Грилиш қўлини жароҳатлаб олганди – у финалда ҳам бармоқларига боғич тақиб тушди – мураббий эса бундан ўз шогирдларини руҳлантириш учун имконият сифатида фойдаланди. Гувоҳлардан бирининг сўзларига кўра, у футболчиларнинг беллашувга тайёрлигини шубҳа остига олиб, фикрини исботлаш учун ўзини ерга ташлаган, қўлини ушлаганча бақириб думалаган ва Грилиш билан содир бўлган жароҳатни кўрсатиб берган. Бу вақтда эса "Coldplay" гуруҳи буни галереядан кузатиб турарди.
Бу Гвардиоланинг ҳайратланарли 10 йиллик бошқаруви давридаги "Сити"нинг яна бир оддий куни эди.
Гвардиола "Манчестер Сити"ни ва Манчестер шаҳрини севиб қолди. Унинг клубдаги ютуқлари, бошдан кечирган лаҳзалари ва унга кўрсатилган қўллаб-қувватлаш – кетишга қарор қилиш у учун жуда оғир бўлганини англатади.
Ўн йиллик фаолияти давомида у ғайритабиий нарсаларни одатий ҳолга айлантирди. Қаторасига тўртта Премьер-лига, қаторасига тўртта Карабао кубоги, ички требл – буларнинг ҳеч бири илгари содир бўлмаган. Чемпионлар дарҳол иштиёқни йўқотиб, кейинги йили жадвалда пастга қулайдиган даврда, етти йил ичида олтита Премьер-лига чемпиони унвони.
Гвардиола даврининг асосий ўйинчиларидан бирига яқин манбанинг таъкидлашича (муносабатларни ҳимоя қилиш мақсадида анонимлик шарти билан) – мураббий бир неча йил олдин қисман АҚШ спорти ва рекордларга бўлган муҳаббати сабабли, қисман эса ўтган мавсумдаги пасайишгача бу мантиқий мақсаддек туюлгани учун 10 та Премьер-лига титулини ютмагунча "Сити"да қолишни ният қилган экан.
У ҳақиқий даҳо, ёввойи, шиддатли, футболга муккасидан кетган инсон сифатида эсда қолади. У билан ишлаган кўпчилик уни яхши кўрарди, баъзилар эса ёқтирмасди. У мураккаб инсон – бир лаҳзада кайфияти юқори, кейингисида эса паст бўлиши мумкин; баъзида футболчиларни илҳомлантириб руҳлантирса, баъзиларни эса совринларга яқин қолганда таркибдан чиқариб ташлаб ҳафсаласини пир қиларди.
Унинг дўсти, "Oasis" гуруҳи гитарачиси ва қўшиқ муаллифи Ноэл Галлахернинг сўзларига кўра, Гвардиола "Сити"даги даврини ҳаётининг энг яхши 10 йили сифатида эслайди.
"Шанба куни ўйиндан сўнг у анча ўйчан эди", – дейди Галлахер "The Athletic" нашрига 16 майдаги Англия Кубоги финалидан кейинги суҳбати ҳақида. "Мен биринчи марта "у кетяпти шекилли" деб ўйладим, чунки у бу давр ҳаётининг энг яхши ўн йиллиги бўлгани ҳақида гапирарди.
"У 45 ёшдан 55 ёшга ўтди, бу инсон ҳаётининг катта ва муҳим даври. Мен ҳозир эллик ёшлардан ошганман, шунинг учун элликка кириш нима эканлигини биламан. Чет элда бўлса-да (гарчи у бу ерни уйим деб атаса ҳам) фаолиятингнинг энг чўққисида шунча вақт ўтказиш ва оилавий ҳаётида баъзи шахсий масалаларни бошдан кечириш – бу у учун катта ўзгариш. Лекин у жуда ўйчан кайфиятда эди. Бир марта бўлса ҳам келажак ҳақида гапирмади ва мен бу балки бир ишорадир деб ўйладим".
У бу ўн йилликни ақл бовар қилмас суръатда яшаб ўтди. Манбалардан бири Гвардиолани футболчилар олдига чиқиб кўрсатмалар бераётганида "Голливуд актёри"га қиёслайди, гарчи у тез-тез фикрини ўзгартириб турса ҳам.
"Унинг футболга бўлган иштиёқини тўлиқ ифодалайдиган бир воқеа бор", – дейди "Сити"нинг требл ютган жамоаси сардори Илкай Гюндоган бошқа бир ҳодиса ҳақида гапираркан. "Бир куни эрталаб Пеп видео хонага ақл бовар қилмас энергия билан кириб келди. Унда қандайдир "янги ғоя" бор эди ва у 45 дақиқа давомида майдонда синаб кўришимизни истаган мураккаб тактик ўзгаришни эҳтирос билан тушунтирди.
"Биз барчамиз диққат билан тингладик, уни тушунишга ҳаракат қилдик ва машғулотга чиқдик, лекин уни амалга оширишга уринганимиздан 45 дақиқа ўтиб, у тўсатдан ҳаммасини тўхтатди. У экранига қаради, бизга қаради ва шунчаки шундай деди: "Ҳозиргина айтган ҳамма гапимни унутинг. Барчасини. Бу бемаънилик эди. Бунинг ҳеч қандай мантиғи йўқ".
"Биз шунчаки лол бўлиб турардик! Одатий "рондо" ўйнашга ва одатдагидек машғулот ўтказишга қайтдик. Лекин бу Пеп эди. У ўзига шунчалик ҳалолки, агар ғоя мукаммал эмаслигини тушунса, уни дарҳол йўқ қилади. Албатта, эртаси куни эрталаб у ҳақиқатан ҳам мукаммал ишлайдиган янги режа билан келди. Бу менга ҳатто дунёдаги энг яхши мутахассис ҳам доимий равишда ўзини сўроққа тутишини кўрсатди".
Гюндоган Гвардиола "Сити"га келганида унинг биринчи трансфери эди, клуб у келишидан анча олдин пойдевор тайёрлаб қўйганди. Кевин Де Брюйне ва Раҳим Стерлинг 2015 йилда шартнома имзоланганида у ҳали "Бавария" мураббийи бўлишига қарамай, у билан маслаҳатлашганди ва у 2016 йилда Эмерик Ляпортга қўнғироқ қилиб, Жон Стоунзнинг келиши режалаштирилганини айтиб, уни шартнома имзолашга кўндиришга уринганди.
Гвардиола билан "Сити Suites"да – Салфорднинг Манчестер маркази ҳисобланган қисмида ёнма-ён яшаган Гюндоган, бирга ўтказган саккиз мавсумдан сўнг собиқ мураббийини "устоз ва дўст" деб билади ва 55 ёшли мутахассис Англиядаги даврида қандай ўзгарганини яхши тасвирлаб бера олади.
"Ўйлайманки, у кўпроқ "инсоний"лашди ва футболчилар билан бироз эркинроқ муносабатда бўла бошлади", – дейди германиялик. "Дастлабки йилларда у 24/7 юқори шиддатда эди, ҳар бир сония мукаммаллик ҳақида эди. Вақт ўтиши билан, айниқса кўпроқ титулларни ютганимиздан кейин, у жамоага кўпроқ ишона бошлади. У баъзида футболчиларга тактик йиғилишдан кўра бироз эркинлик ёки дам олиш куни кўпроқ кераклигини тушунди. Унинг мулоқоти шунчаки доскада фигураларни суришдан кўра, кўпроқ жамоанинг ҳиссий ҳолатига қаратилди".
Гвардиолани тушуниш ҳатто у билан энг яқин ишлаганлар учун ҳам қийин бўлиши мумкин.
"Муносабатларимиз ҳар доим яхши эди", – дейди Гвардиола қўл остида "Сити"да тўртта Премьер-лига титулини ютган ва жамоага икки йил сардорлик қилган Фернандиньо. "Мен доим унинг олдига келардим, қучоқлашиб кўришардим ва баъзи нарсаларни сўрардим, кейин эса ҳурмат билан гаплашишга ҳаракат қилардим. Лекин очиғини айтсам, у бажараётган иш туфайли, баъзида у жуда стресс ҳолатида, баъзида эса хотиржам бўларди. Бу фақат натижаларга эмас, клуб ичидаги кўплаб вазиятларга боғлиқ эди. Албатта, биз содир бўлаётган баъзи нарсалардан бехабар эдик, лекин буни тана тилидан кўриш мумкин эди".
Гвардиола клубга келганида Фернандиньо 31 ёшда эди – у каталониялик билан эртароқ ишлаганида анча яхшироқ футболчи бўлардим деб ўйлайди ва у Гвардиоланинг дастлабки машғулотлари кейинги ўн йилликнинг оҳангини қандай белгилаб берганини тушунтиради.
"Ўшанда оддий 11 га 11 ўйини эди ва одатда машғулотларда биринчи ҳаракат "хўш, ўйинни хотиржам бошлаймиз ва кейин нима бўлишини ўйлаб кўрамиз" дегандек бўларди", – дейди у. "Тўпга биринчи тегинишимиз биланоқ, ким тегингани эсимда йўқ, у ҳуштак чалди, машғулотни тўхтатди ва шундай деди: "Қулоқ солинг, агар сиз шундай ўйнамоқчи бўлсангиз, бунинг иложи йўқ. Биринчи дақиқадан сўнгги дақиқагача бор кучимиз билан ҳаракат қиламиз".
"Хулоса жуда аниқ эди, чунки футболчиларнинг аксарияти ўйин ёки машғулотни шунчаки ўтказиб юборишга ва фақат баъзи вазиятлардагина бор кучи билан ҳаракат қилишга ўрганиб қолганди. Лекин у билан биринчи машғулотдан бошлаб, биринчи ҳуштакдан бошлаб бор кучинг билан ишлашинг керак эди.
"Бу у ҳақидаги биринчи таассуротимиз эди ва шундан сўнг ҳар бир машғулот шундай ўтди".
Тўғри ёндашувга эга бўлиш муҳимлигини у энг биринчи футболчилар йиғилишидаёқ уқтирган эди.
"Биз кириб келганимизда, биринчи кўрган видеомиз Кевин Де Брюйненинг такрорий лавҳаси эди", – дейди Гвардиола билан "Сити"да ўтказган бир мавсумини қадрлайдиган Бакари Санья. "Сити" 2015-16 йилги мавсумнинг сўнгги кунида Мануэль Пеллегрини қўл остида Чемпионлар лигасига йўлланма олганди, "Суонси" билан 1:1 ҳисобидаги дуранг уларга кучли тўртликка киришга ёрдам берганди.
"Аслида биз бундан ҳафсаламиз пир бўлганди, чунки агар сиз рақобатчи бўлсангиз, лигада учинчи ёки тўртинчи ўринни олганингиздан хурсанд бўла олмайсиз. Биз Чемпионлар лигасининг ярим финалига чиққандик, шунинг учун бундан хурсанд бўлиш мумкин эмасди, йўлланмани қўлга киритган бўлсак-да, умидсизлик кучлироқ эди.
"Пеп Кевин Де Брюйне хурсандчилик қилаётган жойида видеони тўхтатди. Ҳакам ҳуштак чалиши билан у кадрни тўхтатди ва фақат Кевин қўлларини, иккала қўлини кўтарганди. Ва у шундай деди: "Йигитлар, менда бир савол бор. Нега фақат Кевин хурсанд бўляпти, сизлар ҳозиргина Чемпионлар лигасига йўлланма олдингиз ва ҳеч бирингиз хурсандчилик қилмаяпсиз? Ҳеч бирингиз хурсанд эмасмисиз? Фақат Кевин хурсандми?"
"У бизга деди: "Мен унга ўхшаган, нимагадир эришганидан хурсанд бўладиган йигитларни хоҳлайман. Бу нормал ҳолат эмас, чунки сизлар нимагадир эришдингиз. Албатта бу сиз кутган нарса эмас, лекин сизлар бу клуб учун жуда муҳим бўлган Чемпионлар лигасига йўлланмани қўлга киритдингиз". У шундай деди: мен сизларни мана шунга, кичик деталларни ҳам нишонлашга ўргатмоқчиман. Шунда мен "янада позитивроқ бўлишга, футболдан ва мана шундай лаҳзалардан завқланишга ҳаракат қилишим керак экан" деб ўйладим".
Гвардиола ўша дастлабки ойларда футболчилар ўртасида яқин муносабатларни ўрнатиш учун кўп меҳнат қилди, маълум хулқ-атворлар одатга айланишини таъминлашга қаратилган қатъий қоидаларни жорий қилди. У футболчилар телефонларига қараб ўтирмасдан бир-бирлари билан гаплашишлари учун Wi-Fi'ни ўчириб қўйди ва улар машғулот базасида нонушта ва тушлик қилишларини мажбурий қилиб қўйди.
У шунингдек, хорижлик футболчиларнинг инглиз тилида гаплашишини талаб қилди, тилни билмайдиганлар Манчестердаги биринчи Рождествога қадар имтиҳон топширишлари керак эди ва у футболчиларнинг вазни борасида жуда қаттиққўл эди.
"Биз вазнимизга эътибор беришимиз шарт эди", – дейди Санья. "Агар вазнимиз 1,5 кгга ортиқ бўлса, унга бу ёқмасди. Сиз таркибдан чиқарилардингиз, керакли вазнга қайтмагунингизча ўзингиз ёлғиз югурардингиз".
Санья ўша кунларни эслаб кулади: "Балки шундан кейингина у сизни яна машғулотларга қўшар – лекин у буни унутмайди".
Гвардиола шунингдек ўз фалсафасининг асосларини ўргатишга киришди, бу шундай кичик ўзгаришлар эдики, футболчиларнинг ўзи уларнинг ўйин услубини бутунлай ўзгартирганини таъкидлашарди.
"Биринчи машғулотда мени ҳайратга солган нарса шу бўлдики, биз 5 га 2 "рондо" ўйнаётган эдик", – дейди Санья. "Бир пайт мен ташқарида эдим, икки футболчи тўпга прессинг қилаётганди ва тўсатдан тўп менга келди ва мен товоним билан, чап томонимдаги ўйинчига тўпни оширдим.
"Ва улар "Бака, марказга" дейишди, лекин мен тўпни йўқотмагандим. Мен ҳайрон бўлдим. У деди: "Бака, марказга ўт". Мен тушунмадим. У тушунтирди: "Товон билан ошириш керак эмас – агар сен олдиндан танангни буриб, чап томондаги ўйинчини кўрганингда эди, товон билан оширишингга ҳожат қолмасди". Мен "Эй, худойим, ҳа, у ҳақ!" дедим". У яна кулади. "Бу жуда кичик нарса, лекин у бутун вазиятни ўзгартириб юборади".
Яқинда Санья ўзининг биринчи мураббийлик иши – Дубайдаги "Банаат" аёллар жамоасини бошқаришдан кетди ва уларни чемпионликка олиб чиқди.
"Мен келганимда улар бироз нолиб, уни ёки буни қилишни хоҳламаётганликларини айтишарди ва улар бирон нарса қилишни истамаса, мен уларга айтардим: "Қизлар, бу мендан эмас, сиз бевосита Пеп Гвардиоладан ўрганяпсиз", – деб кулади у. "Мен буни айтган заҳотим, худо ҳаққи, улар шикоят қилишни тўхтатадилар. "Мен сизларга ўргатаётган нарсалар Пеп Гвардиоладан кўчириб олинган".
Гвардиоланинг биринчи мавсумда ўз усулларини ўргатишга уринганига энг ёрқин мисол – клубнинг севимли юлдуз ҳужумчиси Серхио Агуэро атрофида содир бўлган. У 2012 йилда "Куинз Парк Рейнжерс" дарвозасига киритган сўнгги сониялардаги голи билан биринчи Премьер-лига титулини олиб келиб, аллақачон афсона мақомига эга бўлганди.
У ва Гвардиола биргаликдаги дастлабки икки мавсумда бир неча бор тўқнаш келишган, ўша пайтда жамоага яқин манбаларнинг "The Athletic"га айтишича, Агуэро Гвардиола уни қаттиқ шуғулланмагани ёки иштиёқ билан прессинг қилмагани учун сотмоқчи деб ўйлаган.
Агуэро яқинда "Челси"га ўтишга яқин бўлганини, бироқ клуб бунга тўсқинлик қилганини айтди. Ҳатто 2017 йилнинг ёзида, Гвардиола келганига бир йил бўлганда, у "Сити" раиси Халдун Ал Муборак билан учрашган, унда Агуэрога келажакда ҳеч қандай муаммо бўлмаслигига кафолат берилган. Аммо мураббий ва ҳужумчи ўртасидаги зиддиятлар давом этган, чунки Агуэро катта ўйинларда таркибдан чиқариб ташланарди.
Фернандиньо бу иккиси охир-оқибат қандай қилиб умумий тил топганини тушунтириб беради.
"Бу жараён осон кечди, чунки Пепнинг асосий маҳорати ечим топиш эди", – дейди у. "Агар сизда Агуэро каби ўйинчи бўлса, уни шунчаки ташлаб юбора олмайсиз, ва у буни Агуэро прессинг қилиши учун иккита югуриш амалга оширадиган қилиб жамоани тузиш орқали ҳал қилди, қолган оғир ишларни эса биз бажарардик.
"Масалан, биринчи мавсумда дарвозадан тўп киритилганда, ўйинчилар тўпни ҳали жарима майдончаси ичида қабул қила олмасдилар, шунинг учун улар тўпни жарима майдончасидан ташқарида қабул қилишлари керак эди. Кейин Агуэро иккита югуришни амалга ошириши керак эди. Биринчиси, агар у ҳимоячига борса ва ҳимоячи тўпни дарвозабонга қайтарса, Агуэро у ёққа ҳам югурарди. Шундай қилиб, у дарвозабонни биз турган жойга тўп оширишга мажбур қиларди ва албатта биз у ерда прессинг қилишимизни билардик.
"Пеп жамоани у прессинг қилиши учун иложи борича камроқ югурадиган қилиб тайёрлади ва қолганларимиз анча ёш ва кучга тўла бўлганимиз учун унинг ўрнига ҳам буни бажарардик".
Гвардиоланинг ўзи ҳам биринчи мавсумда ишдан бўшатилишидан қўрққанди. Биограф Марти Перарнаунинг сўзларига кўра, у "Вест Бромвич"га қарши ўйинда ғалаба қозона олмаслик клубни чора кўришга мажбур қилади деган ишонч билан чиққанди. Бу "Сити" унга муваффақият қозониши учун керак бўлган барча нарсани, ҳатто қийин пайтларда ҳам тўлиқ қўллаб-қувватлашни беришга тайёр эканлигини тушунган кунлардан олдин эди.
"Сити" учун жуда муҳим бўлган инсон – бу раис Халдун", – дейди требл соҳиби Эмерик Ляпорт. "Мен учун у ҳаётимда учратган энг буюк инсонлардан бири. Агар мен унинг ўрнида бўлганимда, балки натижа ёки муваффақиятсизлик туфайли баъзи ўйинчиларга жуда ёмон муносабатда бўлардим. Бу одам эса доим қўлингизни қисади, ҳолингиздан хабар олади: "Аҳволинг қандай, оиланг қандай?", жуда хушмуомала ва у каби нуфузли, шунчалик қудратга эга одамнинг шундай бўлиши жуда кўп нарсани ўзгартиради".
"Клубнинг унинг вазиятини бошқариш усули унга кўпроқ хавфсизлик беради ва ўйлайманки, бу табиий ҳол", – дея қўшимча қилади Фернандиньо. "У ҳар доим тактик жиҳатдан қандайдир янгилик қилишга интиларди, чунки у кўпроқ таваккал қилиши мумкинлигини биларди, раҳбарият унга доим ишонишга ҳаракат қилди, футболчилар унга ишонди, клубдаги ҳамма унга ишонди.
"Албатта, у қандайдир босим борлигини биларди, лекин охир-оқибат у қандай натижа қайд этишидан қатъи назар, баъзи қарорларни қабул қилишда эркин эди".
Ўтган мавсумда "Сити" барча турнирлардаги 31 ўйиндан фақат 11 тасида ғалаба қозониб, тез-тез тўлиқ 90 дақиқа ўйнашга жисмонан қодир эмасдек кўринганида, Гвардиола яна босимни ҳис қилди. Бу у илгари ҳеч қачон бошдан кечирмаган мавсум эди ва у Чемпионлар лигасига йўлланмани нақд қилиш учун "Фулхэм"ни мағлуб этиши керак бўлган мавсумнинг сўнгги кунига қандай даҳшатли ҳис билан етиб келганини гапириб берганди.
"У ҳақиқатан ҳам умидсиздек кўринарди", – дейди Галлахер. "У менга шундай хабарлар юборардики, гўё ўзини оқлашга, нима бўлаётганини тушунтиришга ҳаракат қиларди. Мен ундан ҳеч қачон иши ҳақида очиқ сўрамаганман, мен шунчаки мухлисман, бу одамни таниганимдан хурсандман холос, лекин у вазиятни тушунтириш учун қўлидан келганини қиларди.
"115 та айблов масаласи ҳар қандай одамни ҳолдан тойдиради. Шахсий ҳаётдаги муаммолар – бу энг яхши пайтларда ҳам чарчатади, лекин кўз олдингизга келтиринг, бутун бир футбол клуби сизнинг қиёфангизда шаклланган, сиз асосий одамсиз, сизни ҳеч қандай заиф ҳолатда кўрмасликлари керак. Бутун футбол жамоатчилиги қоқила бошлаганимиздан хурсанд бўлмоқда. Ҳар ҳафта ўн минглаб одамлар учун етакчи бўлиш қандайлигини тасаввур қилинг. Ўйлайманки, бу ҳар қандай одамнинг тинкасини қуритади".
Машғулот базасидаги манбаларнинг таъкидлашича, у жавоб излаб ўз шиддатини ўзига қаратган. Ёрдамчиларининг қўллаб-қувватлаши тўсатдан йўқолди. Асосан стандарт вазиятлар бўйича мураббий бўлган Карлос Висенс олдинга чиқиб, бошқа вазифалари билан бир қаторда амалда Гвардиоланинг иккинчи рақамли ёрдамчисига айланди, аммо унга жуда кўп юк тушди.
Хуанма Лильо футболчилик давридан бери каталониялик мутахассис билан жуда яқин бўлган ва ёрдамчи мураббий сифатидаги аввалги фаолиятида "Сити" муваффақиятининг муҳим қисмига айланганди, ҳатто у клубни тарк этганидан кейин ҳам у Гвардиолага 2023 йилги Чемпионлар лигаси триумфида "Реал"ни 4:0 ҳисобида мағлуб этиш ва финалда "Интер" устидан қозонилган ғалабани режалаштиришга ёрдам берган. Ўша ёзда ёрдамчилари Энцо Мареска ва Родольфо Борреллни йўқотгач, Гвардиола аслида "Сити"дан Лильони Қатардаги бош мураббийлик ишидан қайтариб олиб келишни талаб қилди. Клуб буни амалга оширди, ҳатто келишув доирасида Лильонинг ўзининг ёрдамчиси Иньиго Домингесни ҳам олиб келишга рози бўлди.
Аммо ўтган мавсумда вазият ўзгарди. Домингес футболчилар билан тил топиша олмади ва Лильо ҳам узоқлашди. У инглиз тилини ўрганмаганди, авваллари бу муаммо эмасди, чунки унинг характери ва тана тили испан тилини билмайдиганлар билан мулоқотда қўл келарди, аммо ҳатто унинг Гвардиола учун фойдалилиги ҳам пасайди.
Клубдаги баъзиларда Гвардиола ёлғизланиб қолган деган таассурот уйғонди. Гвардиола рафиқаси билан ажрашганди ва у билан вақт ўтказадиган тенгдошлари кам эди. Машғулот базасига келган меҳмонлар у ким биландир суҳбатлашиш учун уларнинг кўпроқ қолишларини хоҳлаётганини ҳис қилишарди. Бу анча ғамгин манзарани тасвирлайди.
Бошқаруви давомида у тез-тез ёмон кайфиятда бўларди ёки ҳеч бўлмаганда натижалар яхши бўлганида ҳам одатда шундай бўларди – ўз хаёлларига чўмганча, қошларини уйиб машғулот майдонида айланиб юрарди.
Галлахернинг сўзларига кўра, у мавсум охирига келиб "жонланган", янги трансферлар ва мураббийлар штабига келган янгиликлар билан тўлдирилган янги жамоа Қўшма Штатлардаги Клублар ўртасидаги Жаҳон чемпионатида иштирок этган ўтган ёзда у ўзининг энергиясини қайтара бошлаган. У ўшандаёқ Манчестердаги сўнгги мавсуми бўлишини ҳис қилган нарсасига иштиёқ билан қарарди, аммо шунга қарамай, у мавсум бошланиши арафасида дўстлари билан тушлик қилди ва мутлақо чарчагандек кўринди.
Унга яқин бўлганларнинг айтишича, у мавсум давомида футболга шунчалик кўп энергия сарфлайдики, ёзда кучини тиклаш учун ҳафталаб вақт керак бўлади. Энг яқин ходимларининг кўпчилиги иш аллақачон тугаганини ҳис қилган бўлса-да, Манчестерда шунча вақт қолишининг сабаби – бу унинг тинимсиз давом этиш истагидир, жамоа юқорида ёки пастда бўлишидан қатъи назар, у ҳар доим кейинги қийинчиликдан мотив олади.
Жорий мавсумда энергия катта ҳажмда қайтди, ҳатто сўнгги икки ҳафта ичида Гвардиола барибир қолишни хоҳлаётгани ҳақида ишончли миш-мишлар тарқалди. Бу саҳна ортида катта зарба бўларди, чунки жамоатчилик бундан бехабар бўлиб, Гвардиола шартномасининг яна бир йили қолганини ва қолишига ишора қилаётганини таъкидлаётган бир пайтда, "Сити" унинг кетишини ойлаб кутган ва унинг ўрнига Мареска хизматларини боғлаб қўйишдан ташқари анча жиддий тайёргарлик кўрганди.
Гвардиола йиллар давомида ўйинчилар билан муносабатларга ёндашувини такомиллаштирган бўлиши мумкин, аммо у ҳамон ўша ҳаяжонли, баъзида ғалати шахслигича қолмоқда.
Бернарду Силва, балки унга яқин бўлганларнинг сўзларига кўра Гвардиоланинг энг севимли ўйинчиси, ҳамон кийим алмаштириш хонасида, ҳатто янги футболчилар орасида ҳам "Бернардики" деб аталади, чунки Гвардиола икки йил олдин ўзининг одатий ғалати машғулот ҳайқириқларидан бирида уни шундай атаган. Бу унчалик қўпол бўлмаганларидан биридир.
Сўнгги ҳафталарда у мавсумнинг энг қизғин палласида футболчиларнинг ўсишидан ҳайратда қолди. "Мен сизларнинг ўйинингизни кўришдан жуда ҳаяжондаман", – деб бақирди у. Бошқа пайтларда у уларнинг жангга тайёр ёки йўқлигини сўроқлаш учун жуда ранг-баранг сўзлардан фойдаланган.
Бу мавсум унинг фаолиятидаги энг катта синовлардан бирига айланди. У ўтган мавсумда етишмаган энергияни жамоага қайтармоқчи бўлган бир пайтда, унинг футболга бўлган ёндашувига табиатан мос келмайдиган кўплаб янги, ёш футболчиларни бирлаштирди.
У Юрген Клоппнинг "Ливерпуль"даги собиқ ёрдамчиси Пеп Лийндерсни машғулот майдонида яна бир кучли шахс сифатида ҳаракат қилиши ва жамоани яна югуришга мажбур қилиши учун олиб келди. Асосий жамоа атрофидаги манбалар ҳатто мавсум бошида Гвардиола машғулотлар ва ўйинларда Лийндерсга қўшимча масъулият юклаб, нидерландияликка ўзи ишонмаган принципларни жорий қилишга рухсат берганига ишонишади.
Иккаласи ўртасида ҳеч қачон келишмовчилик бўлмаган; шунчаки Гвардиола янгиланишни ва эҳтимол ўзининг ёндашувини ўзгартиришни шунчалик истаганки, у янги ғояларга очиқ эди. Шунга қарамай, "Сити" мавсум давомида аста-секин Гвардиола усулига қайтди, дастлабки ойлардаги очиқ, қарши ҳужумга асосланган ўйиндан воз кечиб, яна назоратга қайтди.
"Бу мавсумда менинг фаолиятимда илгари ҳеч қачон бўлмаган жуда кўп турли усуллар қўлланилди", – деди Гвардиола душанба куни. "Менда доимо мен ўзгартирадиган қандайдир кичик бир деталь бўлади. Лекин бошқа томондан, бу қизиқарли бўлди. Бу янада қизиқарлироқ бўлди, деган бўлардим".
У бу мавсумнинг катта қисмини янги таркибида аввалги енгилмас жамоаларни шакллантирган ўша менталитетни яратишга сарфлади.
"Менга шерикларининг реакцияси ёқади", – деди Гвардиола апрель ойида "Сити"нинг "Арсенал" устидан қозонилган ғалабасида Жанлуижи Доннарумма потенциал ҳалокатли хатога йўл қўйганидан кейин. "Улар унга ёрдам бериш учун шу ерда эдилар, бу мавсумда биз мана шунинг устида жуда кўп ишладик.
"Қачонки гол ўтказиб юборган жамоаларни кўрсам ва ҳамма нолиб, ҳамма ўзи учун ҳаракат қилса, бу менга ёқмайди. Улар эса бирга эдилар".
Бу жорий мавсумда у мияларга қуйган шиорга айланди. Сентябрь ойида у "Этихад" стадионида мавсум бошидаги дербида "Юнайтед" устидан қозонилган ғалабадан сўнг ўз футболчиларига мурожаат қилди. У 20 ёки 30 дақиқалик йиғилишни тайёрлаш учун 60 дан 90 дақиқагача вақт сарфлайди, бу унга яқин одамларнинг қандай қилиб у ҳали ҳам бунга вақт топишига ҳайрон бўлишларининг сабабларидан биридир. Мураббийлик курслари бугунги кунда қисқа, аниқ йиғилишларни тавсия қилади, аммо Гвардиоланики бунга зид ва у ёрдамчилари барча керакли видеоклипларга эга эканлигига ва уларни айнан тўғри вақтда тўхтатишларига ишонч ҳосил қилади. У кўпинча кун сайин бир хил хабарларни такрорлайди, шунинг учун футболчиларда ҳеч қандай баҳона қолмайди.
Сентябрь ойидаги дербидан кейинги кун, ўша ерда бўлган манбалардан бири мураббий ўз футболчиларининг қилган ишларини таъкидлашни қандай истамаганини тасвирлайди – эътибор бунинг ўрнига Бруну Фернандешга қаратилди. Португалиялик ярим ҳимоячи "Юнайтед"даги жамоадошларидан Фил Фоденнинг биринчи голидаги иштироки учун ғазабланган ва "Сити" нишонлаётган вақтда уларни очиқчасига койиган эди.
Гвардиола ўз футболчиларига Фернандеш яхши ўйинчи бўлса-да, жамоадошларига нисбатан бундай салбий муносабатда бўлиш "Сити"да қабул қилинмаслигини билдириш учун клиплар тайёрлаган эди. Гвардиола ўйинлар давомида ўз ўйинчиларидан норозилигини очиқ кўрсатишга қарши эмас ва бу у кутадиган стандартларнинг яна бир эслатмаси эди.
"Сити" апрель ойида Премьер-лига доирасидаги ўйинда "Арсенал"ни мағлуб этганидан сўнг, манба унинг Доннарумманинг Нико О'Райлига тезкор узатмасини қандай таъкидлаганини тасвирлаб берди. Аниқроғи, Родрининг реакцияси. Испаниялик дарҳол бурилиб, "Арсенал" дарвозаси томон югурди, Мартин Эдегор эса 10-15 қадам секин югурди.
Родрининг "Арсенал" жарима майдончасига биринчи бўлиб етиб келгани Вильям Салиба унинг олдини тўсиши кераклигини англатарди, бу эса узоқ устунда Эрлинг Холанднинг ишини осонлаштирди. Гвардиоланинг хабари шу эдики, "Сити" Родрининг қўшимча хоҳиши туфайли чемпионлик учун курашда "Арсенал"ни мағлуб этади.
Охир-оқибат бундай бўлмади, унинг футболчилари чарчаб қолишди, аммо Гвардиола даврининг сўнгги ҳафталари ўтганда ҳам у ҳар қачонгидек ғайратли кўринарди ва агар у қолиш ҳақида жиддий ўйлаган бўлса, бу ҳайратланарли эмас.
У Истанбулда "Интер"ни 1:0 ҳисобида мағлуб этиб, треблни қўлга киритиб, "Сити" биринчи марта Чемпионлар лигасида ғолиб чиққанидан кейинги куннинг тонгида, ўзини Лионель Месси Аргентина билан Жаҳон кубогини ютганидан кейин ҳис қилганидек ҳис этаётгани ҳақида гапирди. "Ya esta", деди у аргентиналик мухбир Висенте Муглиага. "Марра забт этилди". Шунга қарамай, у дарҳол кейинги мавсум учун режаларини муҳокама қилди.
У ўша мавсумнинг бошида "Сити"ни тарк этишга яқин келганди, лекин 2022 йилнинг охирида янги шартнома имзолади. 2024 йилда у сўнгги шартномасини имзолаганида, у ўз ходимларига айтмаган эди ва спорт директори Чики Бегиристайн билан бирга мавсум охирида кетишни режалаштираётганди.
Гвардиола ўша пайтда ишга боғланиб қолгани ҳақида гапириб, интервьюларидан бирида кетиши ва тинч ҳаётдан завқланиши кераклигини билишини, лекин бундай қила олмаслигини айтганди.
У ўтириб ечим топишнинг ҳаяжони ҳақида гапирди ва унинг бошқарувининг етарлича баҳоланмаган жиҳатларидан бири – ўйинчиларнинг позициясини катта муваффақият билан ўзгартириш қобилияти бўлди: Фабиан Делф ва Александр Зинченко чап қанот ҳимоячилари сифатида, Де Брюйне "ёлғончи тўққизлик" сифатида, Стоунз замонавий либеро сифатида ва Матеус Нуньеснинг ўнг қанот ҳимоячиси сифатида қайта туғилиши.
Аммо у ўзининг барча ғояларида туравермасди. Бернардунинг 2023 йилда "Арсенал"га қарши муҳим ўйинда чап қанот ҳимоячиси сифатида ўйнагани етарлича ҳайратланарли, аслида дастлабки ғоя янада ақл бовар қилмас бўлганини билганингизда эса бундан ҳам ҳайратланасиз.
"Аввалига унинг биринчи ғояси мени марказий ҳимояда ўйнатиш эди ва мен ҳақиқатан ҳам марказий ҳимояда машғулот ўтказгандим", – дейди Бернарду. "Арсенал"га қарши сафарда, мен чап қанот ҳимоясида ўйнаган ўша баҳсда Натан (Аке) чап қанот ҳимоячиси сифатида, мен ва Рубен (Диаш) марказий ҳимоячи сифатида ўйнаётгандик ва у мени ўз хонасига чақирганида, мен фақат шундай ўйладим: "Вау..." У: "Қўлингдан келадими?" деди. Мен: "Ҳа, албатта ҳаракат қилиб кўраман. Биласиз, бу менинг табиий позициям эмас, лекин хоҳласангиз, шундай ўйнайман", дедим.
"Кейин бир кун машғулот ўтказдик ва у деди: "Ўйлайманки, алмаштирсак яхшироқ бўлади, Натан марказга келади ва сен чапга ўтасан". Ўшанда ҳам бундай қилиш ақлдан озишдек туюлгандир, айниқса ўша пайтда лигада пешқадам бўлиб турган "Арсенал"га қарши шундай қийин ўйинда. Ўша ўйинда ғалаба қозондик ва бу ажойиб эди. Мураббийнинг майдондаги исталган позицияда ўйнашга ишончи бўлиши ёқимли".
Футболда ҳеч нарса текинга берилмайди ва яна бир Премьер-лига титули Гвардиола учун муносиб якун бўлса-да, ички дубль – ҳаммасини якунлашнинг романтик усули. У Англия футболи тарихида ички кубокларда икки марта дубль қайд этган биринчи мураббийга айланди.
Уни кубокларни эмас, балки ғалаба қозонишни қучган деб таъкидлаш мумкин, аммо у шубҳасиз инглиз футболининг ўзига хос хусусиятлари ва характерларини севиб қолган.
"Бу мамлакатдан оладиган энг ёқимли хотираларимдан бири – Англия Кубоги доирасида Биринчи ёки Иккинчи лига клубларига қарши сафарда ўйнаш бўлади", – деган эди Гвардиола бу мавсумда "Салфорд Сити"га қарши ўйиндан олдин.
"Бу доим ажойиб бўлган. Автобусда стадионга етиб келганингизда ва барча мухлислар "Сен кимсан?! Сен кимсан?!" деб куйлашидаги ўша таассурот. Узун паслар билан кечадиган бундай атмосфера, ростдан ҳам ваъда бераман, ҳаётимнинг охиригача ўзим билан олиб кетадиган хотираларимдан бири бўлади".
Ўша ўйиндан кейин у Карл Робинсонни ўз хонасига таклиф қилди, бу уларнинг бешинчи марта тўқнаш келиши эди.
"У мени лол қолдирди, ҳақиқатан ҳам шундай қилди, ҳатто ўтган мавсумда мени ичимлик ичишга таклиф қилганида ҳам", – дейди Робинсон "The Athletic"га. "Райан Гиггз мен билан бирга эди ва Райан кириб келганда, Пепнинг кўзлари порлаб кетди ва у: "Вау", деди. У жуда қизиқиб қолганди. Унинг бераётган саволлари ақл бовар қилмас эди – эски ўйинлар, "Барселона" ўйинлари, унинг "Манчестер Юнайтед" жамоалари ҳақида, бизнинг ("Салфорд") даражамизда қандай эканлиги, уни ва буни қандай топишингиз ҳақида гаплашиб, Иккинчи лига ва Биринчи лига ҳақида жуда қизиққан ҳолда, қуйи лигаларда ўтказадиган ўйинларимиз сонидан ҳайратда қолганди.
"Райан хонага кирганда Пепнинг унга бўлган ҳурмати даражасини кўришингиз мумкин эди, бу ақлдан озиш даражасида эди. У жуда очиқ эди. Биз унга кўплаб саволлар бердик ва у ажойиб эди".
Гвардиола аслида ностальгик романтикдир. У Майкл Жордан ва Тайгер Вудс каби шахсларни яхши кўради – у шароб ичиб, ноутбукдан бошини кўтариб мейжор турнирларда Вудсни томоша қилиш жараёни уни яхшироқ мураббий қилганини айтади. Гольф – унинг эҳтироси. У билан бирга ўйнаганларнинг айтишича, унинг гандикапи 10 атрофида ва икки йил олдин "Сити"нинг мавсумолди турнеси доирасида Орландода бўлганида, у инглиз профессионали Дэнни Уиллетт билан бир соатлик дарс олган ва бирга ўйнаган. 2018 йилда "Манчестер Юнайтед" "Вест Бромвич"га ютқазиб қўйган пайтда, "Сити" биринчи марта чемпионликни қўлга киритган лаҳзани машҳур тарзда ўтказиб юборганди, чунки у Томми Флитвуд билан гольф ўйнаётганди.
"Шубҳасиз, Пеп мен учратган энг яхши инсонлардан бири", – дейди Флитвуд. "Мен у энг яхши кўрган инсонлари қуршовида у билан вақт ўтказиш бахтига муяссар бўлдим ва шундагина сиз ҳақиқий Пепни кўрасиз. У ўз оиласи ва унга энг яқин бўлганлар билан энг бахтли одамдир.
"Пеп ўзи билмаган ҳолда менга ҳаёт ҳақида кўп нарсани ўргатди. Унинг камтаринлиги ва виқори, одамларга қандай муносабатда бўлиши, буларнинг барчаси из қолдиради.
"Дунё футболдаги энг буюк ақллардан бирини кўради, лекин унинг атрофидаги одамлар ундан-да буюкроқ инсонни кўришади".
Галлахер гольфга умуман қизиқмайди, лекин Гвардиоланинг иштиёқини яқиндан кўрган. "У муваффақиятли, профессионал одамларга жудаям қизиқади", – деб тушунтиради у. "У мени "Этихад" кампусига тушликка таклиф қилди ва у ерда Рори Макилрой фитнес ускунасидан, қандайдир махсус криоген қор хонасиданми фойдаланиб юрганди.
"Пеп асосан Рори Макилройдан интервью оларди, мен эса шунчаки қараб ўтириб: "У ярамас "Юнайтед" мухлиси-ку, бу ерда нима қиляпти? Уларнинг машғулот базасидан фойдаланиб юрибди", деб ўйлардим. Ўйлайманки, у тана тилига, фикрлаш тарзига ва одамлар ўзини қандай тутишига қизиқади. Мен гольф мухлиси эмасман, лекин уларнинг гольф ва унинг психологик томони ҳақида суҳбатлашишини кўриш жуда қизиқ эди.
"У Хитон Паркда бизнинг чиқишимизни кўргани келганда, саҳнага чиқишимиздан 10 дақиқа олдин саҳна ортида шунчаки ҳазиллашиб юрганимизга ишона олмади ва у: "Сизлар шундай чиқмоқчимисизлар?", деди. Биз эса: "Ҳа, чиқишдан олдин балки тишимни ювиб оларман, лекин асосан шу, ҳа", дедик. Ва у: "Эй худойим, лаънати, у ерда қанча одам борлигини биласизларми?" дерди. Биз эса: "Ҳа, лекин бизнинг усулимиз шундай". Биз атрофдаги ҳаммани ёқтирамиз ва руҳиятга киришамиз, бу эса уни лол қолдирганди".
Гвардиоланинг инглиз футболига бўлган муносабати дастлаб у ёшлигида испан телевизорида кўрган саноқли ўйинлар орқали шаклланган, бу унинг нега Англия Кубогига алоҳида меҳр қўйганини тушунтиради, чунки финал ўша намойиш этилган саноқли ўйинлардан бири эди.
У Нил Уорнок, Сэм Эллардайс ва Тони Пюлис каби эски мактаб инглиз мураббийларига ҳайрат билан қарайди. Икки йил олдин Гвардиола Кайл Уокерни узоқ йиллик мураббий телеэшиттиришда ишлагандан сўнг Уорнокни ўз офисига таклиф қилиш учун юборган ва уни саволларга кўмиб ташлаган. Шундан бери улар дўстлашиб қолишган.
"У шундай одам, ҳатто ўз ёшида ва шунчалик зўр бўлганида ҳам доим ниманидир ўрганишни хоҳлайди ва у ҳали ҳам миянгизни "кавлаштиради", – дейди Уорнок.
77 ёшли мутахассис Гвардиоланинг ундан айнан нимани хоҳлаганини айтишдан бош тортади, лекин у ундан одамма-одам марказировка ҳақида қаттиқ сўроққа тутганини айтади, бу нарса уларнинг биринчи учрашувидан бери Премьер-лигада тобора кенг тарқалиб бормоқда. Агар у яқинда жуда муҳим бўлади деб ҳисоблаган нарсаси бўйича маслаҳат олаётган бўлса, бу ҳеч кимни ҳайрон қолдирмайди.
Бир мураббий "The Athletic"нинг Гвардиола билан тажрибаси ҳақида гапириб бериш сўровини хушмуомалалик билан рад этди ва бир-бирига қарши ўйинларда уни совуққон деб топганини таъкидлади. Гвардиола билан кўп марта тўқнаш келган Премьер-лиганинг узоқ йиллик мураббийларидан бири йиллар давомида унинг томонидан бир қадаҳ шаробга таклиф қилинмаганини ва каталониялик мутахассис ўзининг мақомини ҳисобга олган ҳолда инглиз мураббийлари билан ўз тажрибаларини баҳам кўриш учун кўпроқ вақт ажратиши мумкин эди, деб ҳисоблашини айтади.
Бу жиҳатни эҳтимол Гвардиола рақибларига уни мағлуб этишда заррача ҳам ёрдам беришни истамаслиги билан тушунтириш мумкин.
Бошқалар, масалан, Робинсон уни жуда мақтайди. 2019 йилда Англия Кубоги доирасида "Сити"га қарши ўйинда "Ньюпорт Каунти"ни бошқарган ва ўша пайтда Гвардиоланинг ёрдамчиси бўлган Микель Артета билан мураббийлик лицензиясини олиш бўйича ўқиган Майкл Флинн каталонияликнинг қанчалик ғамхўр бўлишини тушунтиради.
"Ўйиндан олдин яхшигина суҳбатлашдик ва ўйиндан кейин у олдимга келмоқчи эди, лекин кимдир ёнғин сигнализациясини ёқиб юборди", – дейди у. "Шунинг учун у кетишга мажбур бўлди ва мен уни кўролмаганимдан бироз хафа бўлдим. Лекин кейин у менга хабар ёзди, у менинг рақамимни Микелдан олибди ва шундан бери алоқадамиз.
"Мен бордим, "Ман Сити"га бориб "Лутон Таун"га қарши ўйинни кўрдим (2024 йилда). У менга, хотинимга ва ўғилларимга ажойиб муносабатда бўлди. Машғулотни кузатдик, ўйиндан кейин унинг офисида у билан бирга ўтирдим. У юқори даражали инсон. У қизиқувчан. У бутун футболни яхши кўради. У футбол билан яшайди ва нафас олади".
Гвардиола сўнгги пайтларда ретроспектив тарзда ностальгия билан гапирмоқда, бу унининг аллақачон кетиш ҳақида қарор қабул қилганини аён қилади.
"Мен ўн йил олдин келганимдан бери ўз ходимларим билан Америкадами, Осиёдами ёки қаерда бўлмасин, биринчи мавсумолди турнесидан бошлаб, бу клубни "биз ғалаба қозонишимиз керак" деб ишонтиришга ҳаракат қилдим", – деган эди у икки ҳафта олдин. "Биз ғалаба қозонишга ҳаракат қилишимиз керак. Мусобақаларни танлаш ёки ўйинларни танлаш деган нарса йўқ. Иш этикаси ва ҳамма нарса. Барчамиз – раҳбар, бош директор, спорт директори, ўзим – барча мусобақаларда танамизга шуни сингдиришимиз керакки, "Биз ҳар бир ўйинда энг яхши ўйинимизни кўрсатишимиз керак".
"Англия Кубоги, Карабао кубогида Биринчи лига жамоаси ёки бошқа бировга қарши тушганимизда, мен кўпроқ ишлайман. Футболчилар билишади: "Йигитлар, эҳтиёт бўлинглар, агар биз ўзимизга ўхшамасак, муаммога дуч келамиз". Чемпионлар лигасида "Мадрид"га ёки ўз уйимизда чемпионлик учун "Арсенал"га қарши ўйнаш осон, биласизки, ўйинчилар тайёр бўлади, мухлислар шу ерда бўлади, лекин айнан ўша бошқа лаҳзалар клубни белгилаб беради. Барча мусобақалардаги 10 йиллик барқарорлик ҳақиқатан ҳам ғайритабиий, ғайритабиий бўлди".
Бу унинг хотиржамликка қарши ёлғиз олиб борган кураши эди. 2018 йил апрель ойининг ўрталарига келиб Де Брюйне, Силва, Агуэро, Лерой Сане ва Стерлинг кабилардан иборат ёрқин жамоа шарофати билан биринчи чемпионлик нақд қилинганидан сўнг, у кўп ичилган тундан сўнг футболчиларни чақириб, уларга бўшашмасликни айтди, чунки кейинги мақсад 100 балл ёки ундан юқори натижа қайд этиш эди. Баъзилар ҳали ҳам маст эди.
Сўнгги турда "Саутгемптон"га қарши ўйинга юзликни қайд этиш учун ғалаба керак эди.
"Биз раҳбарият томонидан шунчалик босим остида эдикки, худди Пеп, Микель, у ердаги ҳамма 100 баллга эришишни хоҳларди, нима бўлса ҳам", – дейди Ляпорт. "Мавсумнинг сўнгги ўйини, ҳисоб 0:0 бўлганида ўзимни жуда ёмон ҳис қилардим. Габриэль Жезус гол урди, лекин бу балки 90-дақиқаларда эди, шунинг учун бу гўёки мағлубиятдек, гўёки Премьер-лигани бой бераётгандек эдик. Ақл бовар қилмайди... 100 балл – 97, 98 ҳам яхши, лекин у бир хил эмас.
"Нишонлашимизни кўрдингизми? Ўша лаҳзада гўёки Премьер-лигада ғолиб чиқаётгандек эдик. Жиннилик, ақл бовар қилмайди".
"Сити"нинг кўплаб мухлислари "шаҳарликлар" жамоаси ўз ўйинининг тезлиги туфайли Гвардиола даврининг энг яхшиси бўлиб қолмоқда деб ҳисоблашади. Шундан кейинги "Сити"нинг аксарият титулларида жамоа кўпроқ назорат билан ўйнади, одатда ўйинни секинлаштирди ва ҳужум қилиш учун қулай лаҳзаларни танлади. Бу зарур бўлган ўзгариш эди.
"Биринчи икки ёки уч мавсумда биз шунчалик автоматик тарзда бир тегиниш, икки тегиниш билан ўйнардик ва рақиблар буни биларди", – дейди Фернандиньо. "Шундан сўнг у бироз ўзгартирди ва деди: "Йўқ, сиз рақибнинг ҳаракатини ҳам назорат қилишингиз керак, ҳар доим ҳам бир тегиниш ёки икки тегиниш билан ўйнашингиз шарт эмас". Унинг принципларининг асосларидан бири "тўпни яхши назорат қилиш ва кейин узатма бериш" эди, лекин бир мунча вақт ўтгач у бироз ўзгартирди, ҳатто машғулотларни ҳам. "Тўпни кўпроқ оёғингизда ушлаб туринг, энг яхши йўналишни танланг, энг яхши ҳаракатни танланг ва кейин биз ихчам ҳолда, бутун жамоа бўлиб олдинга интиламиз".
Шубҳасиз, Гвардиола ўн йил давомида "Сити"ни ўйин чўққисида ушлаб турган тинимсиз, интенсив муҳитни яратди, баъзида кузатилган пасайишларни ҳисобга олмаганда.
"Мен уни бу спорт тури билан кунига 24 соат яшайди ва унга тўлиқ шўнғиб кетган деб айтган бўлардим", – дейди "Сити" ҳимоячиси Йошко Гвардиол "The Athletic"га. "У ўзининг шахсий қарашига эга ва футболни ўзига хос тарзда кўради. Кўпинча у ўйин куни бутун тактикани ўзгартирарди ва охир-оқибат ҳаммаси яхши бўлиб чиқарди. У қандай бўлишини айтса, одатда шундай бўлади.
"Трансфер вақтида, у менга қўнғироқ қилиб гаплашганимизда суҳбат жуда қисқа бўлди, лекин биз дарҳол тил топишдик. Ўша беш дақиқа ичида мен бу тўғри қадам эканлигини ҳис қилдим.
"У ўзига хос мураббий ва ўйлайманки, ҳар бир футболчи у билан ишлаш имкониятига эга бўлишни хоҳлайди".
У футболчиларига дам беришнинг муҳимлигини борган сари кўпроқ англаб етди, мавсум охирида ҳафта ўртасида ўйин бўлмаган камдан-кам ҳолларда уларга мунтазам равишда уч кунлик дам бера бошлади. Бу ёндашув унинг баъзи ходимларининг фикрича ўйинчиларнинг ритмни йўқотишига олиб келиши мумкин, аммо у уларнинг чалғиши ва оилалари билан вақт ўтказишининг афзалликларини юқори баҳолайди.
Ўйинлар кўпайганда машғулотлар кўпинча енгил бўлади, аммо машқ қилиш имкони бўлганда, шиддат шафқатсиз бўлиши мумкин.
"Мен лол қолиб қолгандим", – деб эслайди буни ўз кўзи билан кўрган Уорнок. "Улар ўйиндан олдинги куни икки ярим соат шуғулланишади. Бу шунчаки вазиятларни кўздан кечириш ёки тайёргарлик эмасди, жуда интенсив, ажойиб эди. Томоша қилишдан роҳатландим, лекин ўйлаб қолдим: "Менинг йигитларим ҳозир нима деган бўларди?". "Босс, эртага ўйинимиз борлигини биласизми?". Бу жуда интенсив ва ҳақиқатан ҳам зўр эди. Холанд кабилар ҳам, лаънати, одамлар у кўп ишламайди деб ўйларди, лекин ҳозир айтаманки, у машғулотларда мен кўрган ҳар қандай ҳужумчидек қаттиқ меҳнат қилади".
2016 йилдаги ўша биринчи йиғилишлар ва машғулотларда ўйинчиларга берилган хабарлар 10 йил давомида кундан-кунга мустаҳкамланиб борди.
Ўйиндан кейинги кундаги машғулотлар ўйнаганларга дам олиш имконини беради, аммо ўйнамаганлар ва академия ўйинчиларидан юқори шиддат талаб қилинади. 2021 йил декабрь ойида "Вулверхэмптон"га қарши ўйиндан сўнг, "Сити" 1:0 ҳисобида ғалаба қозонганига қарамай, сўнгги дақиқаларда бепарво ўйнаганида, Гвардиола ўйинда ҳеч қандай ҳисса қўшмаган захира ўйинчилари ва ёшларга бақирган. "Бу Премьер-лига!" деб қичқирди у диққатни жамлаш даражасини юқори ушлаб туриш мақсадида.
Кимлигини сир сақлашни истаган бир "Сити" ўйинчиси бундай жадвал таркибга киритилмаётган ўйинчилар учун қанчалик қийин бўлганини тушунтиради.
"Сиз руҳан кучли бўлишингиз керак, чунки бу тўлиқ вақтли иш ва агар сиз ўйнасангиз ва деярли ҳар бир ўйинда ғалаба қозонсангиз, бу осонроқ. Сиз ўйнайсиз, ютасиз, яхши ўйнайсиз, хурсандсиз. Агар ўйнамасангиз, жамоа ютгани учун хурсандсиз, лекин ўзингиз майдонга тушмайсиз, эрталаб соат 4 да қайтасиз, уйғонасиз, чигалёзди қиласиз, қаттиқ шуғулланасиз, кеч шуғулланасиз, уйга қайтасиз. Бу қийин ва ҳар доим шундай барқарор бўлиш оғир".
Бу баъзи футболчиларнинг клубни ҳолдан тойган ҳолда тарк этишининг сабабларидан биридир. Гвардиола бир неча ҳолларда бир неча ҳафталаб захирада қолдирган ўйинчилари билан деярли мулоқот қилмагани уларнинг умидсизлигини янада оширади.
Гвардиоланинг фикрича, футболчилар ўзларининг умидсизликларидан тўғри фойдаланишлари, ижобий кайфиятда бўлишлари ва керак бўлганда ёрдам беришга тайёр туришлари керак. Бу "ёмон юзлар йўқ" сиёсати сифатида танилган.
"Қачонки мунтазам ўйнамаётган одамлар муаммо яратаётган бўлса, ҳеч нарса ярата олмайсиз", – деб тушунтирганди у 2017 йил декабрида.
"Ёмон юзлар, ўша йигитларнинг ёмон хулқ-атвори; қачонки шундай бўлса, буни унутинг. Бундай ҳолат рўй берса сиз қола олмайсиз. Лекин бу ерда мунтазам ўйнамаган ва ҳозир кўпроқ ўйнаётган йигитлар, улар ғайриоддий. Бусиз сиз буни уддалай олмайсиз".
Фернандиньо жамоадан четда қолган вақтда шерикларини қандай қилиб рағбатлантириши кераклиги ҳақида сўралганда кулади.
"Кўп марта", дейди у кулиб. Унинг хаёли дарҳол 2020-21 йилги ёпиқ эшиклар ортидаги мавсумга кетди, ўшанда Манчестернинг қаттиқ локадаун қоидалари кўплаб футболчилар учун ҳаётни қийинлаштирган, уларнинг баъзилари ўйнамаётганидан аллақачон хафа эди. 21 ўйинлик ақл бовар қилмас ғалабали серия эвазига лига чемпиони ва Карабао кубогини қўлга киритганига ва Чемпионлар лигаси финалига чиққанига қарамай, ўша ёзда камида бешта асосий ўйинчи турли сабабларга кўра клубни тарк этишни хоҳлади.
"2019-20 йилги мавсумда биз учун жуда қийин бўлди, чунки биз лигани 15 ёки 19 очко (18) фарқ билан бой бердик, бу мен учун унчалик яхши эмасди", – дейди бразилиялик. "Кейин ҳамма қийин даврни бошдан кечирди. Масалан, Ковид чекловлари туфайли мен ватаним Бразилияга бора олмадим.
"Мен жамоани имкон қадар энг яхши тарзда намойиш этишга мажбур эканлигимни ҳис қилдим. Пеп қандай ишлашни яхши кўришини билардим ва биз доимо ундан жамоага қандайдир янгилик олиб киришини кутамиз, лекин бунинг учун унинг хаёли эркин бўлиши керак эди.
"Агар сиз тактик йўналишга 100 фоиз эътибор қаратган бўлсангиз, футбол клубидаги баъзи муаммоларни ҳал қилиш осон эмас. Шунинг учун мен унинг олдига бориб: "Хавотир олманг, сиз таркибни танлаш билан шуғулланинг, қолганини ўзим ҳал қиламан", дедим, чунки футболчилар мени ҳурмат қилишини ва менга қулоқ солишларини билардим. Бироқ, шундай вазиятлар ҳам бўлдики, футболчилар асосий таркибда бўлмагани учун кайфияти жуда ёмон эди".
Йиллар давомида футболчилар ва жамоа атрофидаги бошқа манбалар, афсонавий ўйинчиларнинг клубдаги сўнгги йилида Гвардиола томонидан ҳар доим ҳам тўғри муносабат кўрмаганликларини айтишган. Гвардиола Яя Турени машҳур тарзда четга суриб қўйди, лекин кейинчалик бошқалар Давид Силва, Агуэро ва Фернандиньо ўз мақомига қарамай, сўнгги мавсумларида совуқ муносабатда бўлганликларини ҳис қилишди. Гвардиола Де Брюйне, Фернандиньо ва Стерлинг ва бошқалар билан баланд овозда, жаҳл билан жанжаллашган.
Фернандиньо, албатта, ҳалигача мураббий ҳақида мақтов билан гапиради.
Гвардиоланинг "Сити"даги бутун фаолияти давомида мақсад ҳар доим воситаларни оқлади; жамоа ҳар доим мавсумни кучли якунлаган, ҳатто чемпионликни юта олмаган йилларда ҳам. 2019 йилда каталониялик бошқарувидаги иккинчи чемпионликни таъминлаган 14 та ўйинлик, 2021 йилда барча мусобақалардаги 21 та ва 2022 йилда "Ливерпуль" билан иккинчи бор тўқнаш келганда сўнгги турда "Астон Вилла"га қарши 0:2 ҳисобида ортда бораётиб ғалаба қозонган ва бир очко фарқи билан чемпионликни ҳал қилган вақтлардаги каби ғалабали сериялар одатда қачон керак бўлса, ўшанда топилган.
Гюндоган захирадан майдонга тушиб, иккита гол уриб, шу жумладан ғалаба тўпини киритиб, Агуэронинг КПРга қарши ўйиндаги ҳал қилувчи голига максимал даражада яқин бўлган кунда "Сити" фольклорида ўз ўрнини муҳрлади.
"Ростини айтсам, майдонга тушишимдан олдин мен шундай катта ўйинда асосий таркибда эмаслигимдан ҳафсалам пир бўлганди", – дейди Гюндоган. "Чемпионликни ҳал қилувчи ўйинда захирада ўтирганингизда, буни қабул қилиш қийин. Лекин Пеп ниҳоят исмимни айтганида, бу ғазаб "йўқотадиган ҳеч нарса йўқ" менталитетига айланди ва мен майдонга тўлиқ эркинлик билан чиқдим, чунки менинг фикримча ўйин шундоқ ҳам бой берилгандек эди. Мен шунчаки қўрқувсиз ўйнадим.
"Тўғрисини айтсам, ўша нишонлашларнинг ҳар бир деталини эслай олмайман, чунки ҳаммаси худди тушдек, мутлақо реал эмасдек туюлганди. Лекин Пеп мени қаттиқ қучоқлаб: "Билардим. Айнан сен бўлишингни билардим", деб пичирлагани эсимда".
Шубҳасиз, Гвардиоланинг усуллари тез-тез ноодатий бўлиб туради; 2018 йилда ўз уйида "Кристал Пэлас"дан учралган мағлубиятдан сўнг, у кийим алмаштириш хонаси яқинида бир дўсти билан гаплашиб турарди ва ундан Стоунзнинг ўйини ҳақида қандай фикрда эканлигини сўради. Эшитганлари унга ёқди, Стоунзнинг эътиборини тортди ва дўстидан буни англиялик марказий ҳимоячига айтишини сўради.
"Биз ҳар доим ўйинда бўлардик ва клубдан кимдир келиб, пастга тушиб уни кўришни хоҳлайсизми, деб сўрарди", – дейди Галлахер. "Мен эса, биласизми, мен бу ерда олтита ярамас дўстларим биланман-ку, нимани назарда тутаётганимни тушуняпсизми? Охир-оқибат менинг оддий маҳалладаги дўстларим унинг хонасида пиво ичиб ўтиришарди ва у ким билан гаплашяпти... бир марта Испания қироли ўша ерда эди, тушуняпсизми? Кимдир бу Испания қироли деб айтгани аниқ эсимда.
"Барчамизни хуш кўриб кутиб олишарди. У ерда доим испаниялик футболчилар бўларди ва у жуда, жуда меҳмондўст ва очиқ эди. Ундан ҳар қандай нарсани сўрашингиз мумкин эди. Мен ҳеч қачон ундан ўйин ҳақида сўрамасдим, лекин дўстларим: "У ерда нима бўлди?", дейишарди ва у ҳеч кимдан шубҳаланмасди. Менимча, унинг қалби жуда кенг. Гарчи у шафқатсиз бўлса ҳам, менимча, у қалбан жуда очиқ ва меҳрибон ҳам".
Гвардиола ёрдам сўралганда клуб академиясига кўпинча яхши муносабатда бўлган – масалан, апрель ойида "Сити" "Арсенал"ни мағлуб этганидан кейинги куни у клубнинг тўққиз ёшгача бўлган янги футболчилари билан суратга тушган – лекин йўл-йўлакай кимнингдир бурни эзилиб кетса ҳам, ҳамма нарса асосий жамоани имкон қадар кучлироқ қилишга қаратилган эди.
Гвардиола келишидан олдин "Сити" ўз академияси ўйинчиларини асосий жамоа билан бир жойга жойлаштиришдан ғурурланарди, бу уларга ўзлари етишишни истаган даражани кўриш имконини берарди. Гвардиола эса ҳеч қачон кимгадир ён босаётгандек кўринишни истамади ва ўз ўйинчиларини имкон қадар энг юқори сифатли муҳитда бўлишини хоҳлади.
У шунингдек нарсаларнинг сир сақланишини хоҳларди; унинг биринчи мавсуми охирида гигант парда ўрнатилиб, клубдаги ҳеч ким ёпиқ манеждаги ўйинга тайёргарлик жараёнини кўра олмайдиган бўлди. Офислари очиқ машғулот майдонларига қарайдиган, аммо асосий жамоанинг бир қисми бўлмаган ходимлар ойна олдида туриб кузатмасликлари кераклигини яхши билишарди ва бу содир бўлмаслиги учун хавфсизлик хизмати ходимлари патруль қиларди.
Гвардиола клубнинг ёш истиқболли футболчиларининг катта ҳимоячиси эди, лекин улар асосий жамоанинг юқори стандартларига жавоб беришини қаттиқ талаб қиларди. Унинг деталларга эътибори, ғайритабиий хусусияти ва ўта кучли хотираси шуни англатардики, у кўпинча телевизор орқали ёшлар жамоаси ўйинларини томоша қилганида пайқаган айрим футболчилар ҳақидаги маълумотларни академия ходимларига етказарди.
Бу кўпинча ёш ўйинчининг ўйинларда унинг фикрича йўл қўяётган айрим хатолари ҳақида ходимларни огоҳлантиришни ўз ичига оларди. Собиқ академия ходимларининг фикрича, каталониялик мутахассис "Сити"нинг 2023 йилги мавсумолди турнеси давомидаги машғулотлардаги ўйинига асосланиб, юқори баҳоланган марказий ҳимоячи Стивен Мфунини баҳолашда ҳар доим қаттиққўл бўлган. Мураббийлар Гвардиолага ўша пайтда Мфуни эндигина 15 ёшда эканлигини ва Холандга қарши чиқаётганини эслатишганди, аммо январь ойида Мфуни Англия Кубогида "Эксетер"га қарши ўйинда асосий жамоада дебют қилганида ва Гвардиола аввалроқ таъкидлаган ҳаракатни такрорлаганида, унинг баҳоси билан баҳслашиш қийин эди.
Гвардиола тез-тез ёшлар мураббийларининг кўкрагига қўлининг орқаси билан уриб: "У тайёрми, лаънати, у тайёрми?!", деб сўрайди ва агар унга таянч ярим ҳимоячиси ҳақида гапиришса, айниқса хурсанд бўлади, чунки бу ўзи ўйнаган позиция эди. У ўз машғулотларида ёш футболчиларни техник хатолари учун койимайди, лекин агар улар ёмон муносабат намойиш қилсалар, у машғулотни тўхтатади ва бундай хулқ-атворга тоқат қилинмаслигини аниқ тушунтиради.
Ўйинлардан олдинги машғулотлардаги тақлид ўйинларида ёш футболчилардан "Сити"нинг бўлажак рақибларига тақлид қилиш сўралади ва Гвардиоланинг ёрдамчилари ёшлар мураббийлари билан бир неча бор учрашиб, ёшлар тақлид қилаётган футболчилари айнан нималарни қилиши ва қилмаслигини аниқ билишларини таъминлайди.
Масалан, 2022 йилги Манчестер дербисидан олдин Гвардиола табиатан агрессив ва интуитив прессинг қилувчи Оскар Боббга ўз инстинктларини унутишни ва шунчаки рақиб ҳимоячилари томон югуришни, сўнгра тўқнашишдан олдин тўхташни буюрди, чунки унинг фикрича, Криштиану Роналду айнан шундай қиларди.
Бу йилги "Арсенал"га қарши Карабао кубоги финалига тайёргарлик кўриш жараёнида Гвардиола ёш дарвозабон ва ҳимоячиларга ярим ҳимояга ўткир узатмалар бермасликни буюрди, чунки у Кепа Аррисабалага ва марказий ҳимоячилар Уэмблидаги ўйинда бундай қила олмайди деб ҳисоблади, у ерда "Сити" прессинг қилмай, рақиб хато қилишини кутиб уларни доғда қолдирди.
У шунингдек, ёш футболчилардан юқори стандартларни, баъзи ҳолларда ҳатто иложсиз стандартларни талаб қилади. 2022 йилда "Сити"нинг тўрт нафар футболчиси COVID-19 билан боғлиқ кириш талабларига жавоб бермаганликлари сабабли Қўшма Штатлардаги мавсумолди турнега бора олмади. Ўрнига улар "Сити"нинг 23 ёшгача бўлган жамоаси билан Хорватияга кетишди ва ундан олдин Гвардиола уларни ўз хонасига чақирди.
Ўша пайтда асосий жамоа билан шуғулланаётган ёш футболчи Самуэл Эдози биринчи бўлиб етиб келди, кириб учта стулдан бирига ўтирди. Гвардиоланинг жаҳли чиқди ва дарҳол Эдозидан фаолияти давомида қилган ишларини ҳисобга олиб, у Стоунз, Фоден ёки Грилишдан кўра шу жойга кўпроқ нолойиқман деб ўйлайсанми, деб сўради.
Лиам Делап 2022 йилда Чемпионлар лигаси доирасидаги "Спортинг"га қарши ўйинда майдонга тушишига ишонтирилгач, асосий жамоага киришни мақсад қилган мавсумда "Сити"да келажаги йўқлигига қарор қилди. "Сити" сафардаги ўйинда 5:0 ҳисобида ғалаба қозонган ва асосий ўйинчиларга дам бериш имкониятига эга эди, аммо Делап ҳеч қачон майдонга тушмади. Бунинг ўрнига Гвардиола Скотт Карсонни майдонга туширди – у кийим алмаштириш хонаси учун жуда муҳим бўлган, лекин олти йил ичида жами иккита ўйин ўтказган бениҳоя машҳур учинчи дарвозабон эди ва бу унинг охирги ўйини эди.
Охир-оқибат Гвардиола ўз асосий футболчиларининг имкон қадар энг яхши ҳолатда бўлишини хоҳларди, бу эса тез-тез юқори потенциалга эга, тўлиқ эътиборли ёшлар томонидан қўллаб-қувватланадиган интенсив машғулотларни англатарди.
Фернандиньо бундай арзимас бўлиб туюлган нарса қандай қилиб катта фарқ қилишини таъкидлайди ва Рождество арафасида саккизинчи ўринда бўлиб, кейин кетма-кет 21 ўйинда ғалаба қозонган 2020-21 йилги мавсумда "Сити"нинг ажойиб ўзгаришини муҳокама қилаётганда буни ҳеч қандай ишорасиз тилга олди.
"Ўйиндан кейинги кундаги машғулот ҳар доим энг қийини бўлади, чунки ҳамма чарчаган бўлади ва машғулот яхши ўтиши учун сиз қандайдир энергия беришингиз керак", – дейди бразилиялик. "Эсимда, биз билан машғулотга келган баъзи ёш футболчилар етарлича яхши эмасди, чунки улар бу зерикарлидек тутишарди ўзини ва мен Пепнинг ёрдамчилари Родо ва Хуанмага келиб: "Эшитинг, биз машғулотда бизга энергия бериши учун шу ерда бўлишни хоҳлайдиган баъзи ёшларни танлашимиз керак", дедим.
"Агар шундай давом этсак, мавсум охирида биз яна лигани бой берамиз, чунки эртага бир ўйинчи дисквалификация қилинса ва кимдир ўйнаши керак бўлса, улар тайёр бўлмайди ёки кимдир жароҳат олса, биз даражани оширишимиз керак".
Гвардиоладан яқинда "Сити" унга мос клуб эканлигини қачон англагани ҳақида сўрашганида, у "Сити"нинг футболчиларга ғамхўрлик қилиш бўлимини мақташ имкониятидан фойдаланиб, футболчилар тинч ҳаёт кечиришлари ва эътиборини футболга қаратишлари учун ҳар бир деталь ўйланганини таъкидлади.
"Шунинг учун биз сўнгги 15 йил ичида Чемпионлар лигасида барқарор иштирок этяпмиз ва ҳар доим титуллар учун курашяпмиз", – деди у журналистларга, "чунки ўйинчилар атрофида шундай тизимлар ва пуфаклар борки, улар ўзларини яхши ҳис қилишади".
Ляпорт бу амалда қандай ишлашини тушунтиради: "Ичкарида гўё ўз фарзандларидек ғамхўрлик қиладиган одамлар бор. Агар сизга бирор нарса керак бўлса, хонандаларнинг концертига чипталар, ижарага уй, машина балонларини алмаштириш, ҳамма нарса. Уйга бориш учун такси керакми, ҳамма нарса, сизга керак бўлган ҳамма нарса бор. Автобусда зўр овқатлар бор. Сизга керак бўлган барча нарса. Сиз машғулот базасида ухлашингиз мумкин. Бу фантастик, керак бўлган ҳамма нарса бор. У ердаги овқатлар ақл бовар қилмайдиган даражада, янги, ҳамма нарса янги узилган. Ошпаздан исталган нарсани сўраш жуда осон, шунинг учун ҳа, бу асосий фарқ".
Гвардиола асосий жамоа ходимлари ўзларини шу жараённинг бир қисмидек ҳис қилишларини хоҳлайди, бу бу йилги Англия Кубогида ғалаба қозонганидан сўнг, у катта гуруҳни футболчиларга қўшилишга ва бирга суратга тушишга чақирганида намоён бўлди. Мураббий асосий жамоа биносидагилар – ошпазлар, либослар бўйича маъмурлар, хавфсизлик ходимлари ҳам жараёнга жалб қилинганини ҳис қилишларини жуда хоҳлайди.
"Менимча, унинг ўз ходимларига ғамхўрлик қилиши таҳсинга сазовор, чунки ҳар мавсумда унинг ходимлари жуда мотивлашган бўлади", – дейди Фернандиньо. "У ҳар доим саҳна ортида жуда қаттиқ ишлаётган одамларни мақташга ҳаракат қилади. Бу одамларнинг футболчилар ва раҳбарият билан алоқаси жуда яхши эди ва бу нарсалар уни ҳақиқатан ҳам ўзига хос қилди, чунки ҳамма уни яхши кўради, ҳамма уни ҳурмат қилади. Албатта, у бошлиқ эди, лекин унинг одамларга муносабати, менимча, бошқача эди ва кўпчилик у учун жонини беришга ҳам тайёр эди".
У бу ходимлар билан улкан молиявий бонусларни бўлишди ва Ковид даврида ҳеч ким, жумладан, асосий жамоага бевосита алоқаси бўлмаган ходимлар ҳам таътилга чиқарилмаслиги ёки ишдан бўшатилмаслиги кераклигини таъкидлади. Апрель ойида "Челси"га қарши ўйиндан олдин у клубнинг узоқ йиллик либослар маъмуридан Стэмфорд Брижда ўйиндан олдин нутқ сўзлашини сўради.
Икки йил олдин у Манчестер дербисидаги ғалабадан кейин жамоа олдида кўз ёшлар билан нутқ сўзлади ва унда клубнинг инфратузилма бўйича раҳбари Клайв Уилтонга саратон ташхиси қўйилганини айтди.
Гвардиола кўпинча "Этихад" ва машғулот базасидаги майсанинг узунлиги ва майдоннинг ҳолати бўйича майдон ходимлари билан зиддиятга бориб турарди, каталониялик мутахассис ходимлар имконсиз деб билган нарсаларни талаб қиларди. Охир-оқибат, гарчи ундай бўлмаса-да, улар майса у кўрсатган 23 мм узунликда кесилганини айтишарди, чунки у барибир фарқини билмайди деб ўйлашарди. У шунингдек, ёзги концертларнинг стадион майдонига таъсиридан тез-тез ғазабланарди, гарчи ўзи ҳам уларга тез-тез ташриф буюрса-да. "Coldplay" гуруҳи машғулотларни томоша қилаётганининг сабаби шундаки, улар машғулот базасидаги падел кортларидан фойдаланишаётганди – Гвардиола келган вақтларда одамларга ҳали падел нима эканлигини тушунтиришга тўғри келарди.
Ўша ўн йиллик давомида кўп нарса ўзгарди. "Сити" Европа футболининг чўққисига чиқди ва буюклик тушунчасини қайта яратди, илгари ҳеч қачон эришилмаган ва балки бошқа ҳеч қачон такрорланмайдиган марраларни забт этди. Ва шунга қарамай, Гвардиоланинг клубдаги фаолиятини шунчаки рақамлар ва статистикалар билан ўлчаб бўлмайди ва кубоклар сари ғам-ташвишсиз юриш сифатида қаралмаслиги керак.
Унинг Англиядаги ўн йиллиги рақиблар ва баъзида ўз футболчилари билан бўлган кескин жанглар, Чемпионлар лигасида "Тоттенхэм" ва "Реал Мадрид"дан учралган мағлубиятларнинг оғир паллалари, миллатни ойлаб ҳаяжонда ушлаб турган чемпионлик пойгалари, "Брайтон", "Вест Хэм" ва айниқса "Вилла"га қарши сўнгги кунлардаги шонли онлар, 2023 йилда "Юнайтед"га қарши кубок финали, Истанбулда Родрининг ғалаба голи, ўша "шаҳарликлар" жамоасининг футболидаги мукаммаллиги ва шундан кейинги барча нарсаларнинг қайта яратилиши билан белгиланади.
Юзлаб ўйинчилар ва минглаб ходимлар буларнинг барчасига улкан ҳисса қўшишди, аммо буларнинг ҳеч бири Пеп Гвардиоласиз содир бўлмас эди.
