"Ливерпуль", "Манчестер Сити" ва "Челси" француз футболчисига қизиқиш билдирмоқда.
Мерсисайдликлар Кундени айнан ҳимоя учун кўриб чиқмоқда, чунки Жереми Фримпонг ҳужумкор футболчи саналади. Манбага кўра, "Ливерпуль" ўйинчи учун тахминан 80 миллион евро таклиф қилишга тайёр.
"Барселона" 27 ёшли ҳимоячига юқори баҳо беради ва уни жамоада сақлаб қолмоқчи, аммо жиддий таклифни молиявий жиҳатдан қондириш қийин бўлишини тушунади. Агар трансфер амалга ошса, клуб бу маблағлардан ўз таркибини кучайтириш учун фойдаланади: "Атлетико" ҳужумчиси Хулиан Альварес ва "Интер" ҳимоячиси Алессандро Бастони номзодлар рўйхатида.
"Кўк-анорранглилар" Кундега ўринбосарлик қилиши учун Жоау Канселу билан шартномани узайтириш ёки "Ювентус" ҳимоячиси Андреа Камбьязо билан битим тузишни кўриб чиқяпти.
Кунде 2022 йилнинг июль ойидан бери "Барселона"да ўйнаб келмоқда. У ушбу мавсум 40 ўйинда майдонга тушиб, 3 та гол урди ва 4 та голли узатмани амалга оширди.
