Александр Петров: "Эрон клуби фаворит ва уларга қарши оғир ўйин бўлади"

Олмалиқликлар мусобақага жўнаб кетишидан олдин жамоа устози Александр Петровнинг фикрлари билан қизиқдик.

- Жамоа Осиё чемпионатига қай тариқа тайёргарлик кўрди?
- Мусобақага имкон қадар яхши тайёргарлик кўришга ҳаракат қилдик, ўйинчиларнинг жисмоний ҳолати билан махсус мураббий ишлади. Яқиндагина тоғда 2 ҳафталик йиғин ўтказдик. У ерда кунига икки маҳалдан машғулот олиб бордик, охирги ҳафтада эса Тошкентда кунига бир маҳалдан шуғулландик ва бир нечта назорат учрашувлари ўтказдик.

Таиландга етиб борганимиздан сўнг, у ерда Вьетнам ёки Хитой клуби билан яна бир ўртоқлик учрашуви ўтказамиз.

- Машғулотларни кузата туриб таркибда жароҳатланганлар борлигига кўзимиз тушди. Бу ўйинчиларнинг жароҳати жиддийми?
- Сўнгги ҳафтадаги машғулотларда жароҳатланганлар якка тартибда шуғулланишди. Чунки, уларнинг соғлиғи билан таваккал қилишни истамадик. Лекин, бу футзалчилар Осиё чемпионатида ўйнай олишади.

- Қуръа "Олмалиқ"қа унчалик омадли келмади, амалдаги чемпионга қарши ҳаракат қилиш қийинми?
- Қуръадан олдин учинчи саватчада бўлганимиз учун ҳам мана шундай гуруҳга тушдик. Лекин, Эрон ва Ливан чемпионлари қаршилигини енгишимиз шарт. Чунки, жамоа қандай қилиб бўлса ҳам гуруҳдан чиқиши керак. Эрон клуби фаворит ва уларга қарши оғир ўйин бўлади. Уларнинг таркибида Осиёнинг энг кучли футзалчиларидан бири Шамсаи ҳаракат қилади, машғулотларда уларга қарши қандай ўйнаш кераклиги устида ишладик.