Лионел Месси Буэнос-Айрес университетининг фахрий доктори унвонини олди. Тақдирлаш маросими Аргентина футбол ассоциациясининг машғулот базасида, Мессининг миллий терма жамоа сафидаги хайрлашув ўйини арафасида бўлиб ўтди. Чоршанбага ўтар кечаси аргентиналиклар Бенин терма жамоасига қарши ўртоқлик учрашувини ўтказади.
39 ёшли футболчига таълим муассасаси ректори Рикардо Хелпи ва ректор ўринбосари Эмилиано Якобитти диплом ҳамда медални топширди. Шунингдек, тадбирда факультет деканлари ва университет кенгашининг турли бўлимлари вакиллари ҳам иштирок этди.
«Шундай нарсага эришишимни хаёлимга ҳам келтирмагандим. Футболга ва спортда эришган барча ютуқларимга ҳеч қандай алоқаси бўлмаган — балки бордир ҳам — бир нарса. Бундай эътирофга сазовор бўлиш, фахрий доктор эканимни айта олиш — фахрланишга арзийдиган сабаб.
Мен хотиржамман, лекин ўйин яқинлашгани сари ҳаяжон кучайиб бормоқда. Шундай экан, кунни мана шундай эътироф билан бошлаганим бу учрашувни янада ўзгача қилади», – деди Месси.
