Осиё Кубоги-2019. ОФК регламентни ўзгартирди. Ўзбекистон 2-саватчада бўлади

Қитъа чемпионатида илк бор 24та терма жамоа иштирок этади. Ушбу Осиё Кубогига 4 май куни қуръа ташлаш маросими бўлиб ўтади. Дубай шаҳридаги "Armani Hotel" меҳмонхонасида 24та жамоа гуруҳларга ажратилади.

ОФК қуръа вақтида жамоаларни саватчаларга ажратиш тизимига ўзгартириш киритди.

Олдинги қоидага кўра терма жамоалар 12 апрель куни чиқадиган ФИФА рейтинги бўйича 4та саватчага бўлиниши керак эди. Ўзбекистон унга кўра 3-саватчада бўларди.

Бугун чиқарилган янги қарорга кўра ЖЧ-2018 саралаши сўнгги босқичига чиққан 12та терма жамоа 1 ва 2-саватчада, қолган 12та жамоа 3 ва 4-саватчада бўлиши маълум бўлди.

Шу тариқа қуйидаги 12та жамоа дастлабки 2та саватчада бўлади: БАА (мезбон), Қатар, Жанубий Корея, Япония, Таиланд, Саудия Арабистони, Австралия, Ўзбекистон, Эрон, Сурия, Ироқ, Хитой.

Қуйидаги 12та жамоа эса 3 ва 4-саватчада бўлади: Ҳиндистон, Ливан, Иордания, Вьетнам, Фаластин, Уммон, Баҳрайн, Туркманистон, Қирғизистон, КХДР, Филиппин, Яман.

Ўзбекистон терма жамоаси 12 апрель кунги ФИФА рейтингига кўра 2-саватчадан ўрин олиши аниқ.