида, Мираҳматов ўтган мавсум қўқонликлар либосида 14 та ўйинда қатнашган бўлса, Мерзляков 21 та ўйинда майдонга тушиб, 1 та гол ва 1 та голли пасга муаллифлик қилди.