Акром Комилов: "Уругвайдан кам эмаслигимизни исботламоқчимиз"

Ушбу ўртоқлик ўйини олдидан терма жамоамиз ҳимоячиси Акром Комилов ўз фикрларини билдириб ўтди.

- Уругвай терма жамоасига қай даражада тайёргарлик кўрдинглар? 

- Уругвай терма жамоасига жиддий тайёргарлик кўряпмиз. Мураббийларимиз керакли кўрсатмаларни бермоқда ва олдинги ўртоқлик ўйинидаги йўл қўйилган хатоларни қайтармаслик устида ишлаяпмиз. Тўпни кўпроқ ўзимизда ушлаб туриб қарши ҳужумга ўтиш устида машғулот ўтказяпмиз.

- Уругвай билан ўйин ўртоқлик мақомига эга бўлса ҳам олдингларга вазифа қўйилдими?

-  Тўғри, бу ўртоқлик ўйини бўлса ҳам бизга Уругвай терма жамоасини мағлуб этиш шарт, деган вазифа қўйилгани йўқ. Лекин, ушбу назорат учрашувида ўз ўйинимизни кўрсатиб, улардан кам эмаслигимизни исботламоқчимиз. Шу ўринда ўз олдимизга халқимизни хурсанд қилиш вазифасини қўйганмиз.

- Уругвай терма жамоасида, Луис Суарес, Эдинсон Кавани, Диего Годин каби кучли футболчилар бор. Уларга қарши ўйинаш сиз учун қанчалик қизиқарли?

- Санаб ўтилган ушбу футболчиларга қарши ўйнаш қизиқарли. Шу билан бирга бироз хаяжон бўлиши аниқ. Ушбу футболчиларга қарши тўп тепиш бизнинг кучимизга янада куч қўшади. Барча футболчиларидан хавф кутса бўлади. Улар бекорга энг яхши жамоалар қаторида юришмаяпти.

Жаҳонгир Сотволдиев суҳбатлашди