Погба Моуринью ҳақида: "Муносабатларимизни тушуниб бўлмасди, барчаси қандай ёмонлашиб кетганини тушунолмайман"

"Ювентус" ярим ҳимоячиси ва "Фенербахче" бош мураббийи "Манчестер Юнайтед"да 2016 - 2018 йиллар давомида бирга ишлаган. Ўша даврда уларнинг муносабатлари бир мунча ёмонлашганди: Моуринью Погбани жамоанинг вице-сардори мақомидан маҳрум қилган ва бошқа футболчиларнинг олдида уни "вирус" деб атаганди.

"Бизнинг муносабатларимиз йигит ва қиз ўртасидаги муносабатга ўхшарди. Биз мунтазам равишда бир уришардик, бир ярашардик. 

Ҳаммаси ажойиб бошланганди, айнан у мен Манчестерга қайтишимда муҳим роль ўйнаган омиллардан бири эди. У билан суҳбатдан кейин қайтишга қарор қилгандим.

Барчаси нима учун ёмонлашиб кетганини, келишмовчиликлар юзага келганини тушуна олмадим. Сабаби жанжалларни мен бошламаганман.

Биз кўплаб мураббий ва футболчиларда бўлгани каби қайсидир масалалрда турли қарашларга эга эдик. Аммо уни қаттиқ ҳурмат қиламан. Агар уни эртага кўриб қолсам, қаттиқ қучоқлардим. Кун келиб барибир иккимиз ўтириб, барчасини гаплашиб олишимиз керак бўлади", – деди Погба.