Шерзод Темиров: "Ироқ лигасини мендан ҳам кўра сизлар кўпроқ биласизлар-ку"

"Терма жамоамизнинг навбатдаги йиғинини бошлаш арафасидамиз. Катта танаффусдан кейин МТЖга қайтдим. Ўзимни яхши томондан кўрсатишга ҳаракат қиламан", – деди 27 ёшли ҳужумчи.

- Ироқ чемпионатида тўпурар бўлиб турибсиз...

- Ироқда иккинчи давра бошланган. Олдинда яна 12-13 тур бор. Рақобат ҳам анча кучли. Тўпурарлик масаласидаги рақобатчиларим ҳам бор.

- Opta порталига кўра, Ироқ чемпионати Суперлигамиздан кучли экан. Ушбу фикрга қанчалик қўшиласиз?

- Ироқ лигасини мендан ҳам кўра сизлар кўпроқ биласизлар-ку.

- Қайси бири кучлироқ деб ўйлайсиз?

- Сизлар, яъни журналистлар бу масалага ойдинлик киритганингиз яхши, мен эмас.

- Ўтган мавсумлар давомида Гонконг чемпионатида ҳам яхши ўйин намойиш этган эдингиз, аммо терма жамоадан чақирув бўлмаганди. Каннаваро сизни терма жамоага жалб этгани сиз учун қанчалик кутилмаган қарор бўлди?

- Бизнинг инсонларнинг фикрича, Гонконг чемпионатининг даражаси паст, лекин Гонконгда жуда кўп легионерлар бор. У ерда ҳам рақобат бор. Терма жамоага чақирув — ҳар бир мураббийнинг қарори. Унга эътироз билдира олмайман. Терма жамоада ўзимни кўрсатишга максимал ҳаракат қиламан.

- Ёзда Суперлига клубларидан таклиф бўлса, Ўзбекистонга қайтишингиз мумкини?

- Ҳозир ҳам таклифлар бор. Агентим билан кўришиб олиб, барча таклифларни кўриб чиқамиз.