Икки нафар ҳакам Ўзбекистон Суперлигаси баҳсларидан четлатилди

"Бухоро" – "АГМК" учрашувида ишлаган Вадим Агишевнинг ҳаракатлари бошқарма томонидан синчковлик билан ўрганиб чиқилди. Бир неча вазиятларда Агишев жиддий ҳатога йўл қўйгани ва ўйин тизгинини қўлдан чиқариб юборгани аниқланди. Шу сабабли, унга Суперлига ўйинларидан четлатилиш интизомий жазоси белгиланди.

Шунингдек, "Навбаҳор" – "Қўқон-1912" ўйини бош ҳаками Виктор Серазетдиновнинг ишида ҳам жиддий камчиликлар аниқланди. Унинг ўйин давомида йўл қўйган ҳатолари бевосита натижага таъсир қилди. Серазетдиновга нисбатан Суперлигадан четлатилиш ва қуйи лигага тушириб юбориш интизомий жазоси тайинланди.

Шу ўринда эслатиб ўтамиз, ЎФА ҳакамлар бошқармаси миллий чемпионатларимиз ҳар бир ўйинининг ҳар дақиқасини синчковлик билан кўриб, ўрганиб чиқмоқда ва ҳакамлар ҳаракатини атрофлича таҳлил этмоқда.

Ҳатога йўл қўйилган ҳолатларда ҳакамларга тегишли интизомий жазо белгиланяпти. Ўз ишига лоқайд мутахассисларга нисбатан жиддий огоҳлантиришдан тортиб, четлатилишгача бўлган чоралар қўлланилмоқда.