Маэстро ўрнига маэстро. "Барселона"да Иньестанинг ўрнини эгаллай оладиган 5 футболчи

Клуб ҳурматга лойиқ футболчи билан муносиб хайрлашди. Иньеста жамоани тарк этмоқда ва энди клуб раҳбарияти ёзги трансфер ойнасида унинг ўрнига футболчи топиши керак бўлади.

Артур билан келишиб олинган ва Антуан Гризманн трансфери деярли амалга ошган бўлсада, "Барселона"га Иньеста каби ўйинни бошқара оладиган ярим ҳимоячи лозим.

Дунёнинг энг яхши ярим ҳимоячиси ўрнини эгаллаш осон эмас, бироқ Каталония клуби келаси мавсум юқори ўринлар учун курашмоқчи бўлса, трансфер амалга ошириши шарт. Июнь ойида жаҳон чемпионати бошланади ва ушбу мундиалда керакли футболчини танлаб олиш қийин бўлмайди.

#5 Антони Марсьяль

Ҳа, савол пайдо бўлгани аниқ. Ижодкор ярим ҳимоячи ўрнига вингер келиши тўғрими?
Ҳа.
"Барселона" ёзда Неймардан айрилди ва унинг ўрнини Усмон Дембеле ва Филиппе Коутиньо билан тўлдирди. Бироқ муаммо шундаки, Дембеле чап эмас, ўнг қанотда яхшироқ ҳаракат қиляпти, Коутиньо эса асосан Иньеста ўрнига тушиб, ярим ҳимоячи вазифасини бажармоқда.
Марсьяль Каталония клубига ўтса, бўш қолган чап қанотни тўлдиради. У мавсум давомида ўз жойи учун курашди, бироқ Моуриньо францияликни асосий таркибга киритмай қўйди. Миш-мишларга кўра, Марсьяль МЮнинг янги шартномасини тарк этган ва ёзда клубини ўзгартирмоқчи. Франциялик форвард "Монако"дан "Юнайтед"га ўтганидан сўнг, фаолиятида пасайиш кузатилди, Дидье Дешам хатто уни ЖЧ-2018 учун Франция терма жамоасига чақирмади.
Футболчининг иқтидорига шубҳа йўқ, у майдонга тушганида доимо ўзини кўрсата олган. Унинг оёқлари чаққон, тўпни яхши назорат қилади ва тўғри қарор қабул қила оладиган ўйинчи.
Марсьяль Иньеста ўрнини эгаллай олмаслиги мумкин, аммо у чап қанот ҳужумчисига айланади ва Коутиньо ярим ҳимояда ўйнайди.


#4 Миралем Пьянич

Айни дамда Миралем Пьянич дунёнинг энг яхши марказий ярим ҳимоячилардан бири. Ассист? Гол? Жарима зарбалари? Пьянич бу ишларни дўндиради. Футболчи яна бир ажойиб мавсумни якунлади. Босниялик бу футбол йилида "Ювентус" сафида 14та голли пас бериб, 7та гол уришга муваффақ бўлди.
Унинг майдонни кўриши, тўп билан ҳаракатланиши ва рейдлари "Барселона"га мос футболчи эканлигини исботлайди. Ўйинчи 28 ёшда ва Пьяничнинг Каталония клубига ўтадиган вақти келди. Миралем 28 млн. евро эвазига "Рома"дан "кекса синьора"га ўтган, энди туринликлар уни 70 млн. еврога пуллаши мумкин.
Жамоада Бускетс ва Ракитич каби ярим ҳимоячилар бўлишига қарамай, Пьяничнинг қўшилиши ҳужумга ранг-баранглик беради. Миралемда Иньестадаги каби дриблинг бўлмасада, босниялик бу камчиликни ўйинни бошқариши билан тўлдириши мумкин.
Ёзда "Барселона" ярим ҳимоясида ўзгаришларга муҳтож ва Эрнесто Вальверде бу маълумотни тасдиқлади. Каталония клуби баъзи футболчилар тарк этади ва кўк-анорранглилар "Рома" собиқ ярим ҳимоячисини ўзига жалб қилиш учун керакли ишни қила олишади.


#3 Френки Де Йонг

"Аякс"нинг ёш ярим ҳимоячиси Голландия чемпионатининг 22та учрашувида 8та голли пас бериб, мавсумни ажойиб якунлади.
У ҳимоявийроқ ролда бўлса ҳам, Иньестанинг ёшлигини эслатиб, ҳужумга ўтишни ёқтиради. Де Йонг етук футболчи бўлмасада, у юқори савияга чиқиши учун бир ёки икки мавсум керак бўлади. "Барселона" тезда уни ўзиники қилиб олиши лозим.
Френки Де Йонг Каталония клуби ярим ҳимоясида экринликка эга бўлади ва келажакда 8 рақам позициясини эгаллаши мумкин.


#2 Кристиан Эриксен

Даниялик ярим ҳимоячи "Аякс"дан "Тоттенхэм"га ўтганидан сўнг, Европанинг кўплаб грандлари эътиборига тушди. У Маурисио Почеттино жамоасида Гарри Кейн, Деле Алли каби алмаштириб бўлмас футболчилардан бирига айланди.
У тактик жиҳатдан кучли, "Барселона" футболчилари каби позицион ўйинни хуш кўради. Тўп билан яхши ҳаракат қила оладиган Эриксен Каталония клуби учун ажойиб трансферга айланиши мумкин.
Кристиан Эриксен майдонда бўлса, унинг плеймейкерлик қобилияти билан жамоа осонроқ ҳаракатланади.
Даниялик жорий мавсум АПЛнинг 37та ўйинида 11та голли пас бериб, 10та гол уришга муваффақ бўлди.
26 ёшли ярим ҳимоячи "Барселона"дан бўладиган таклифга йўқ дейиши қийин бўлса керак.

#1 Тьяго Алькантара

Қачонлардир Тьяго Алькантарани Хави ва Иньестанинг издоши деб аташарди, аммо испаниялик 2013 йилда 25 млн. евро эвазига Гвардиола кетидан "Бавария"га ўтди. Ушбу трансфердан сўнг клуб мухлислари жамоа раҳбариятини ёмон кўриб қолишди.
Энди "Барселона фарзанди"ни қайтариш вақти келди. Бу харид янгилик бўлмайди, чунки Сеск Фабрегас ва Херард Пикелар Каталония клуби сафига икки мартадан қўшилишга улгуришган. Тьяго Иньеста учун ажойиб мерсохўр ва миш-мишларга кўра, у Испанияга қайтмоқчи. Алькантарада "Барселона ДНК"си бор.
"Бавария"нинг Чемпионлар лигасидаги муваффақиятсизлигидан сўнг, Тьяго уйга қайтишни истаб қолиши мумкин.