Меҳди Тареми: "Жамоадошларимдан 10 нафари пенальти тепишдан бош тортди. Ўзбекистонга қарши пенальтини тепа олмаган футболчидан Жаҳон чемпионатида фойда бормикан?"

Ўзбекистон терма жамоаси Al Ain Cup халқаро турнирида Эронни камчилик бўлиб, пенальтилар сериясида мағлубиятга учратди. Маълумотларга кўра, Эрон термаси сафида ким пенальти тепишини айнан Меҳди Тареми белгилаган, бу ҳуқуқни унга бош мураббий Ғалинои берган. Сериядаги омадсизликдан кейин Тареми жамоадошлари ва умуман Эрондаги вазиятни танқид остига олди.

"Жамоадошларимдан 10 нафари пенальти тепишни истамади ва бундан бош тортишди. Биз икки марта пенальтиларни машқ қилгандик. Ўшанда фақатгина тўрт марта дарвозабонимиз тўпни қайтара олганди. Бугун эса ўша ўйинчилар маъсулиятни бўйниларига олишдан қўрқишди. Тўп бизда бўлганида яхшироқ ўйнашимиз ҳам керак эди. 

Ўзбекистонга қарши пенальтини тепа олмаган футболчидан Жаҳон чемпионатида фойда бормикан?

Нега ўзим тепмадим? Мен шу пайтгача ўз пенальтиларимни тепиб бўлганман. Гап пенальтиларда ҳам эмас, Эрон футбол структураси бузилиб бормоқда", -дейди Меҳди Тареми.

Бундан ташқари, Тареми Эрондаги сиёсий режимни ҳам танқид остига олди:

Охирги 2-3 йилда улар футболни ўлдиришни бошлашди.

"Зобаҳан" ва "Сепахон" ўртасидаги ўйинга қанақасига 2000 киши келиши мумкин? Озоди стадиони тўрт йилдан бери таъмирда? Истиқлол ва Персеполис ҳам 8000 талик стадионда ўйнаши шарт.

Нега? Уларнинг мақсади 50-60 минг инсонни бир ерга тўпланмасликми? Мақсадингиз шу бўлса, биздан нима хоҳлайсиз? Футболни ўлдиришними? Улар Эронда футболни ўлдиришмоқчи, лекин дунё ўз йўлида давом этади, футбол дунёда доимо энг глобал ўйин бўлиб қолаверади. Агар мамлакатда сиёсий низолар бўлса, бунинг учун футболни "гўшт" сифатида қурбон қилишни тўхтатинг. Бизга яхши стадион ва майдон беринг, шундай кейин натижани талаб қилиб олинг", -дейди эронлик футболчи.