Пабло Таборда: "Месси бизни кузатиб боради. Агар нариги ярим финалчилар биздан кейин ўйнаганда, финалдаги рақиб сифатида Бразилияни танлаган бўлардим"

"Тўғриси, Францияга қарши оғир ўйин ўтказдик. Анча машаққат чекдик. Аммо ғалаба қозонишни уддаладик. Эндиликда Бразилиядан реванш олишга ҳаракат қиламиз.

Турнир давомида кўп гол ўтказиб юбордик, бу хавотирли бўлиши мумкин. Бироқ финал буткул бошқача бўлади ва футзалчилар кўпроқ куч сарфлашиб, буткул бошқача ўйин намойиш этишади. Шу боис бу бизни ташвишга солмайди.

Футболни оладиган бўлсак, Месси бошчилигидаги Аргентина терма жамоаси амалдаги жаҳон чемпиони ҳисобланади. Умид қиламанки, биз ҳам улар қилган ишни такрорлаймиз. Месси билан суҳбатлашиш насиб қилмаган, лекин аминманки, у футзални диққат билан кузатиб боради, бунга Instagram саҳифасида жойлаган футзалга оид постлари исбот бўла олади. 

Шуни таъкидлаш жоизки, биз кетма-кет учинчи маротаба жаҳон чемпионати финалида ўйнаймиз. Аргентиналик футзалчи учун бу шараф.

Агар Бразилия биздан бир кун кейин Украинага қарши ўйнаганда, мен ҳам финалдаги рақиб сифатида Бразилияни танлаган бўлардим. Чунки Аргентина-Бразилия қарама-қаршилигидан кўра шиддатли ва мароқлироқ ўйин йўқ, бунақаси камдан-кам учрайди. Биз бундан завқланамиз, нима бўлишини эса Худо билади", Таборда.

Эслатиб ўтамиз, 6 октябрь куни Аргентига жаҳон чемпионати финалида Бразилия билан тўқнаш келади.

Оқил Абдубарноев суҳбатлашди.