Йўлнинг катта қисмини — 5200 км масофани Саҳрои Кабир орқали пиёда босиб ўтишга тўғри келган: сув ва озиқ-овқат етишмаган, одамлар эса йўлда касалликка чалиниб, вафот этишган
Испания чегарасига мўъжиза туфайли етиб келган Мария эри билан девордан ошиб ўтган, шундан сўнг улар чегарачилар томонидан ҳибсга олинган
Ганага қайтариб депортация қилмасликлари учун Мария ва унинг эри ўзларининг барча Гана ҳужжатларини йўқ қилиб юборишган ва Либериядаги урушдан қочишаётганини айтиб, ёлғон гапиришган — Испания уларга бошпана берган
Мария Испанияга келганидан кейингина ўзининг уч ойлик ҳомиладор эканлигини билган. Улар Бильбао шаҳрига бориб қолишганида, дастлабки вақтларда руҳоний Иньяки Мардонес ушбу жуфтликка кийим-кечак, мебел ва озиқ-овқат маҳсулотлари билан ёрдам берган
1994 йилнинг июнь ойида Мариянинг тўнғич фарзанди дунёга келган: унга руҳонийнинг шарафига Иньяки деб исм қўйишган. Кейинчалик бу бола "Атлетик" клуби афсонасига айланди: Иньяки Уильямс жамоа сафида 510 та ўйин ўтказди
2002 йилда Мариянинг иккинчи ўғли — Нико туғилди: аёл бир вақтнинг ўзида учта жойда ишларди. Сменалардан бири — аэропортдаги фаррошлик иши эрталаб соат 5 да бошланарди: жамоат транспорти у қадар вақтли ишламагани сабабли, Мария уйидан аэропортгача бўлган 9 км масофани пиёда босиб ўтарди
Кунларнинг бир куни Мария уйига қайтиб, тўланмаган ҳисоб-китоблар туфайли оиланинг суви ва чироғи ўчириб қўйилганини кўради ва йиғлаб юборади. Ўшанда ёш Иньяки: "Ойижон, йиғламанг. Мен албатта футболчи бўламан", — дейди
Мария ишда бўлган вақтларда Иньяки Никога нонушта тайёрлар, уни мактабга кузатиб ва олиб келар, футбол ўйнашни ўргатар эди. Шу сабабли Нико Иньякини нафақат ака, балки футболдаги устози ва ҳатто отасидек қабул қилади
Якунда Иньяки ва Никонинг қатъияти ҳамда иқтидори оилани қашшоқликдан олиб чиқди: икки ака-ука узоқ йиллар давомида "Атлетик" клуби етакчиларига айланишди — ҳозирда Нико йилига 10 миллион евродан кўпроқ маош олмоқда
Кеча Нико Уильямс Испания терма жамоаси сафида Аргентинага қарши кечган финалнинг овертаймида ғалаба голига ассистентлик қилиб, жаҳон чемпионига айланди. Иньякининг ўзи ҳам ушбу мундиалда иштирок этди — у Гана терма жамоаси шарафини ҳимоя қилди.
