Миржалол Қосимов: "Осон голларни ўтказиб ғалабадан маҳрум бўлдик"

- Ўйин ҳақида фикрингиз?

- Дуранг натижага эришдик. Ҳар доим Жиззах жамоаси билан қизиқ ўйин бўлган ва бугун ҳам шундай бўлди. Биз жуда оддий иккита гол ўтказиб юбордик деб ўйлайман. Дориевнинг кутилмаган зарбаси голга айланди. Осон голлар ўтказиб юборганимизни кийим алмаштириш хонасида йигитларга ҳам айтдим. Қарши ҳужумда иккинчи голни ўтказдик. Бу ҳам ачинарли ҳол бўлди. Биринчи голдан кейин ҳисобни тенглаштириб, иккинчи голни ҳам уриб олдик. Нима қилиб бўлса-да, шу ҳисобни сақлаб қолишимиз лозим эди. Аммо насиб қилгани шу экан. Энди кейинги ўйинга тайёргарлик кўрамиз.

- Уч ўйинда бир очко олишни ОКМК учун уятли ҳолат деб ҳисоблайсизми?

- Энди русларда бир гап бор, бандаси сўрайверади, Худо насибага яраша беради. Қийин вазиятга туцшиб қоламиз деб ўйламаганмиз, "Сўғдиёна" ҳам буни ўйламаган. Ўзимизда куч топиб ҳаракат қиляпмиз. Бу баҳона эмас, лекин савияли 13 нафар футболчи жамоамизни тарк этди. Янги жамоани эса бир кунда тузиб бўлмайди. Ҳамма нарсага вақт керак. Мен ютқазишни ёқтирмайман, буни куп бора айтганман. Спорт принципим ҳам охиригача курашиш. Лекин боя айтиб ўтганимдек, ҳаммасига вақт керак. Чемпионат энди бошланди, ҳали йўл узоқ. Мени хурсанд қилаётган жиҳати - жамоамизда шижоат бор, майдонга чиқиб шунчаки тўп тепмаяпмиз, йигитларнинг ҳаракатини кўриб турибман. Албатта, бу уятли, лекин уяладиган жойи йўқ. Агар ишламасдан ётганимизда буни уятли десак бўларди.

- Бугун ОКМК аввалги икки турга нисбатан яхшироқ ҳаракат қилди. Негаки жамоанинг "Бунёдкор" ва "Хоразм"га қарши ўйинларида реализация панд берганди. Бугун эса шогирдларингиз икки бор тўп киритишди. Бугунги учрашувнинг қайси жиҳатларини эътироф этса бўлади ва қайси жиҳатлар устида ишлаш керак деб ҳисоблайсиз?

- Ўзингиз айтиб ўтгандек, биринчи навбатда реализацияни эътироф этиш керак. Иккинчиси, иккинчи бўлимда қўлни туширмасдан ўйнаш. Майдонда кураш охиригача кечади, умуман қўл силтаб қўйиш керак эмас. Хоразмда гол ўтказиб юборгач, ҳаракат қилдик, фақат реализация панд берди. Бугун эса шижоатни ҳам, вазиятлардан фойдаланишни ҳам кўрдик. Охиригача курашишимиз керак, шундагина ижобий натижа бўлади.

- Охирги йилларда ОКМК сиёсати ўзгарганини кўряпмиз. Бу ҳолат жамоани ўртамиёнага айлантириб, совриндорлар қаторидан узоқлаштириб қўймасмикин. Шундай хавотир йўқми?

- Энди буям битта малака. Албатта, биз ҳам пастда юришни хоҳламаймиз. Эскиларнинг гапи бор: осилсанг, баланд дорга осил. Шундай экан, ҳар доим ҳаракатда бўлиш керак. Кейин мукофот ҳам шунга яраша бўлади. Бизнинг мақсад - фақат олдинга ҳаракат. Лекин бунинг учун бу каби ўйинларда ютқазмаслик лозим, бундай голларни ўтказмаслик керак. Юқори ўринни олиш учун ютиш керак.

- Бир кун келиб ОКМКни тарк этганингизда жамоани чемпион қила олмадим деган армон қийнамайдими?

- Ҳозир шунга яқин гапни кийим алмаштиришда хонасида жамоага ҳам айтдим. Ўз пайтида биз ҳам кимнингдир ўрнига футболга кириб келганмиз. Кўп йил футбол ўйнадим, тугатдим ва менинг ҳам ўрнимга бошқалар келди. Чархпалак тўхтаб қолмайди, айланаверади. Кун отади, қуёш ботади, вақт ўтаверади. Лекин Оллоҳ берган вақтни мазмунли ўтказиш керак. Футболда ҳам, ҳаётда ҳам шу.

Ўз пайтида армоним Жаҳон чемпионатига чиқа олмаганимиз бўлганди, мана вақт ўтиб шу даврлар ҳам келди. Терма жамоамиз Жаҳон чемпионатига чиқди. Ҳамма нарса имкониятдан келиб чиқиб қилинади. Бекорга кўрпангга қараб оёқ узат дейишмайди. Ҳаммамиз янада кўпроғини хоҳлаймиз. Футболдаги гаплар биздан олдин ҳам бўлган, биздан кейин ҳам бўлади.

Тўғрисини айтсам, мен келгунимга қадар Олмалиқда болалар футболини ривожлантириш ҳеч кимга қизиқ бўлмаган. Яқинда клуб академияси очилди, болалар футболи учун қадам ташланди, бу ишлар энди-энди йўлга қўйиляпти. Бунга мен ҳам ўз ҳиссамни қўшганимдан хурсандман, аммо бу билан мақтанмоқчи эмасман, қилинган ишларнинг ҳаммаси шу ерда қоалди. Мен ҳеч нимани кўтариб олиб кетмайман. Шу қилинган ишлар бир кун келиб ўз самарасини беради. 

Битта дарахт эксанг, эртага соясида кимдир ўтиради. Биз ҳам қаердадир хато қилгандирмиз, беайб Парвардигор. Ҳаммасига сабр қилиш керак. Машинада кетаётиб, олдиндаги "Дамас" ойнасидаги ёзувга кўшим тушиб қолувди, лотинчада ёзилган экан: "Бир гап бўлар, қайси бирига сиқилай". Хуллас, шунақа гаплар.