Бахтиёр Ашурматов: "Финалда "Насаф" - "Навбаҳор" қарама-қаршилигини тахмин қиламан"

Қаршида "Насаф" - "Динамо", Олмалиқда ОКМК - "Навбаҳор" қарама-қаршилигига гувоҳ бўламиз. Мазкур учрашув олдидан сайтимиз журналисти Абдулазиз Искандаров тажрибали мутахассис Бахтиёр Ашурматовнинг фикрлари билан қизиқди. 

— Айтиш мумкинки, бу йилги кубок учрашувлари жуда қизиқарли руҳда ўтмоқда. ОКМК - "Навбаҳор" учрашувини финал олдидан финалга қиёслаш мумкин. Бу тўқнашувни қизиқарли ўтишини кутмоқдаман. Фикримча, мазкур учрашувда "Навбаҳор"нинг имконияти кўпроқ. Аммо унутмаслик керакки, ОКМК чемпионлик учун курашдан чиққан. Ўзбекистон кубоги ОКМК учун мавсумда соврин қўлга киритишнинг ягона йўли ҳисобланади. "Кончилар" яхшигина қаршилик кўрсатиши табиий. 

— Қаршида эса сўзсиз "Насаф" фаворит. "Динамо" бунга қадар сенсация кўрсатиб, "Пахтакор" ва "Олимпик"ни кубокдан чиқариб юборишга муваффақ бўлди. Аммо тан олиш керак, "Насаф" ҳозир "Динамо"дан бир бош устун. Шу сабабли бу ўйинда мезбонлар ғалаба қозонади, деб ўйлайман. Финалда "Насаф" ва "Навбаҳор" бош соврин учун курашишини тахмин қиламан. Чемпионлик учун "Пахтакор", кубок учун "Навбаҳор" асосий даъвогар, дея оламан. "Насаф" кубок жамоаси эканлигини ёддан чиқармаслик керак. Боз устига финалга Қарши шаҳри мезбонлик қилади. Мухлисларни муросасиз ярим финал ўйинлари кутмоқда.