- Аввало, бугунги ўйин ва 3:1 ҳисобидаги мағлубият ҳақида фикрингиз?
- Бу мағлубият учун узр сўрайман. Ўзбекистон терма жамоаси ва унинг яхши мураббийини табриклайман. Ўйин яхши ўтди. Биринчи ва иккинчи голларни индивидуал хатолар туфайли ўтказиб юбордик. Бу хатолар биз ўйинни назорат қилаётган пайтда содир бўлди.
Биринчи гол жуда ёш болаларча хатодан кейин урилди. Иккинчи бўлимда алмаштиришлар орқали гол уришга эришдик. Иккинчи голни ҳам уришга ҳаракат қилаётган эдик, аммо яна тажрибали футболчимиз жуда болаларча хато қилди ва шундан кейин вазиятимиз издан чиқди.
- Бугунги таркибда жуда кўп ўзгаришлар бўлди. Янги футболчиларнинг ўйинидан қониқдингизми?
- Умуман олганда, жуда кўп ўзгаришлар қилдик. Кўплаб футболчилар терма жамоа муҳитида биринчи марта ўйнашди. Айрим футболчиларнинг ўйинидан қониқдик. Аммо баъзиларига терма жамоага ёрдам бера олиши учун кўпроқ вақт ва ўйин керак.
- Ўзбекистон терма жамоаси сўнгги вақтларда тобора кучайиб бораётгани ҳақида нима дея оласиз?
- Кеча ҳам айтган эдим, Ўзбекистон ривожланиб бормоқда. Бу миллий терма жамоалар ўртасидаги баҳс бўлса-да, биз учун тайёргарлик муҳимроқ эди. Кўплаб ўзгаришлар қилдик ва айрим ёш футболчиларнинг даражасини синаб кўришга ҳаракат қилдик.
- Ўзбекистонга қарши ўйиндаги учта гол ўтказиб юборилиши аввал кузатилмаган. Бундай хатоларга нима сабаб бўлди? Жамоанинг жисмоний ҳолатида муаммо борми?
- Дунёнинг ҳар бир жойида футболчилар хато қилади. Бу футболнинг бир қисми. Бу ўйинлар айнан шундай хатоларни аниқлаш учун керак. Кейин расмий ўйинларда бундай хатолар такрорланмаслиги лозим. Албатта, натижа биз учун яхши эмас. Лекин яна таъкидлайман, биринчи ва иккинчи голларни асосан индивидуал хатолар туфайли ўтказиб юбордик. Ўзбекистоннинг ривожланаётгани ва яхши мураббийи борлигига шубҳа йўқ. Аммо биринчи ва иккинчи голлар вақтида етарлича диққатни жамлай олмадик.
- Бу мағлубият учун кимни айбдор деб ҳисоблайсиз?
- Асосий айбдор — менман. Ҳар қандай ҳолатда ҳам жамоа бош мураббийи сифатида масъулиятни ўз зиммамга оламан. Бугун икки нафар тажрибали футболчимиз хатоларидан зарар кўрдик. Лекин бу футболнинг бир қисми. Дунёнинг исталган жойида футболчилар хато қилиши мумкин.
- Кейинги ўйин — Россияга қарши. Жамоа у ўйингача яхшироқ ҳолатга кела оладими?
- Албатта. Бу Жаҳон чемпионатидан кейинги биринчи ФИФА кунлари. Кеча ҳам айтганимдек, биз ҳали оптимал ҳолатимизга келганимиз йўқ. Ишонаманки, Россияга қарши ўйинда ҳолатимиз анча яхши бўлади.
- Бугунги мағлубиятдан кейин Эрон терма жамоасининг кейинги йўналиши қандай бўлади?
- Бу мағлубият учун азиз Эрон халқи ва мухлисларидан узр сўраймиз. Ишонаманки, терма жамоанинг натижалари яна юқорига қараб ўзгаради. Биз хулоса чиқарамиз ва ишлашда давом этамиз.
