Ўзбекистон футбол ассоциацияси ОФК мураббийлик конвенциясининг Про даражаси ва ОФК Elite Youth дастурининг 3 юлдузли даражаси билан тақдирланди. Elite Youth 3 юлдузли даражаси кенг доирадаги хизматлар, юқори даражадаги инфратузилма ҳамда муваффақиятли натижалар учун тақдим этилади.
Шунингдек, Ўзбекистонда мураббийлар учун ОФКнинг Про лицензияларини тақдим этувчи ўқув-курсларини давом эттиришга имкон берадиган махсус диплом топширилди. Дипломларни ОФК раҳбари Шайх Салмон бин Иброҳим Ал Ҳалифадан ЎФА биринчи вице-президенти Равшан Ирматов қабул қилиб олди.
