"Темирйўлчилар" ёзги трансфер ойнасида Жасур Яхшибоев билан шартнома имзолади. Аслида футболчи қишдаёқ "Локо" аъзосига айланган эди. Кейин эса Қозоғистонга йўл олди. Биз бу борада Яхшибоевнинг фикрларига қулоқ тутдик.
— "Локомотив" сафидасиз. Орада қандайдир тушунмовчиликлар бўлди, ҳозир барчаси жойидами? Мана шу жараён ҳақида бироз тўхталиб ўтсангиз, аслида нима бўлди?
— Энди, билмадим… Қозоғистондан таклиф тушганди. У ерда озгина келишмовчилик бўлди — клубга трансфер ойнасини ёпиб қўйишди. Шунинг учун у ерда шартнома тузолмадим. Шу холос.
— "Локомотив" билан Ўзбекистон чемпионатининг мавсум қолган қисмига тайёргарлик қандай кетяпти?
— Тайёргарлик яхши, кайфиятлар ҳам аъло. Секин-секин ўйинлар орқали, биринчи навбатда, ўзимни формага келтиришга ҳаракат қиляпман. Жамоада йигитлар яхши, ҳамма ҳаракат қиляпти. Барчаси ўйлаганимиздек.
— Орада жуда ажойиб формага кирган эдингиз, ўзингизни кўрсатгандингиз ва шундан сўнг қандайдир пасайиш бўлди. Кейинги мақсадларингизда яна ўша чўққингизга қайтиш, терма жамоадан таклиф олиш режаларингиздан ўрин олганми?
— Худо хоҳласа, ният бор. Бунга ўзига яраша сабаблар бўлди. Энди келажакда, худо хоҳласа, ҳаракат қиламиз. Ўйинлар орқали ўзимни кўрсатиб, миллий терма жамоага қайтиш ниятим бор.
— Тошкент дербисидан нима кутяпсиз? "Пахтакор" — собиқ жамоангиз...
— "Пахтакор" — собиқ жамоам. Ҳозир бизни жуда қизиқарли ва кучли ўйин кутяпти. "Пахтакор" айни вақтда жуда яхши формада, таркиби ҳам Ўзбекистонда энг кучлиларидан бири. Биз қўлдан келганча ҳаракат қиламиз.
