Бу тарих марказида Кот-д'Ивуар миллий қаҳрамони ва Германия Бундеслигасида ўз ўрнига эга бўлган ҳужумчи – Себастьян Аллер туради.
Қуйида футбол тарихидаги энг ёрқин матонат ҳикояларидан бирини ҳавола этамиз.
2022 йилнинг ёзида Германиянинг "Боруссия Дортмунд" клуби Эрлинг Ҳоланднинг ўрнига "Аякс"дан Себастьян Аллерни катта умидлар билан сотиб олади. У клуб тарихидаги энг қиммат трансферлардан бирига айланади. Бироқ шартнома имзоланганидан саноқли кунлар ўтиб, Швейцариядаги мавсумолди йиғинлари вақтида Аллер ўзини ёмон ҳис қила бошлайди. Тиббий текширувлар бутун дунё футбол оммасини ларзага келтирган натижани кўрсатади: Аллерда саратон (онкологик) аниқланади.
Энг юқори спорт формасига кирган, фаолиятининг чўққисида турган 28 ёшли ҳужумчи учун футбол иккинчи даражали бўлиб қолади. Энди у яшил майдонда эмас, шифохона палаталарида ўз ҳаёти учун курашиши керак эди.
Германиядаги даволаниш жараёни Аллер учун ҳам жисмонан, ҳам руҳан ўта оғир кечади. У икки марта мураккаб жарроҳлик амалиётини бошдан кечиради ва тўрт курс кимётерапия олади.
Бу даврда бутун Германия футболи клублар рақобатини унутиб, Аллер атрофида жипслашади. "Боруссия"нинг машҳур "Сариқ девор" (мухлислар трибунаси) ҳар ўйинда уни қўллаб-қувватловчи баннерлар кўтаради. Унинг сочи тўкилган, аммо юзида табассум билан тушган суратлари миллионлаб инсонларга умид бағишлайди.
Шифокорларнинг саъй-ҳаракатлари ва Аллернинг кучли иродаси ўз натижасини беради. 2023 йилнинг январь ойида у саратонни бутунлай енгиб, машғулотларга қайтади.
Унинг қайтиши шунчаки рамзий эмас эди. У "Боруссия" сафидаги илк расмий голини айнан 4 февраль – Бутунжаҳон саратонга қарши кураш кунида киритади. Бу гол бутун стадионни ва телеэкран ортидаги томошабинларни кўзёшга тўлдирган тарихий лаҳза эди.
Аллернинг ҳақиқий триумфи Германиядан ташқарида, ўз ватанида давом этади. 2024 йилги Африка миллатлар кубоги айнан Кот-д'Ивуарда бўлиб ўтади. Турнир бошида жароҳат сабаб ўйнай олмаган Себастьян, ҳал қилувчи плей-офф босқичларида майдонга қайтади.
Ярим финалда Конго ДР дарвозасига ғалаба тўпини киритган Аллер, финалда Нигерияга қарши ўйинда (2:1) ҳам ҳал қилувчи олтин гол муаллифига айланади. Саратон билан курашиб, ўлим ёқасидан қайтган йигит ўз миллий терма жамоасига Африка чемпионлигини тақдим этади. Унинг ўйиндан сўнг интервью бераётиб йиғлаб юборгани мусобақанинг энг таъсирли кадрига айланган эди.
Эртага, 21 июнь куни бўлиб ўтадиган Германия ва Кот-д'Ивуар учрашуви мана шундай буюк тарих фонида ўтади. Бир томонда Аллерга ҳаётга қайтишда чексиз ёрдам берган, унинг энг оғир кунларида ёнида турган ва юқори даражадаги тиббиётни тақдим этган Германия жамияти, иккинчи томонда эса унинг юраги, ватани ва унга афсонавий мақомни берган Кот-д'Ивуар халқи саф тортади.
ЖЧ-2026'ни Allplay'да томоша қилинг — CHAMPIONATASIA промокоди билан 45 кун бепул
Промокодни фаоллаштириш ҲАВОЛАСИ
Оқил Абдубарноев тайёрлади.
