“Ҳаммага хайрли кеч. Саволларингизни бераверинг. Ютяпмизми ёки ютқазяпмизми, бунинг катта фарқи йўқ. Биз шунчаки мавсумни сақлаб қолиш ва Олий лигада жон сақлаш учун курашяпмиз. Йигитларга яна бир бор ўз миннатдорчилигимни билдираман. Бу ўта оғир меҳнат. Биз турган ҳозирги шароитда ишлаш жуда қийин. Биз ҳам руҳий, ҳам жисмоний жиҳатдан зўриқишнинг энг юқори чўққисидамиз. Чемпионат якунланишига икки ўйин қолди ва шартнома бўйича ҳалол ишлаб топган пулларини ололмаётган ёрдамчиларимсиз қолиб, мавсумни якунлашим ҳам ҳеч гап эмас”, - дея гап бошлади Илёс Зейтуллаев.
— Молиявий ҳолат мавзусини давом эттирмоқчи эдим, шундай муаммоси бор клубларнинг барчаси турнир жадвалининг қуйи поғоналарида жойлашган. Сизнинг жамоангиз эса бундан истисно. Агар бугун ғалаба қозонганингизда, кучли учликка кирган бўлардингиз. Бунинг сири нимада? Одатда, пулсиз қолган спортчилар бир-икки ойдан кейин ўйнашни тўхтатиб қўяди, сизлар эса ҳамон юқори ўринларда боряпсизлар...
— Гап шундаки, бу ерда ўз касбини севадиган инсонлар, ҳақиқий профессионаллар йиғилган. Биз бу жамоани икки ярим йилдан буён қуриб келяпмиз. Қачонки пойдеворни мустаҳкам қўйсанг, натижа эртами-кечми бўлади. Жамоамиз жуда кучли, мавсум олдидан медаллар учун курашиш каби юксак вазифалар қўйилганди. Лекин ҳозир бўлаётган ишлар нотўғри. Италиялик легионерлар бу ерда тўрт ойдан бери ишлаб келишяпти, уларга берилиши керак бўлган пулнинг учдан бирини ҳам тўлашмади, ваҳоланки, маошларининг ўзи унчалик катта эмас. Шунга қарамай, улар ҳақиқий жангчи эканлигини намойиш этишмоқда. Бугунги ўйиндан сўнг учинчи ўринда бўлишимиз мумкин эди. Барча ходимлардан тортиб ҳатто кийим-кечак ва анжомларимизга қарайдиган аёлдан ҳам чексиз миннатдорман. Ушбу ходимамиз ҳам тўрт ойдан бери маошсиз ишлаяпти.
— Бир ҳафта олдин клуб давлат компаниясидан молиявий ёрдамнинг илк қисмини олиши ва стадион ходимларининг уч ойлик қарзлари ёпилгани ҳақида хабарлар чиққанди. Вазият яхшиланмадими?
— Яшириб ўтирмайман, аҳволимизни ўзингиз биласиз. Бу муаммога дуч келган фақат биз эмасмиз. Тасаввур қилинг, легионер бошқа мамлакатга келса-ю, воқелик шундай тус олса, бу ҳеч кимга обрў келтирмайди. Бу оддий бизнес. Уй қуришга бир нархга келишиб олиб, охирида тўрт баравар кам пул тўласангиз, у одам оиласининг олдига қандай юз билан боради? Уларнинг кредитлари, оиласи бор. Футболчилар атрофида улкан иқтисодий тузилмалар турибди, бунинг ортидан катта пуллар ишланади. Сизлар ҳам шу ерда ўтирибсиз, чунки бу бир индустрия. Лекин охир-оқибат ҳаммаси майдонга тушадиган йигирмата йигитнинг гарданида турибди. Умид қиламанки, тез орада бирор нарса ойдинлашади.
— Ўйин ҳақида гапирсак, ҳисоб 0:2 бўлгач, жамоа бирдан “сочилиб кетгандек” туюлди, ваҳоланки, биринчи бўлимда пенальти белгиланган вазият жуда катта аҳамиятга эга эди. Ахир ҳисоб 0:4 ёки 0:5 ҳам бўлиши мумкин эди...
— Футбол — психологик ўйин. Агар пенальтидан унумли фойдаланиб, ҳисобни 1:1 кўринишига келтирганимизда, ўйин натижаси бутунлай бошқача бўларди. Лекин, яна такрор айтаман, ҳозир бу кимга ҳам керак? Ютсак ҳам, ютқазсак ҳам ёнимизда ҳеч ким йўқ. Ғалаба қозонсак, табриклагани ҳеч ким келмайди, мағлуб бўлсак ҳам ҳеч ким кўринмайди. Ўз ҳолимизга ташлаб қўйилганмиз.
— Ахир пулни барибир тўлашга тўғри келади, ўйинчилар уни ФИФА орқали ундириб олиши мумкин. Балки футболчилар ўзларини кўрсатиб, яхшироқ клублар назарига тушиш истаги учун ўйнаётгандир? Айрим ўйинчиларнинг юқорироқ савияга чиқиш учун борини бериб ўйнаётганини кўряпмиз-ку.
— Уларни ҳаракатга келтираётган нарса ҳам айнан шу. Мен йигитларга доим айтаман: ҳеч ким кўрмаётган пайтда ҳам, жимжитликда, қоронғиликда ўз ишингизни қилаверинг. Улар катта эътиборга муносиб. Биз тўртинчи ўринда шунчаки турганимиз йўқ, бизда сифатли ёш ўйинчилар бор. Молиявий муаммолар туфайли таркибимиз жуда “қисқа”, шунинг учун уларни ўзим руҳлантираман. Ўзингизни кўрсатинг, токи биринчи даврадан сўнг сизни ўз сафига қўшиб оладиган ва қадрлайдиган муносиб клуб топилсин. Биз уларнинг келажагига ёрдам бериш учун ишлаяпмиз.
