- Ўйин ҳақида фикрингиз?
- Пролига бошлангани билан барча иштирокчиларни ва мураббийларни табриклайман. Ўйинга келадиган бўлсак, биринчи тур ҳар доим қийин ўтган. Бўлим бошида гол ўтказиб юбордик, кейин вазиятни тенглаштирдик. Яйпан жамоаси уйда яхши ҳаракат қилишини билардик. Икки кун олдин рақибни таҳлил қилганимизда "Яйпан" қандай футбол намойиш этишини кўриб чиққандик. Бугун қийин ғалабага эришдик. 60-дақиқадан кейин ҳам толиқиб қолмай ўйнай олишимизни намойиш этдик ва ғалаба голини урдик. Бу билан футболчиларни табриклайман ва Яйпан жамоасига кейинги ўйинларда омад тилайман.
- "Металлург"да ёши катта футболчилар кўп. Бу ҳолат ёшларнинг етишиб чиқишига халақит бермайдими?
- Жамоамиз олдига жиддий мақсад қўйилган, биз Суперлигага чиқишни хоҳлаймиз. Тажрибали футболчиларни жалб этишга ҳаракат қилдик. 26 январдан мавсумга тайёргарликни бошладик. Эсингизда бўлса, уч йил олдин "Нефтчи" ҳам тажрибали футболчилар билан Пролигада чемпион бўлиб, Суперлигага чиққанди. Шу боис буни нормал ҳолат деб ҳисоблайман. Кўз остимизга олиб қўйган яна икки-уч нафар тажрибали ўйинчилар бор эди, лекин трансфер ойнаси ёпилиб қолди. Таркибимизда ёшлар ҳам бор ва уларни кейинги баҳсларда майдонга туширамиз. 25 нафар футболчимиз бор ва жамоада рақобат яхши. Кейинги ўйинларда ротация бўлади.
- Негадир бугун легионерлар фаол кўринмади?
- Тўрт нафар хорижлик футболчини таклиф этганмиз. Ҳозирги кунда Бубанья билан Йочич ёмон ҳаракат қилмади, биринчи таймдан кейин Бошнякни захирага олдик. Чунки тўлиқ спорт формасида эмас. Бразилиядан келган ўйинчимиз адаптация жараёнини бошдан кечиряпти. Апрель ойида олтита ўйинимиз бор, шу ўйинлар орқали легенионерлар ўзини кўрсатиб боради.
- Муҳаммадбобир Мўйдинов ҳужум чизиғига олинди. Вазиятдан келиб чиқиб шундай йўл тутдингизми?
- Захирада футболчиларимиз етарли. Ярим ҳимоячилар ҳам, ҳужумчилар ҳам бор. Биз фақат ўйиндан келиб чиқиб футболчилар позициясини ўзгартирдик. Мўйдинов қандай футболчи эканини биламиз, унинг потенциалидан келиб чиққан ҳолда ҳужумга ўтказдик.
- Ҳакамлар ишидан қониқдингми?
- Биринчи бўлимдаги вазиятда пенальти бор эди. Ўша вазиятни ҳакамлар кўриб чиқишини хоҳлайман. Видео ёзувни кўрдик, пенальти бор экан.
- Қайси жамоалар Суперлигага даъвогарлик қилади?
- Биздан ташқари "Шўртан", "Олимпик Мобиуз", "Каттақўрғон" каби жамоаларда жиддий вазифа борлигини биламиз. Улар ҳам бизга ўхшаб босимда. "Яйпан"да босим йўқ, шунинг учун бемалол ўйнади. "Металлург" мақсад сари давом этади. Пролигада осон ўйин бўлмайди, ҳар бир баҳсда кураш кечади.
