Олий лига. "Қўқон-1912" ғалабасиз сериясига барҳам бера оладими?

Олий лига тақвимидан бугун тўртта учрашув ўрин олган. Шулардан бири Фарғонада бўлиб ўтади ва "Нефтчи" ўз майдонида "Қўқон-1912"ни қабул қилади. 

Олий лига, 11-тур. 

"НЕФТЧИ" - "ҚЎҚОН-1912"

Бошланиш вақти: 19:00

Ҳакам: Вадим Агишев

Турнир жадвалидаги ўрни: "Нефтчи" 8-ўрин (15 очко), "Қўқон-1912" 15-ўрин (6 очко).

Очколар орасидаги фарқ: 9.

Таъриф: Бир сўз билан айтганда, водий дербиси. Бундай ўйинларда кимнинг қайси ўринда бораётгани катта аҳамият касб этмайди. Иккала жамоа ҳам ғалаба учун охиригача кураш олиб бориши турган гап. "Нефтчи" ўтган тур сафарда "Пахтакор"ни мағлуб этиб, кайфиятини анча яхшилаб олди. "Қўқон-1912" эса ўз майдонида "Локо"га мағлуб бўлди. 

Факт: "Нефтчи" охирги иккита ўйинни ғалаба билан якунлади. Ўз майдонида шу пайтгача тўртта учрашув ўтказган фарғоналиклар шундан иккитасида ғалаба қозониб, бир марта дуранг ўйнаб, бир бор мағлуб бўлишди. "Қўқон-1912" эса қаторасига еттита учрашувдан бери ғалаба қозона олмаяпти. Жамоа ҳатто дуранг қайд эта олгани йўқ. Бугун қўқонликлар ушбу нохуш анъанага барҳам бера олишадими? Буни эса албатта ўйин ва вақт кўрсатади.