"Реал" Фран Гарсияни қўйиб юбормади: футболчи алоҳида шуғулланишни сўраган

"The Athletic" нашрининг хабар беришича, "қироллик клуби" ушбу трансферни блоклаб қўйган.

26 ёшли испаниялик футболчи АПЛ клубини ўзи учун етарли ўйин амалиётига эга бўлиш учун яхши имконият деб ҳисоблаган эди. У ҳатто Вальдебебасдаги машғулот базасидагиларга инглиз клубига ўтиш эҳтимоли жуда юқорилигини айтган. Бироқ Мадрид клуби раҳбарияти жума куни уни қўйиб юбормасликка қатъий қарор қилган.

Вазият тафсилотлари:

- Трансфер рад этилгач, Гарсия шанба кунги машғулотни жамоадан алоҳида, индивидуал тарзда ўтказишни сўраган.

- Клуб бу илтимосни рад этди. Натижада футболчи ОАВ учун очиқ бўлган дастлабки 15 дақиқани гуруҳ билан ўтказди, сўнгра машғулотни мустақил давом эттирди.

- Маълум бўлишича, Гарсия трансфер масаласида мураббий Альваро Арбелоа билан ҳам гаплашган.

- "Реал"нинг қишки трансфер ойнасидаги позицияси аниқ: жамоадан Эндрикдан бошқа ҳеч ким қўйиб юборилмайди.

Фран Гарсиянинг амалдаги шартномаси 2027 йилгача мўлжалланган бўлса-да, у ёзда кўпроқ ўйин амалиёти берадиган янги жамоа топишга умид қилмоқда. Маълумот учун, ҳимоячи жорий мавсум Ла Лигада 7 та ўйинда майдонга тушиб, 1 та гол уришга эришди.