"Бу йил совринни ҳеч кимга бериш керак эмас" — Скоулз АПЛдаги чемпионлик кураши ҳақида

"Ҳеч ким чемпионликка лойиқ эмас"

Скоулзнинг фикрича, бу йилги мавсумда бирорта ҳам жамоа ёрқин ва ишончли ўйин кўрсата олмаган:

"Ўтган йиллари ким чемпион бўлмасин, якунда улар бунга ҳақли эканини тан олардингиз. Аммо бу мавсумда ҳеч ким мени Премьер-лига чемпиони бўлишга муносиб эканлигига ишонтира олмади.

Ўйлашимча, бу йил трофейни умуман ҳеч кимга топширмаслик керак. Ҳеч ким бунга лойиқ эмас. Ростини айтсам, бу мавсумни томоша қилиш унчалик ҳам қизиқарли бўлмади".

"Арсенал"даги улкан босим

"Арсенал"нинг имкониятлари ҳақида гапирар экан, собиқ футболчи лондонликларнинг руҳий ҳолатига эътибор қаратди:

"Уларга ("Арсенал"га) жуда катта босим тушмоқда, шундай эмасми? Бунинг сабаби, улар сўнгги йиллар давомида жуда яхши позицияларда бўлишди, аммо сўнгги ва энг муҳим қадамни ташлай олишмади. Шунинг учун ҳозир улар ақл бовар қилмас ҳолатда туришибди.

Сиз ёрқин футбол кўрмайсиз. Айтиб ўтганимдек, бутун мавсум давомида бирорта жамоадан бундай ўйин кўрмадик, аммо ҳозирги босқичда энг муҳими — улар сўнгги қадамни қандай ташлашидир", — деди Скоулз "The Good, The Bad & The Football" подкастида.

Эслатиб ўтамиз, айни дамда АПЛ турнир жадвалида "Арсенал" 29 та турдан сўнг 64 очко билан пешқадамлик қилмоқда. Иккинчи ўринда эса битта ўйини захирада бўлган "Манчестер Сити" 59 очко билан бормоқда.