– Бугунги ўйин тўғрисида ўз фикрларингизни билдирсангиз.
– Биз ҳар доимгидек ушбу учрашувга жуда яхши ёндашув ва юқори кайфият билан етиб келдик. Барча футболчилар биргаликда, аҳил жамоа бўлиб ишламоқда. Ўйиндан олдин йигитларга биз учун "ўртоқлик ўйини" деган тушунча йўқлигини, ҳар бир ўйинга жиддий ёндашиш кераклигини таъкидладим. Улардан юқори темпда, интенсив ўйнашни сўрадим. Биз ҳали ҳам яхшилашимиз керак бўлган жиҳатлар талайгина, аммо бугунги учрашувни чиройли ўйин ва ғалаба билан якунлаганимиз ёқимли бўлди. Биз босқичма-босқич яхши жамоа шакллантириб бормоқдамиз. Уч кундан сўнг бизни Жанубий Корея терма жамоасига қарши қийин сафар учрашуви кутиб турибди. Барча футболчиларнинг ҳолати яхши ва биз тўғри йўналишда ҳаракат қилишда давом этишимиз керак.
– Эронга қараганда Сурия терма жамоаси бироз заифроқ кўринди. Бугунги ўйин хулосасига кўра, нималардан қониқдингиз ва нималардан қониқмадингиз? Шунингдек, Жанубий Кореяга қарши учрашувда қандай таркиб ва тактикада ўйнашингиз мумкин?
– Биз барча футболчилар билан бир хил машғулотлар олиб борамиз, жамоада "асосий" ёки "захира" таркиби деган ажратиш йўқ. Бугунги учрашувда баъзи футболчиларни алмаштириш ва бошқаларга ҳам ўзини кўрсатиш учун имконият бериш муҳим эди. Одамлар ўйинни осон кечди деб ўйлашлари мумкин, аммо биз тўғри бошлаганимиз, кўп югурганимиз ва тўғри прессинг қилганимиз сабабли ўйинни ўзимиз учун осонлаштирдик. Сурия осон рақиб эмас, улар сўнгги ўйинида Иордания билан 1:1 ҳисобида дуранг ўйнаган эди. Кейинги учрашув биз учун яна бир яхши синов бўлади. Мен учун шунчаки натижадан кўра, жамоанинг характери ва жамоавий ўйин кўрсатиши муҳимроқ. Бугун ҳам, Эронга қарши ўйинда ҳам буни уддаладик.
– Ҳисоб йирик бўлишига қарамай, худди Эронга қарши ўйинга нисбатан жамоа бугун бироз секин ва оғир ҳаракат қилгандек туюлди. Интенсивлик ва стандарт вазиятларда қандайдир муаммолар бордек кўринди. Бунга қандай қарайсиз ва Самандар Муратбаев жамоага қачон қўшилади?
– Самандар Муратбаев масаласида ҳозирча аниқ гапириш қийин, у ҳали етиб келмади, буни яна келишиб оламиз. Биз машғулотларда барча жиҳатлар устида – ҳимоядан тўп билан чиқиб кетишдан тортиб, стандарт вазиятларгача бирдек ишлаймиз. Албатта, баъзида хатолар бўлиши табиий, доим ҳам мукаммал ўйнаб бўлмайди. Эронга қарши ўйинда уларнинг даражасини кўрдик, улар Осиёдаги энг кучли жамоалардан бири. Биз учун энг муҳими жамоавий ўйин намойиш этиш. Устида ишлашимиз керак бўлган асосий нарса – босим ўтказиш вақтини тўғри ҳис қилиш. Агар сиз кучли жамоаларга қарши прессингни нотўғри вақтда амалга оширсангиз, улар бу вазиятдан осонгина чиқиб кетишади. Биз футболчиларга қачон олдинга ўтиб босим ўтказиш кераклигини ўргатишга ҳаракат қиляпмиз. Футбол бу – вақт ва ҳудуд ўйини. Тўп рақибда бўлса, уларга ўйлаш учун вақт қолдирмаслик мақсадида ҳудудни торайтиришимиз керак; тўп ўзимизда бўлганда эса, аксинча, кўпроқ вақтга эга бўлиш учун бўш ҳудудларни кенгайтиришимиз лозим. Агар тўғри вақтда прессинг қилмасангиз, дунёнинг энг кучсиз жамоасига қарши ҳам муаммога дуч келасиз. Сўнгги 10 кун ичида футболчилар биз улардан нимани талаб қилаётганимизни тушуниб етишганидан хурсандман.
– Терма жамоа янги тактик схемага ўтди. Бу схемада футболчиларнинг ҳаракатига четдан қандай баҳо берасиз?
– Қисқа вақт ичида футболчилар бизнинг янги тизимимизни ва ғояларимизни яхши тушуниб олишди. Ўйлайманки, улар ҳозирги ўйиндан кўпроқ завқ олишмоқда, чунки тўп назорати асосан ўзимизда бўляпти. Машғулотларда кўрган кўрсатмаларингизни майдонда тўғри бажара олсангиз ва бугунгидек еттита гол урсангиз, футболчилар ҳам бу жараённи қадрлашади. Янги тизимимиз орқали таянч ярим ҳимоячиларга қулайлик яратилмоқда: қанот вингерларимиз ҳам марказга кириб, ҳам чизиқ бўйлаб фаол ҳаракат қила олади. Биз рақибга яккама-якка ҳолатларда осонликча имкон қолдирмаяпмиз. Ўйин давомида ротациялар юз бермоқда, қисқа ва узун паслар орқали ўйин ташкил қилиняпти. Албатта, бу тизим устида босқичма-босқич ишлашда ва уни янада мукаммаллаштиришда давом этамиз.
– Осиё кубоги бошланишига оз вақт қолди. Асосий рақибларимиздан бири Япония бўлиб, катта эҳтимол билан улар ўз гуруҳида биринчи ўринни эгаллашади. Агар биз ҳам гуруҳда биринчи ўринни олсак, плей-офф босқичида улар билан тўқнаш келишимиз мумкин. Японияга қарши алоҳида тайёргарлик кўриладими?
– Дўстим, сиз ҳозирдан уч ой кейинги воқеаларни ўйлаяпсиз. Ҳозирча бугунги ўйиндан ва натижадан завқ олинг. Албатта, финалгача етиб бориш учун тўғри йўлни топишимиз керак бўлади. Лекин ҳозирдан фақат Японияни ўйлаб, бошқа жамоаларга эътиборни йўқотмаслигимиз шарт. Биз барча рақибларга қарши ўйнашга тайёр бўлишимиз керак. Мен Японияни яхши биламан, чунки "Гуанчжоу Эвергранд" клуби билан Осиё Чемпионлар Лигаси ярим финалида ҳам япон жамоаларига қарши ўйнаганмиз ва уларнинг қандай ўйнашидан хабарим бор.
