"Нефтчи" чемпион бўлган охирги мавсумда ўзбек ва дунё футболи қандай эди?
11 ноя 2025 15:46
Янгиликлар

"Нефтчи" чемпион бўлган охирги мавсумда ўзбек ва дунё футболи қандай эди?

Фарғонанинг "Нефтчи" жамоаси жорий мавсумда ўзининг тарихдаги 6-чемпионлигини қўлга киритишга яқин турибди.

Ўзбек футболи тарихидаги ёрқин жамоалардан бири сўнгги бор 2001 йилги мавсумда чемпионат олтин медалларига эга чиққан. Шундан бери орадан 24 йил вақт ўтди. Бош соврин узоқ йиллар Тошкентда "Пахтакор", "Бунёдкор", "Локомотив" қўлида юрди. Кейин эса ўтган йили "Насаф" уни ўзиники қилди. Бу мавсумда "Нефтчи" яқин келяпти.

"2001 йил 9 ноябрь. Ўша куни “Нефтчи” аслида 20 июнь куни ўтказилиши лозим бўлган 17-турнинг қолдирилган учрашувида Тошкент вилоятининг “Дўстлик” жамоасини қабул қилди. Ғалаба Юрий Саркисян бошчилик қилаётган жамоанинг тарихда 5-бўлиб олтин медалларга эга чиқишини англатарди. Буни яхши англаган “Нефтчи” дастлабки дақиқалардан олдинга ташланди. Стадионни тўлдириб ўтирган ишқибозлар Умид Исоқов ва Мансур Саидов меҳмонлар дарвозасини ишғол қилганда ажойиб хурсандчилик билан голларни нишонлашганди. Айниқса, ўйиннинг охирги дақиқаларида яқинлашиб келаётган чемпионликни нишонлаш эсда қоларли бўлган. Охир-оқибат учрашув 2:0 ҳисобида фарғоналиклар муваффақияти билан тугади. Стадион эса том маънода “портлади”. Ғалаба, чемпионлик шаҳар кўчаларида байрам қилинганди",- дея эслайди ҳамкасбимиз Беҳзод Назаров.

Ўша йили жамоа таркибида Тимур Кападзе, Мансур Саидов порлаб чиққан. Тажрибали номлардан ака-ука Дўрмоновлар, Сергей Ни, дарвозада Георги Забиров асосий ишни бажарган. Қизиғи биз ярим ҳимоячи сифатида таниган Кападзе Саркисян қўл остида ҳужумда ҳаракат қилган, ўша йили Суперлигада 8 та ўйинда 2 та гол урган. Кейинги мавсумда эса "Пахтакор"га йўл олган. Акмал Холматов, Умид Исоқов, Валентин Поддубни, Александр Писаревлар ҳам ғалабаларга муносиб ҳисса қўшган.

“НЕФТЧИ”-2001

Футболчи	Туғ.сана	Ўйин	Гол
Абдумажид Тоиров	05.08.1974	33	4
Акмал Холматов	04.04.1976	33	7
Умид Исоқов	22.12.1978	32	28
Станислав Кудряшов	20.08.1975	32	-
Сергей Ни	03.08.1975	32	15
Владимир Радкевич	31.03.1976	32	5
Анвар Бердиев	11.05.1978	31	14
Георгий Забиров	01.06.1974	31	-24
Рустам Дўрмонов	28.01.1969	26	7
Отабек Шомуродов	21.07.1974	26	-
Абдусамад Дўрмонов	15.11.1965	23	-
Мансур Саидов	01.11.1983	23	3
Валентин Поддубний	05.07.1974	22	1
Шерзод Райимжонов	28.04.1979	19	1
Якуб Меметов	09.07.1975	16	-
Равшан Маталиев	05.03.1978	12	-
Илья Коваленко	17.04.1980	9	1
Темур Кападзе	05.09.1981	8	2
Александр Писарев	21.07.1973	8	3
Виталий Петров	01.04.1974	6	-
Владислав Филиппов	22.05.1971	5	-3
Антон Назариков	02.07.1980	3	-
Мақсуд Тоиров	13.01.1978	2	-

Бундан ташқари 2001 йил футболимизда яна нималар бўлганини кўриб чиқсак.

"Кекса синьора" таркибида илк бор ўзбекистонлик ярим ҳимоячи Илёс Зейтуллаев пайдо бўлди. Бу ўша давр учун ҳақиқатдан ҳам кутилмаган ва шов-шувли воқеаси сифатида қабул қилинган.

Жароҳат сабаб бутсаларини эрта михга илган Шуҳрат Мақсудов хайрлашув учрашувини ўтказган. Стадионга минглаб томошабинлар ташриф буюрган.

Футболимизда янги давр бошланган пайтлар. Ўзбекистон терма жамоасига россиялик Владимир Сальков олиб келинган. Лекин у ҳам Жаҳон чемпионатига олиб чиқа олмаган. Ўзбекистон Япония ва Жанубий Корея мезбонлик қиладиган мундиалдан четда қолган.

Ўзбек футболи афсонаси Миржалол Қосимов "Крилья Советов" таркибида муҳим фигура бўлиб хизмат қилган. У самараликлар сафида 46 та ўйинда 6 та гол урган.

"Нефтчи" ҳужумчиси Умид Исоқов 28 та гол билан чемпионатнинг энг яхши тўпурари сифатида қайд этилган.

Баҳром Ҳакимов устозлигидаги "Насаф" ўша йили Осиё Чемпионлар Кубогидаги юришини бошлаган. Якунда "аждарлар" ярим финалгача етиб борган.

Ўзбекистон терма жамоаси собиқ мураббийи Эктор Купер ЕЧЛда "Валенсия" билан финалда "Бавария"га енгилган. Қизиқ факт, Купер 2000 йилги мавсумда ҳам финалгача етиб келган ва "Реал Мадрид"га енгилган.