- Асабий ва жанговар ўйин бўлди. Бизни қизиқарли ўйин кутаётганди. Бир-бирига мос рақиблардан қизиқарли, очиқ ўйин кутаётгандик ва шундай бўлди ҳам. Ўйин илк дақиқалардан то охиригача асабий ўтди. Ўтган ўйиндаги каби бугун ҳам стандартлардан иккита осонгина гол ўтказиб юбордик. Биринчиси рикошет, иккинчисида эса яхши ижро. Агарда Мустафоев қизил олмаганида, барчаси янада қийинлашиб кетиши ҳам мумкин эди. Йигитлар ўзларига ишонишди. Балки ўйинда ютиб кетишимиз ҳам мумкин эди. Сўнгги дақиқаларда Нодир Абдураззоқовда яхши вазият юзага келганди. Агарда у ўша вазиятдан гол урганида ғалабани илиб ҳам кетардик. Бугун мухлислар учун ҳам қизиқарли ўйин бўлди.
- Ўтказиб юборилган голлардан ҳам кўра Сиз сўнгги дақиқаларда кўпроқ асабийлашдингиз.
- Сиз ҳам эрта-ю кеч жамоа билан юрсангиз, улар билан яшайсизда. Балки бу четдан ғалати кўрингандир. Йигитлар "Бухоро", "Андижон" каби жамоаларга қарши ёмон ўйнашмади. Бугун ҳам ғалабага лойиқ эдик, бироз нимадир етишмади. Шу сабабли ҳар бир ўйинга алоҳида тайёрланиш керак. Майдонга чиққандан кейин ўзини ўзгартириш қийин.
- Жамоанинг ўтган мавсумдаги етакчилари сақлаб қолинмади. Янги футболчиларнинг дастлабки 10 турдаги ўйинларини қандай баҳолайсиз?
- Бу ҳам қизиқарли соҳа, футболнинг бир қисми. Жамоага доим кимдир келади, кимдир кетади. Янгиларга талаб қўйилади, ўргатилади, вазифани бажариш керак. Энг кераклиси - жамоада шижоат, ҳаракат бор. Бизга вақт керак. Йигитлар ёмон ўйин кўрсатмаяпти. Энг муҳими - жамоада курашувчанлик, шижоат бор. Хатони эса ҳамма қилади.
- Бугун жамоа кўплаб қарши ҳужумлар уюштирди. ОКМК гол уришни жуда қаттиқ истади. Бироқ жамоа футболчилари майдонга мослаша олмагандек.
- Айтганимдек, ҳар бир ўйинга алоҳида тайёрланиш керак. Бу ўйин энди тарих. Лекин бундаги ҳар бир элемент ноодатий. Биринчи голдаги рикошет. Танаффусда йигитларга айтдим, биринчи бўлим ғалаби ўтди. Дарвозабон майдонга мослаша олмади, ҳимоячилар ҳам. Бу ҳам ўз сўзини айтади. Балки бироз ишончни чеклаши мумкин. Бир кун олдинги машғулотлардан кейин йигитларга бу стадион учун темир тишли бутсаларни кийишни айтгандим. Футболда барчасини тезда амалга ошириш қийин. Масалан, эртага мактабга борадиган ўқувчи бир кун олдин кечаси тайёрланади. Дарсларнинг номига қараб китобларини олади. Бу ерда мен ҳам ҳал қила олмайдиган жиҳатлар бор. Кўп нарса футболчиларнинг иштиёқига ҳам боғлиқ. Қизил карточка ҳам ўз-ўзидан келгани йўқ. Майдонга тушгандан кейин барча нарсага эътиборли бўлиш керак ва фақатгина ўйинни ўйлаш керак.
- Гарчи "Динамо" қизил карточкадан кейин тўпни ушлаб туриб, қарши ҳужумларда ўйнаш тактикасида ўйнаган бўлса-да, жамоангиз бир неча қарши ҳужумларни ўтказиб юборишди.
- Амонов тезкор футболчи. Танаффусда футболчиларга рақиблар икки ҳужумчи билан ўйнашини, ҳужумларни қанот орқали амалга оширишини айтгандим. Танаффусда Аҳмадулло Муқимжоновни майдонга тушираётганда барчасини тушунтиргандим. Бироқ унинг фойдали иш коеффициенти жуда паст бўлди. У тўпни қабул қилиб олгандан кейин ҳужумни ривожлантириши керак бўлганди. Шу сабабли ҳар бир ўйинга бошқача ёндашиш керак деб ҳисоблайман.
- 2:2 ҳисобини қандай баҳолайсиз? Бир томондан олиб қарасак, жамоа ҳисобни тенглаштирди. Иккинчи томондан эса жамоа кўплаб ҳужумлар уюштирди.
- Барча ўйинлар шу тариқа ўтмайди-ку.
- Очко қўлга киритилдими ёки йўқотилдими?
- Қўлга киритдик. Мустафоев қизил карточка олмаганда барчаси бошқача бўларди. Биз кўп куч йўқотдик, ғалаба қозонсак бўларди. Олдинда уч кундан кейин ўйин, тақвим тиғиз.
- Вадим Абрамовнинг айтишича, рақибларига омад кулиб боқаётган экан. Рақиб сифатида бу жамоага қандай баҳо берасиз?
- Яхши жамоа. Ижрочилари бор.
- Омад келдими?
- Балки, ҳа. Айтганимдек, бир эпизод барчасини ўзгартирди. Бундай нарсаларни тахмин қилиб бўлмайди. Бу футбол. Барчаси динамикада, одамларнинг хатоси орқали амалга ошади. Ким ҳам хато қилмаслиги мумкин. Энг асосийси - иштиёқ ва охиригача курашиш.
- "Динамо"нинг иккинчи голини шарҳловчи "Қосимов услубидаги гол" деб тарифлади. Ўзбек футболида жаримадан гол уриш Сизнинг муаллифлик ҳуқуқингизга айланган десак ҳам бўлади. Лекин сўнгги йилларда жаримадан гол урувчилар камайиб кетгандек. Нега бундай бўлмоқда?
- Билмасам. Урадиганлар бор.
- Ўтган турда ўғлингиз урди.
- У ҳам рикошет орқали. Ҳозир ҳам чемпионатда бундай голлар кўп. Бизнинг пайтдаги голлар эса тасвирда қолмаган ва йўқолиб кетган.
